ភ្នំពេញ៖ ប្រធានមន្ទីរសាធារណការរាជធានីភ្នំពេញ បានអះអាងថា ការជន់លិចទឹកនៅក្រោមស្ពានអាកាសចោមចៅ នឹងមិនមានទៀតទេ នៅពេលដែលស្ពាននេះ សាងសងរួចរាល់។ ប្រធានមន្ទីរសាធារណការរាជធានីភ្នំពេញ និងដឹកជញ្ជូនរាជធានីភ្នំពេញលោក សាំ ពិសិដ្ឋ បានបញ្ជាក់ថា ការជន់លិចទឹកនៅក្រោមស្ពានអាកាសចោមចៅនឹងមិនមានទៀតទេនៅពេលស្ពានធ្វើរួច ខណៈការលិចទឹកថ្មីៗនេះដោយសារអាងទឹក២ក្រោមនោះមិនទាន់ដំណើរការ។ លោក លើកឡើង នៅថ្ងៃទី៣ ខែកញ្ញានេះថា «ការជន់លិចទឹកនៅចំណុចផ្លូវក្រោមដីស្ពានអាកាសចោមចៅកាលពីពេលថ្មីៗនេះដោយទឹកភ្លៀងធ្លាក់ខ្លាំងនោះគឺ ដោយសារតែអាងទឹកធំចំនួន ២នៅខាងក្រោមនោះមិនទាន់ធ្វើរួចដែលអាចដំណើរការបាននៅឡើយ ហើយនៅពេលការស្ថាបនាស្ពាននេះរួចរាល់បញ្ហាជន់លិចផ្លូវក្រោមដីនេះនៅពេលមានភ្លៀងខ្លាំងម្តងគឺវានឹងមិនកើតមានទៀតឡើយ»។ លោក សាំ ពិសិដ្ឋ បានបញ្ជាក់ទៀតថា សម្រាប់ការស្ថាបនាស្ពានអាកាស និងផ្លូវក្រោមដីចោមចៅបើគិតមកដល់ត្រឹមថ្ងៃទី ៣ខែកញ្ញានេះ សម្រេចការសាងសង់ បានប្រមាណ ៨០ភាគរយហើយ ខណៈដែលតាមគម្រោងការដ្ឋានសាងសង់នេះ នឹងបញ្ចប់នៅចុងខែមីនា ឆ្នាំ២០២២ខាងមុខនេះ៕