មេដឹកនាំស្ថាប័នដឹកជញ្ជូនលំដាប់ប្រទេសពីរធំៗពោលគឺ ក្រសួងសាធារណការ និងដឹក​ជញ្ជូន រួមទាំង​ស្ថាប័នឯកជនមួយទៀតគឺ ក្រុមហ៊ុនសេវាកម្មហៅម៉ូតូកង់បី និងឡានតាក់ស៊ី PassApp មានយុទ្ធ​សាស្រ្ត​សម្ងាត់មួយចំណុចប្រហាក់ប្រហែលគ្នា ដោយមេដឹកនាំទាំងពីរ​រូបនេះលួចចេញទៅប្រើសេវាកម្ម​ធ្វើដំ​ណើរ​ដែលស្ថិតក្រោមការគ្រប់គ្រងរបស់ស្ថាប័នខ្លួន ដោយមិនបង្ហាញពីអត្ត​សញ្ញាណពិតដល់អ្នកបើកបរឡើយ។ ឯកឧត្តមទេសរដ្ឋមន្ត្រី ស៊ុន ចាន់ថុល តាមរយៈវីឌីឃ្លីបមួយលើបណ្តាញ​សង្គមហ្វេសប៊ុកកាលពីប៉ុន្មាន​ខែមុននេះ ធ្លាប់បាន​ជិះរថយន្ត​ក្រុង​ក្រុមហ៊ុនឯកជនមួយខ្សែ​ធ្វើដំណើរ​ពីរាជធានីភ្នំពេញទៅខេត្តកំពង់ធំ​មុន​ឡើង​ជិះលោក​បាន​មាន​ប្រសាសន៍ថា​ ”លោកធ្វើដំណើរពីភ្នំពេញទៅកំពង់ធំ គឺដើម្បីសង្កេតមើលថា​តើអ្នកបើកបរមាន​សីលធម៌ត្រឹមត្រូវ ឫអត់ ល្បឿន និងគោរពច្បាប់ចរាចរដែរ ឫទេ?”។ រដ្ឋមន្ត្រីក្រសួងសាធារណការ និងដឹក​​ជញ្ជូនក្នុងឃ្លីបដដែលបន្ថែមថា៖ បន្ទាប់ពីទៅដល់ខេត្តកំពង់ធំ​រួចរាល់លោកនិងសហការី​ បានចុះ​ពិនិត្យ​ការសាងសង់​ដោយផ្ទាល់​ថែមទៀតផង។ ដូចគ្នានេះដែរ CEO PassApp​ លោក តុប និមល បានប្រាប់ Businesss Cambodia ផងដែរថា៖ ក្រៅពី​ធ្វើអោយក្រុមហ៊ុន សេវាកម្ម​ហៅម៉ូតូកង់បី និងឡានតាក់ស៊ីដំណើរការល្អហើយ រឿងមួយទៀត​ដែល​លោក​​​តែងតែត្រួត​ពិនិត្យ​ជា​ប្រចាំនោះគឺ សេវាកម្មដែលផ្តល់ជូនដោយក្រុមហ៊ុន និងការបើកបរ​របស់ម្ចាស់កង់បី និងរថយន្ត​តាក់ស៊ីជ្រកក្រោមស្លាក PassApp​។ ស្ថាបនិករូបនេះ​បានមាន​ប្រសាសន៍បន្ថែមទៀតថា៖ ”PassApp ជាក្រុមហ៊ុនផ្តោតលើសេវាកម្ម ដូច្នេះលោកត្រូវចំណាយពេលស្ទើរ​តែរាល់ថ្ងៃប្រើប្រាស់​សេវាកម្ម​ក្រុមហ៊ុនខ្លួនឯងដោយលាក់មុខ”។ យុទ្ធសាស្រ្តលាក់មុខដ៏មានឥទ្ធិពលមួយនេះ បានធ្វើឲ្យមេដឹកនាំស្ថាប័នឆ្នើមទាំងពីររូបនេះ អាចដឹងគ្រប់បញ្ហា និងភាពខ្វះចន្លោះចំពោះការងារដែលខ្លួនកំពុងគ្រប់គ្រង ជាហេតុផ្តល់ឱកាសឲ្យគាត់អាចដោះស្រាយបញ្ហាផ្សេងៗបានទាន់ពេលវេលា និងកាត់បន្ថយកំហុសដែលបុគ្គលិកថ្នាក់ក្រោម​មិនបានដោះស្រាយ ឫមិនបានយកចិត្តទុកដាក់។ គួរជម្រាបជូនថា និន្នាសេវាកម្ម​ហៅម៉ូតូកង់បី និងឡានតាក់ស៊ីលើ App នៅកម្ពុជាទើបតែបង្ហាញខ្លួន​កាលពី​ឆ្នាំ២០១៧ថ្មីៗនេះទេ ហើយអ្វីដែលពិសេសពីក្រុមហ៊ុនទាំងនេះ​គឺមិនពិបាកតថ្លៃលើការ​ធ្វើដំណើរទៀត​ឡើយ រីឯក្រសួងសាធារណការវិញ ក៏បានងាកមក​ប្រើប្រាស់សេវាកម្មអនឡាញលើការ​ចុះបញ្ជីយានយន្ត និងធ្វើប័ណ្ណបើកបរដោយមិនចាំបាច់សាមីខ្លួនត្រូវមកធ្វើផ្ទាល់ផងដែរ។