ថ្មីៗនេះ មន្រ្តីជាន់ខ្ពស់របស់ក្រសួងសាធារណការ និងដឹកជញ្ជូន បានស្នើទៅអ្នកបច្ចេកទេសជប៉ុន ឱ្យរៀបចំផែនការមេ ដើម្បីគ្រប់គ្រងទឹកកខ្វក់នៅរាជធានីភ្នំពេញ ឱ្យមានមានប្រសិទ្ធភាពជាងមុន នៅក្នុងកិច្ចប្រជុំក្រុមការងារ Working Group លើកទី២៤ ក្នុងគម្រោងអភិវឌ្ឍន៍សមត្ថភាពសម្រាប់ការងារគ្រប់ គ្រងទឹកកខ្វក់ ។ នេះបើយោងតាមការចុះផ្សាយនៅលើផេកហ្វេសប៊ុករបស់ ក្រសួងសាធារណការ និងដឹកជញ្ជូន ។ ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគ្រប់គ្រងនិងសម្របសម្រួល បានមានប្រសាសន៍ថា ក្រសួងបាននឹងកំពុងពិភាក្សាគ្នាជាមួយអ្នកបច្ចេកទេសរបស់ជប៉ុន ដើម្បីជួយរៀបចំផែនការមេគ្រប់គ្រងទឹកកង្វក់នៅរាជធានីភ្នំពេញ ឱ្យកាន់តែមានប្រសិទ្ធភាពជាងមុន ។ ក្នុងអង្គប្រជុំបានជជែកពិភាក្សា និងស្វែងរកដំណោះស្រាយជាមួយក្រុមការងារបច្ចេកទេសក្នុងការធ្វើ ឱ្យប្រសើរឡើងនូវប្រព័ន្ធលូបង្ហូរទឹកកខ្វក់ ដើម្បីបង្កើតផែនការសកម្មភាពឱ្យបានទូលំទូលាយ និងពិនិត្យមើលភាពងាយស្រួលនៃការតភ្ជាប់ប្រព័ន្ធលូបង្ហូរទឹកកខ្វក់ ដើម្បីកំណត់ពីស្ថានភាពលំហូរទឹកឱ្យបានច្បាស់លាស់ សំដៅធានាឱ្យបាននូវបរិស្ថានស្អាត និងសុខភាព អនាម័យសាធារណៈ និងលើកកម្ពស់ជីវភាពរស់របស់ប្រជាពលរដ្ឋឱ្យកាន់តែប្រសើរឡើង ។ ទន្ទឹមនឹងនេះ ក្រសួងសាធារណការ​ និងដឹកជញ្ជូន បានជម្រុញលើកទឹកចិត្តក្រុមការងារបច្ចេកទេសនៃទីភ្នាក់ងារសហប្រតិបត្តិការអន្តរជាតិជប៉ុនរៀបចំផែនការមេឱ្យបានច្បាស់លាស់ និងប្រើប្រាស់យន្តការសិក្សាស៊ីជម្រៅ ស្របតាមទិសដៅ និងគោលនយោបាយរបស់រាជរដ្ឋាភិបាល ដើម្បីសម្រេចឱ្យបាននូវការគ្រប់គ្រងទឹកកខ្វក់ឱ្យមានប្រសិទ្ធភាព និងប្រកបដោយការទទួលខុសត្រូវខ្ពស់ ៕