នៅថ្ងៃពុធ ១៣រោច ខែផល្គុន ឆ្នាំរកា នព្វស័ក ព.ស.២៥៦១ត្រូវនឹងថ្ងៃទី១៤ ខែមីនា ឆ្នាំ២០១៨ ឯកឧត្តម ទេសរដ្ឋមន្ត្រី ស៊ុន ចាន់ថុល បានអញ្ជើញអមដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញចូលរួមជាអធិបតីក្នុងពិធីបើកឱ្យប្រើប្រាស់ជា ផ្លូវការស្ពានកោះប៉ែនឆ្លងកាត់ដៃទន្លេ។ ស្ពាននេះមានប្រវែង៧៧៩ម៉ែត្រ និងទទឹង០៩,២០ម៉ែត្រ សាងសង់ឡើងដោយថវិការបស់រាជរដ្ឋា ភិបាលនៃព្រះរាជាណាចក្រកម្ពុជាទាំងស្រុង ដែលមានតម្លៃសរុបប្រមាណជាង ១៣ លាន ដុល្លារ អាមេរិក ជាប្រភេទស្ពានបេតុងសរសៃដែក មានទីតាំងស្ថិតនៅក្នុងភូមិសាស្ត្រទឹកដីកោះកំពង់ត្រុំ ឃុំកោះមិត្ត ស្រុកកំពង់សៀម ត្រើយខាងកើតទន្លេមេគង្គក្នុង និងត្រើយខាងលិចទន្លេមេគង្គក្នុង ស្ថិតនៅសង្កាត់សំបូរមាស ក្រុងកំពង់ចាម។ គម្រោងស្ពាននេះសាងសង់ឡើងដោយកម្លាំងវិស្វកម្មក្រសួងការពារជាតិ សហការជាមួយក្រសួង សាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ ក្រោមការត្រួតពិនិត្យលក្ខណៈបច្ចេក ទេសសាងសង់ដោយក្រសួងសាធារណការ និងដឹកជញ្ជូន ដោយប្រើប្រាស់ធនធាន បច្ចេកទេស ជំនាញរបស់កម្ពុជាសុទ្ធសាធ ដើម្បីសម្រាលបន្ទុកចំណាយប្រចាំថ្ងៃរបស់ប្រជាពលរដ្ឋ និងចូលរួម ចំណែកក្នុងការកាត់បន្ថយភាពក្រីក្រផងដែរ។ ស្ពាននេះ គឺជាសមិទ្ធផលដ៏ធំធេងថ្មីមួយទៀតរបស់រាជរដ្ឋាភិបាលកម្ពុជា ជាសសៃឈាមដ៏សំខាន់មួយសម្រាប់ការតភ្ជាប់ទំនាក់ទំនង និងសម្រួលការធ្វើដំណើររបស់បងប្អូនប្រជាពលរដ្ឋដែលរស់នៅ សងខាងដៃទន្លេបានឆាប់រហ័ស និងអាចតភ្ជាប់មកកាន់ទីប្រជុំជនបានដោយងាយស្រួល ដោយកន្លងមកប្រជាពលរដ្ឋបានធ្វើដំណើរតាមទូកដរ និងប្រដឺសជួបការលំបាក និងចំណាយថ្លៃខ្ពស់។