សម្ដេចតេជោ នាយករដ្ឋមន្ត្រីនៃកម្ពុជា នឹងអញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នៅថ្ងៃទី២៣ ខែវិច្ឆិកាខាងមុខនេះហើយ។ មន្ត្រីជាន់ខ្ពស់ និងអភិបាលខេត្ត បានអញ្ជើញពិនិត្យទីតាំងប្រារព្ធពិធីនេះ។ យោងតាមរដ្ឋបាលខេត្តកំពង់ចាម ឯកឧត្តម យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្រ្តីនៅព្រឹកថ្ងៃទី១២ ខែវិច្ឆិកា ឆ្នាំ២០២១នេះ បានដឹកនាំក្រុមការងារដោយមានការចូលរួមពីឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ជាម ច័ន្ទសោភ័ណ្ឌ អភិបាលខេត្តត្បូងឃ្មុំ រួមនិងមន្ត្រីពាក់ព័ន្ធ រៀបចំទីកន្លែងសម្រាប់សម្ពោធដាក់ឱ្យប្រើប្រាស់ជាផ្លូវការស្ពានមិត្តភាពកម្ពុជា-ចិនស្ទឹងត្រង់-ក្រូចឆ្មារក្រោមអធិបតីសម្ដេចតេជោ ហ៊ុន សែន នាយករដ្ឋមន្ត្រី។ ស្ពានមិត្តភាពកម្ពុជា-ចិន ដែលឆ្លងកាត់ទន្លេមេគង្គនេះ មានប្រវែងសរុប ១១៣១ម៉ែត្រ និងទទឹង ១៣,៥០ម៉ែត្រ ជាប្រភេទស្ពានបេតុង សរសៃដែក។ ស្ពាននេះ ត្រូវបានបើកការដ្ឋានសាងសង់កាលពីថ្ងៃទី៩ ខែកុម្ភៈ ឆ្នាំ២០១៨ ដោយចំណាយថវិកាសរុបជាង ៥៦លានដុល្លារ។ គួរម្លឹកថាស្ពានស្ទឹងត្រង់-ក្រូចឆ្មារ បានបើកការដ្ឋានសាងសង់ចាប់ពីថ្ងៃទី០៩ ខែកុម្ភៈ ឆ្នាំ២០១៨ ប្រើប្រាស់រយៈពេលសាងសង់ចំនួន ៤២ខែ។ បន្ទាប់ពីសាង់សង់រួចនោះសម្តេចតេជោ ហ៊ុន សែន បានអនុញ្ញាតឱ្យបើកដំណើការជាបណ្តោះអាសន្ន ដើម្បីសម្រួលដល់ការធ្វើដំណើររបស់ប្រជាពលរដ្ឋ កាលពីពិធីបុណ្យចូលឆ្នាំខ្មែរកន្លងទៅដើម្បីបញ្ជៀសការកកស្ទះ។ សូមបញ្ជាក់ថា តាមរបាយការណ៍របស់ក្រសួងសាធារណការ និងដឹកជញ្ជូន បានបង្ហាញថា គិតត្រឹមឆ្នាំ២០២០ ប្រទេសកម្ពុជាមានស្ពានធំៗចំនួន ២៣ កន្លែង ដែលកំពុងបម្រើដល់មធ្យោបាយធ្វើដំណើរការ និងដឹកជញ្ជូនប្រចាំថ្ងៃ។ ស្ពានមានប្រវែងៗមានជាអាទិ៍ក្នស្ពានត្សឹបាសា ឬស្ពានអ្នកលឿង, ស្ពានកោះកុង, ស្ពានមេគង្គស្ទឹងត្រែង, ស្ពានគីហ្សូណា, ស្ពានព្រែកតាមាក់, ស្ពានសេកុង, ស្ពានព្រែកព្នៅ, ស្ពានព្រែកក្ដាម ស្ពានកោះពស់, ស្ពានទន្លេបាសាក់តាខ្មៅ ឬស្ពានព្រែកសំរោង, ស្ពានមិត្តភាពកម្ពុជា-ជប៉ុន ស្ពានជ្រោយចង្វាចាស់ ស្ពានមិត្តភាពកម្ពុជា-ចិន ស្ពានជ្រោយចង្វាថ្មី, ស្ពានជ្រៃធំ, ស្ពានកោះធំ,ស្ពានភ្លោះព្រះមុនីវង្សជាដើម។ រាជរដ្ឋាភិបាលកម្ពុជា ដោយមានកូរ៉េខាងត្បូងជាម្ចាស់ជំនួយក៏កំពុងសិក្សាសាងសង់ស្ពានមិត្តភាពកម្ពុជាកូរ៉េ ភ្ជាប់ពីតំបន់ជ្រោយចង្វារាជធានីភ្នំពេញ ឆ្ពោះទៅកាន់ឃុំស្វាយជ្រុំ ស្រុកខ្សាច់កណ្ដាលជាប់នឹងស្រុកល្វាឯមផងដែរ៕