គណៈកម្មាធិការសម្របសម្រួលអចិន្ត្រៃយ៍ បានប្រកាសកែសម្រួលសមាសភាពមន្រ្តីនៅស្ថានីយជញ្ជីងអចល័តខែលជ័យ ខេត្តកំពង់ចាម ដើម្បីពង្រឹងប្រសិទ្ធភាពការងារលើការទប់ស្កាត់ការដឹកជញ្ជូនលើសទម្ងន់កម្រិតកំណត់ នាថ្ងៃចន្ទ ១១កើត ខែកត្តិក ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃ ទី១៥ ខែវិច្ឆិកា ឆ្នាំ២០២១ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានដឹកនាំគណៈប្រតិភូចុះប្រកាសកែសម្រួលសមាសភាពមន្ត្រីប្រចាំការនៅតាមស្ថានីយជញ្ជីងអចល័តខែលជ័យ ខេត្តកំពង់ចាម។ ឯកឧត្តមប្រធានគណៈកម្មាធិការសម្របសម្រួលអចិន្ត្រៃយ៍ បានបញ្ជាក់ថា ការកែសម្រួលមន្រ្តីថ្មីដែលបម្រើការងារក្នុងស្ថានីយជញ្ជីងនេះ គឺមានគោលបំណងផ្លាស់ប្តូរ និងចែករំលែកបទពិសោធន៍ដល់មន្ត្រីថ្មីៗ និងពង្រឹងការអនុវត្តការងាររបស់មន្ត្រីតាមស្ថានីយនីមួយៗឱ្យកាន់តែមានប្រសិទ្ធភាព ដើម្បីបន្តការអនុវត្តច្បាប់យ៉ាងតឹងរ៉ឹងលើបទល្មើសការដឹកជញ្ជូនលើសទម្ងន់កម្រិតកំណត់ ដែលជាមូលហេតុចំបងបណ្តាលឲ្យផ្លូវឆាប់ខូច មុនអាយុកាល និងបង្កគ្រោះថ្នាក់ចរាចរណ៍។ គួរបញ្ជាក់ផងដែរថា កន្លងមកនេះគណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ក៏បានធ្វើការផ្លាស់ប្តូរសមាសភាពមន្រ្តីនៅតាមបណ្តាស្ថានីយមួយចំនួនផងដែរ ។ ជាចុងបញ្ចប់ ឯកឧត្តមប្រធានបានផ្តាំផ្ញើដល់មន្រ្តីទាំងអស់បន្តផ្សព្វផ្សាយ និងអប់រំ ដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តដឹកជញ្ជូនធុនធ្ងន់ និងអ្នកបើកបររថយន្តធុនធ្ងន់បន្ថែមទៀត ឱ្យយល់ដឹងពីបទបញ្ញាត្តិច្បាប់នៃការដឹកជញ្ជូន ជាពិសេសច្បាប់ផ្លូវថ្នល់មាត្រា២៦ និងមាត្រា៦០ និងចូលរួមអនុវត្ត ប្រកបដោយស្មារតីទទួលខុសត្រូវខ្ពស់ទាំងអស់គ្នា។