កិច្ចប្រជុំពិភាក្សាសមិទ្ធិលទ្ធភាពបឋម និងផែនការមេនៃទីក្រុងវៃឆ្លាត (Smart City) លើការអភិវឌ្ឍសិក្សាសាងសងប្រព័ន្ធចម្រោះទឹកកខ្វក់ និងអនាម័យក្នុងទីក្រុងសៀមរាប ប៉ែកខាងកើតតាមរយៈប្រព័ន្ធវីដេអូពីចម្ងាយ នៅថ្ងៃពុធ ៤រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៨ ខែកក្កដា ឆ្នាំ២០២១ ឯកឧត្តម កឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំតាមប្រព័ន្ធវីដេអូពីចម្ងាយ ពិភាក្សាលើគម្រោងសិក្សាសាងសង់ប្រព័ន្ធចម្រោះទឹកកខ្វក់ និងអនាម័យ នៃផែនការមេ ទីក្រុងវៃឆ្លាត (Smart City) ក្នុងទីក្រុងសៀមរាប ជាមួយក្រសួងដឹកជញ្ជូនជប៉ុន ដែលមានការចូលរួមពីភ្នាក់ងារសហប្រតិបត្តិការអន្តរជាតិជប៉ុន(JICA) និងភាគីពាក់ព័ន្ធផងដែរ។ អង្គប្រជុំបានពិភាក្សាអំពីវិធីសាស្ត្រ និងស្ថានភាពនៃការគ្រប់គ្រងទឹកកខ្វក់ និងអនាម័យ ដែលមានភាពចាំបាច់ក្នុងតម្រូវការបច្ចុប្បន្ន ដោយស្របទៅតាមគោលការណ៍អភិវឌ្ឍឥតឈប់ឈររបស់រាជរដ្ឋាភិបាលកម្ពុជា និងភាពរីកចម្រើនសព្វថ្ងៃ ហើយត្រូវសិក្សាធ្វើយ៉ាងណាឱ្យមានភាពប្រសើរឡើងថែមទៀតក្នុងការគ្រប់គ្រង អភិវឌ្ឍ សាងសង់ សម្រាប់តំបន់ដែលកំពុងអភិវឌ្ឍខ្លាំង ក៏ដូចជានៅទូទាំងប្រទេសនាពេលអនាគត។ ជាមួយនោះដែរ ឯកឧត្តមអនុរដ្ឋលេខាធិការ បានគូសបញ្ជាក់នូវការប្តេជ្ញាចិត្ត ក្នុងការរីករាយសហការ ចំពោះគ្រប់ដៃគូអភិវឌ្ឍន៍ ដែលក្នុងនោះរួមទាំងខាងក្រសួងដឹកជញ្ជូនជប៉ុន និងទីភ្នាក់ងារសហប្រតិបត្តិការអន្តរជាតិជប៉ុន(JICA) ដែលតែងជួយធ្វើឱ្យប្រសើរឡើង លើកកម្ពស់ការគ្រប់គ្រងទឹកកខ្វក់ និងអនាម័យ ឱ្យកាន់តែមានប្រសិទ្ធភាព និរន្តរភាព និងផ្តល់កិច្ចសហការគ្នាបានយ៉ាងល្អប្រសើរនាពេលកន្លងមក ផងដែរ។