របាយការណ៍របស់ក្រសួងសាធារណការបានឲ្យដឹងថាការសាងសង់កំពង់​ផែ​សមុទ្រ​ខេត្តកំពតនៅជិតក្រុងកំពតមានសភាពយឺតយ៉ាវ ដោយសារការពន្យារពេលលើកទីពីរដែលបណ្តាលមកពីជំងឺរាតត្បាត។ របាយការណ៍ដែលទទួលបានដោយកាសែតខ្មែរថាមស៍កាលពីម្សិលមិញបានបញ្ជាក់ថាការស្ថាបនាបច្ចុប្បន្នបានបញ្ចប់ ៧៤ ភាគរយហើយ។ ដើមឡើយគម្រោងនេះគ្រោងនឹងបញ្ចប់ និងដាក់ឲ្យដំណើរការនៅចុងឆ្នាំ ២០២០ ។ របាយការណ៍បន្តថាថ្ងៃផុតកំណត់នៃការបញ្ចប់ត្រូវបានកំណត់ឡើងវិញនៅខែមិថុនាឆ្នាំនេះ។ ដោយសារតែការរីករាលដាលនៃជំងឺរាតត្បាត កាលកំណត់នេះក៏ត្រូវបានកំណត់ឡើងវិញម្តងទៀត​ ដោយពេលនេះគឺគ្រោងដល់ឆ្នាំ ២០២២ ។ របាយការណ៍បានបញ្ជាក់ទៀតថាដោយរដូវវស្សាបានមកដល់។ ខេត្តកំពតដែលជាខេត្តដែលជាប់ឆ្នេរសមុទ្របានទទួលរង និងប្រឈមនូវព្យុះ និងភ្លៀងធ្លាក់ខ្លាំង។ លោក​ វ៉ា ស៊ីមសូរិយា អ្នកនាំពាក្យក្រសួងបានប្រាប់កាសែតខ្មែរថាមស៍ថាកត្តាចំបងដែលគម្រោងមិនអាចឈានដល់គោលដៅបញ្ចប់បាន គឺដោយសារកង្វះកម្មករនៅការដ្ឋានសំណង់។ លោកនិយាយថា៖ «នៅក្នុងបរិបទដែលមានជំងឺរាតត្បាត សំណង់មានសភាពយឺតយ៉ាវជាងការគ្រោងទុកគឺដោយសារតែកម្មករត្រូវបានកាត់បន្ថយ ហើយនេះបានបណ្តាលឲ្យមានការពន្យាម្តងទៀតដល់គម្រោង»។ គម្រោងនេះកំពុងត្រូវបានសាងសង់លើផ្ទៃដី ៤ ហិកតាស្ថិតក្នុងស្រុកទឹកឈូដែលមានចម្ងាយប្រមាណ ៦ គីឡូម៉ែត្រពីភាគខាងត្បូងនៃទីក្រុងកំពត។ ដើមឡើយហិរញ្ញប្បទាននេះមានប្រាក់កំចីចំនួន ៨ លានដុល្លារដែលត្រូវបានផ្តល់ដោយធនាគារអភិវឌ្ឍន៍អាស៊ី។ ប្រាក់កម្ចីនោះត្រូវបានកើនឡើងដល់ ៩ លានដុល្លារជាលទ្ធផលនៃការកែលម្អហេដ្ឋារចនាសម្ព័ន្ធបន្ថែមដល់កំពង់ផែ។ នៅពេលសាងសង់រួចរាល់ កំពង់ផែអាចនឹង​ផ្ទុកអ្នកដំណើរចាប់ពី ៣០០ ទៅ ៤០០ នាក់និងធ្វើជាច្រកសម្រាប់នាវាទេសចរណ៍ដែលតភ្ជាប់ពីថៃនិងវៀតណាមទៅកំពត ក៏ដូចជាអាចធ្វើជាឧទាហរណ៍នៃគម្រោងអភិវឌ្ឍន៍ហេដ្ឋារចនាសម្ព័ន្ធ ដែលជាកំណើនប្រកបដោយចីរភាពនៅក្នុងតំបន់​មេគង្គ។