(ភ្នំពេញ)៖ ដើម្បីគាំទ្រដល់ការអភិវឌ្ឍន៍ និងការរីកចម្រើនប្រកបដោយនិរន្តភាពនៃអាជីវកម្មរបស់កំពង់ផែស្វយ័តភ្នំពេញ ក្រៅពីគម្រោងអភិវឌ្ឍន៍ទីលាននៅចំណតផែកុងតឺន័រ LM១៧ ក.ស.ភ. បាននិងកំពុងរៀបចំគម្រោងអភិវឌ្ឍន៍ផ្សេងៗទៀត ដូចជា៖ គម្រោងអភិវឌ្ឍន៍ចំណតផែរណបតាមដងទន្លេ ចំនួន ៧ទីតាំង រួមមាន ចំណតផែរណបពហុបំណងកោះរកា (LM២៦), ចំណតផែរណបពហុបំណង TS១១, ចំណតផែរណបពហុបំណង ព្រែកអញ្ចាញ (UM១), ចំណតផែរណបពហុបំណងទន្លេបិទ (UM២), ចំណតផែរណបពហុបំណង ឆ្លូង(ក្រចេះ), ចំណតផែរណបពហុបំណងកំពង់ឆ្នាំង និងចំណតផែរណបពហុបំណងព្រែកក្តាម។ នេះជាការឲ្យដឹងពីឯកឧត្តម ហ៊ឺ បាវី ប្រតិភូរាជរដ្ឋាភិបាលទទួលបន្ទុកប្រធានអគ្គនាយកកំពង់ផែស្វយ័តភ្នំពេញ នៅក្នុងពិធីសម្ពោធដាក់ឲ្យប្រើប្រាស់ជាផ្លូវការហេដ្ឋារចនាសម្ព័ន្ធចំណតផែកុងតឺន័រ LM១៧ ជំហានទី៣ ដំណាក់កាលទី១ របស់កំពង់ផែស្វយ័តភ្នំពេញ នៅថ្ងៃទី២០ ខែកញ្ញានេះ។ ឯកឧត្តម ហ៊ឺ បាវី បានបន្ថែមថា ក្រៅពីនេះ កំពង់ផែស្វយ័តភ្នំពេញ ក៏សហការជាមួយដៃគូវិនិយោគ រួមមាន គម្រោងអភិវឌ្ឍន៍តំបន់សេដ្ឋកិច្ចពិសេស(SEZ), គម្រោងសាងសង់ឃ្លាំងត្រជាក់ (សហការជាមួយ ក្រុមហ៊ុន KCC មកពី សឹង្ហបុរី), គម្រោងអភិវឌ្ឍន៍រោងចក្រកែច្នៃស្រូវអង្ករ (សហការជាមួយ ក្រុមហ៊ុន Green Trade និងក្រុមហ៊ុនមកពីខេត្តហ៊ឺណាន), គម្រោងអភិវឌ្ឍន៍ចំណតផែអ្នកដំណើរ និងទេសចរណ៍អន្តរជាតិ (ដោយក្នុងនោះ ក.ស.ភ. គ្រោងនឹងបំពាក់បន្ថែមប៉ុងតុងចំនួន ៣គ្រឿង និងសាងសង់សាលរង់ចាំកម្ពស់ ៤ជាន់), គម្រោងអភិវឌ្ឍន៍ City Gate របស់ក្រុមហ៊ុន ចៀន ឈឹង ថៃ គ្រុប និងគម្រោងអភិវឌ្ឍន៍ Triumph Commercial Center របស់ក្រុមហ៊ុន យុនណាន សេងម៉ៅ អ៊ុនវ៉េសម៉ិន។ ជាមួយគ្នានេះ អគ្គនាយកកំពង់ផែស្វយ័តភ្នំពេញ បានស្នើសុំការគាំទ្រពីក្រសួងសាធារណការ និងដឹកជញ្ជូន ដូចជា៖ ទី១. គម្រោងអភិវឌ្ឍន៍ចំណតផែរណបពហុបំណងតាមដងទន្លេរបស់ ក.ស.ភ., ទី២. គម្រោងអភិវឌ្ឍន៍ចំណតផែលើកដាក់ទំនិញរាយ និងចាក់ធារ, ទី៣. គម្រោងអភិវឌ្ឍន៍តំបន់សេដ្ឋកិច្ចពិសេស (SEZ) និងស្នើសុំការតភ្ជាប់ពីផ្លូវក្រវាត់ក្រុងទី៣ មកកាន់តំបន់សេដ្ឋកិច្ចពិសេស, ទី៤. ការតភ្ជាប់ផ្លូវរថភ្លើងពីស្ថានីយ៍រថភ្លើង មកកាន់ចំណតផែរណបពហុបំណង TS១១ (គីឡូម៉ែត្រលេខ៦) ទី៥. ជួយសម្របសម្រួលជាមួយភាគីវៀតណាម ដើម្បីអនុវត្តកិច្ចព្រមព្រៀងដឹកជញ្ជូនផ្លូវទឹក និងកិច្ចព្រមព្រៀងទំនិញឆ្លងកាត់ ឱ្យស្របតាមស្មារតី ដែលបានព្រមព្រៀងគ្នា ក្នុងកិច្ចព្រមព្រៀង ដូចជា បញ្ហាការរឹតបន្តឹងការត្រួតពិនិត្យកុងតឺន័រឆ្លងកាត់ បញ្ហាការនាំចេញទំនិញជាកសិផលឆ្លងកាត់ប្រទេសវៀតណាម បញ្ហាការធ្វើបែបបទនាវានៅព្រំប្រទល់ និងបញ្ហាការដាក់ឱ្យដំណើរការការធ្វើបែបបទនាវានៅច្រកទ្វារអន្តរជាតិកោះរកា និង៦. ពិនិត្យលទ្ធភាពកែសម្រួលការយកកម្រៃសេវាការអនុញ្ញាតនាវាចេញ-ចូលផៃ (Entry Permit) ទៅតាមចំណុះផ្ទុករបស់នាវា។ សូមបញ្ជាក់ថា នេះជាលើកទី៣ហើយ ដែលកំពង់ផែស្វយ័តភ្នំពេញ បានជួបជុំគ្នាដើម្បីរៀបចំពិធីសម្ពោធដាក់ឱ្យប្រើប្រាស់នូវហេដ្ឋារចនាសម្ព័ន្ធនៃចំណតផែកុងតឺន័រ LM១៧ របស់កំពង់ផែស្វយ័តភ្នំពេញ ដែលកាលពីលើកទី១ បានរៀបចំឡើងនៅថ្ងៃទី២១ ខែមករា ឆ្នាំ២០១៣ ដែលដាក់ឱ្យប្រើប្រាស់ហេដ្ឋារចនាសម្ព័ន្ធនៃចំណតផែកុងតឺន័រLM១៧ ជំហានទី១ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា , លើកទី២ បានរៀបចំឡើងនៅថ្ងៃទី១៤ ខែធ្នូ ឆ្នាំ២០១៨ ដែលដាក់ឱ្យប្រើប្រាស់ហេដ្ឋារចនាសម្ព័ន្ធនៃចំណតផែកុងតឺន័រ LM១៧ ជំហានទី២ ក្រោមអធិបតីភាពរបស់ ឯកឧត្តម ស៊ុន ចាន់ថុល ទេសរដ្ឋមន្តីរដ្ឋមន្តីក្រសួងសាធារណការ និងដឹកជញ្ជូន និងលើកទី៣ ការសម្ភោធដាក់ឱ្យប្រើប្រាស់ហេដ្ឋារចនាសម្ព័ន្ធនៃ ចំណតផែកុងតឺន័រ LM១៧ ជំហានទី៣ ដំណាក់កាលទី១ នាថ្ងៃនេះ៕