(ភ្នំពេញ)៖ ប្រភពព័ត៌មានរបស់ក្រសួងសាធារណការ និងដឹកជញ្ជូន បានឱ្យដឹងថា គម្រោងជួសជុលផ្លូវជាតិលេខ៣ដែលជាហិរញ្ញប្បទានសម្បទានរបស់រដ្ឋាភិបាលចិន សម្រេចបាន៩៨.០៤% នឹងធ្វើការត្រួតពិនិត្យលើកដំបូងនាពាក់កណ្ដាលខែកក្កដាខាងមុខនេះ។ គម្រោងខាងលើនេះត្រូវបានចាប់ផ្តើមដំណើរការសាងសង់កាលពីខែតុលាឆ្នាំ២០១៨ ដែលមានប្រវែងសរុបជិត១៣៥គីឡូម៉ែត។ ស្ថានទូតចិនប្រចាំកម្ពុជា បានបង្ហោះលើទំព័រហ្វេសប៊ុកនៅថ្ងៃទី១ ខែមិថុនាថា បន្ទាប់ពីបញ្ចប់គម្រោងខាងលើនេះ ចំណាយពេលតែ​១ម៉ោង​៤០​នាទី​តែប៉ុណ្ណោះ សម្រាប់ការធ្វើដំណើរពីរាជធានីភ្នំពេញទៅកាន់ខេត្តមួយចំនួនក្នុងប្រទេសកម្ពុជាដែលជាប់ឆ្នេរសមុទ្រ។ សូមបញ្ជាក់ថា គម្រោងពង្រីក និងលើកកម្រិតផ្លូវជាតិលេខ៣ ពីភ្នំពេញទៅក្រុងកំពត ដែលមាន ប្រវែងសរុប១៣៤,៧៩៦ គីឡូម៉ែត្រ ដោយមួយកំណាត់ពីចោមចៅ (ភ្នំពេញ) ទៅបែកគុសប្រវែង៧០ គីឡូម៉ែត្រ ត្រូវបានពង្រីកទទឹងតួផ្លូវរហូតដល់២៤,៥ម៉ែត្រ និងមួយកំណាត់ទៀតពីបែកគុសទៅក្រុងកំពត ប្រវែងជិត៦៥គីឡូម៉ែត្រ ពង្រីកទទឹងតួផ្លូវ ១២ ម៉ែត្រ ចែកជា២គន្លង។ គម្រោងនេះចំណាយថវិកា សរុបប្រមាណ ២១៩ ៩១១ ០០០ដុល្លារអាមេរិក ជាហិរញ្ញប្បទានសម្បទានពីសាធារណរដ្ឋ ប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សាងសង់ដោយក្រុមហ៊ុន សាជីវកម្មស្ពាន និងថ្នល់ចិន (China Road and Bridge Corporation) ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន (Guangzhou Wanan Construction Supervision Co., Ltd) ប្រើប្រាស់រយៈពេលសាងសង់ ៤៨ខែ៕