ថ្ងៃអង្គារ ០៤កើត ខែទុតិយាសាឍ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី១៣ ខែកក្កដា ឆ្នាំ២០២១ នៅទីស្តីការក្រសួង ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ការពិនិត្យលើប្លង់ស្ថាបត្យកម្មផ្លូវ ការងារផ្ទៀងផ្ទាត់បរិមាណខឿន និងកម្រាលក្រានីតផ្លូវថ្នើរជើង ក្នុងគម្រោងស្ថាបនាហេដ្ឋារចនាសម្ព័ន្ធផ្លូវ ចំនួន ៣៨ខ្សែ នៅក្រុងសៀមរាប ខេត្តសៀមរាប តាមប្រព័ន្ធវីដេអូពីចម្ងាយ (Zoom Meeting) ដោយមានការចូលរួមពី ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស លោកអគ្គនាយករង លោកប្រធាននាយកដ្ឋានត្រួតពិនិត្យបច្ចេកទេសគម្រោង អង្គភាពអនុវត្តគម្រោង ជាមួយ ឯកឧត្តម លី រស្មី រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ ព្រមទាំងក្រុមការងារបច្ចេកទេសពាក់ព័ន្ធទាំងពីរក្រសួងផងដែរ។ អង្គប្រជុំបានពិនិត្យ និងពិភាក្សាអំពីការងារបច្ចេកទេសក្នុងការរៀបចំចិញ្ចើម រួមមានការងាររៀបខឿនចិញ្ចើមផ្លូវ ការងាររៀបចំកម្រាលផ្លូវថ្មើរជើង ការងារដំឡើងបរិក្ខារផ្លូវថ្នល់ ការងារកំណត់ទីតាំងដាំដើមឈើ ក៏ដូចជាបានពិភាក្សាលើសំណូមពរ និងដំណោះស្រាយរបស់អង្គភាពអនុវត្តគម្រោង ព្រមទាំងការងារបច្ចេកទេសមួយចំនួនទៀត៕