::: កិច្ចប្រជុំ " គម្រោងរៀបចំផែនការមេ បំពាក់សញ្ញាជំនួយនាវាចរណ៍តាមដងទន្លេមេគង្គ ដែលឧបត្ថម្ភថវិកាដោយរដ្ឋាភិបាលកូរ៉េ " នៅថ្ងៃទី១៦ ខែសីហា ឆ្នាំ២០២១ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំស្តីពី " គម្រោងរៀបចំផែនការមេ បំពាក់សញ្ញាជំនួយនាវាចរណ៍តាមដងទន្លេមេគង្គ ដែលឧបត្ថម្ភថវិកាដោយរដ្ឋាភិបាលកូរ៉េ " កិច្ចប្រជុំនេះ ធ្វើនៅ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ដោយមានការអញ្ជើញចូលរួម ពីថ្នាក់ដឹកនាំ និងគ្រប់ក្រុមការងារពាក់ព័ន្ធផងដែរ។ ក្នុងកិច្ចប្រជុំ ក្រុមការងារជំនាញការកូរ៉េ បានធ្វើបទបង្ហាញអំពីការផ្តល់ជំនួយដល់កម្ពុជាលើគម្រោងនាវាចរណ៍ និងបានបង្ហាញអំពីផែនការសកម្មភាពដែលក្រុមការងារនឹងចុះទៅសិក្សាស្វែងយល់ពីទីតាំងភូមិសាស្ត្រតាមដងទន្លេមេគង្គដោយផ្ទាល់ថែមទៀត ដើម្បីសិក្សាលម្អិត នៅតាមគោលដៅដែលត្រូវរៀបចំ បំពាក់នូវសញ្ញាជំនួយនាវាចរណ៍ លើទីតាំងនីមួយៗ ។ ទន្ទឹមនោះ ឯកឧត្តមរដ្ឋលេខាធិការ បានសំណូមពរស្នើទៅកាន់ភាគីកូរ៉េ នៅពេលចុះសិក្សាត្រូវកំណត់ទីតាំងច្បាស់លាស់ និងធានាបានសុវត្ថិភាពដល់នាវាចរណ៍ដែលត្រូវឆ្លងកាត់ ហើយត្រូវឱ្យមានគុណភាពអាចប្រើប្រាស់បានយូរ និងងាយស្រួលក្នុងការថែទាំ ផងដែរ៕