[Koh Santepheap] - ក្រសួងសាធារណការបង្ហាញពីវឌ្ឍនភាពក្នុងការអភិវឌ្ឍហេដ្ឋារចនាសម្ព័ន្ធក្នុងវិបត្តិកូវីដ១៩
2021-05-19
ទៅកាន់ទំព័រចុះផ្សាយក្នុង Koh Santepheap
រាជធានីភ្នំពេញ៖ ទោះស្ថិតនៅក្នុងវិបត្តិនៃជំងឺកូវីដ១៩ក្នុងប្រទេសយ៉ាងណាក្ដី ការអភិវឌ្ឍហេដ្ឋានរចនាសម្ព័ន្ធនៅតែបន្តជាដរាប ដោយមិនមានគម្រោងណាផ្អាកសាងសង់ព្រោះតែវិបត្តិនោះទេ ជាក់ស្ដែងយោងតាមការបង្ហាញរបស់ក្រសួងសាធារណការនិងដឹកជញ្ជូនបានបង្ហាញពីវឌ្ឍនភាព នៃការអភិវឌ្ឍហេដ្ឋារចនាសម្ព័ន្ធតភ្ជាប់ពីខេត្តទៅមួយខេត្តនិងសម្រេចបានលទ្ធភាពល្អប្រសើរជាពិសេសនៅក្នុងវិបត្តិនៃការឆ្លងរាលដាលក្នុងសហគមន៍នេះ ។
តាមសេចក្តីប្រកាសព័ត៌មានរបស់ក្រសួងសាធារណការនិងដឹកជញញជូនកាលពីពេលថ្មីៗនេះឱ្យដឹងថា គម្រោងសាងសង់ផ្លូវជាតិលេខ១០ (បាត់ដំបង – ពោធិ៍សាត់ – កោះកុង)រហូតមកដល់ពេលនេះសម្រេចបាន៤៨,៧៧%ហើយ ហើយក៏កំពុងបន្តអភិវឌ្ឍបន្តទៀតទោះស្ថិតនៅក្នុងដំណាក់កាលនៃការឆ្លងរីករាលដាលនៃជំងឺកូវីដ១៩យ៉ាងនេះក្ដី ។
លោក បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងផ្លូវជាតិលេខ១០ ផ្លូវជាតិលេខ១០មានប្រវែង ១៩៧,៣៦ គីឡូម៉ែត្រ លាតសន្ធឹងកាត់ស្រុកសំឡូត ខេត្តបាត់ដំបង ពោធិ៍សាត់ រហូតដល់ខេត្តកោះកុង ហើយផ្លូវនេះមិនត្រឹមតែផ្តល់អត្ថប្រយោជន៍ក្នុងការធ្វើដំណើរឆ្លងកាត់ប៉ុណ្ណោះទេ ប៉ុន្តែវាអាចជាផ្នែកមួយទាក់ទាញអ្នកទេសចរណ៍ដែលចូលចិត្តធ្វើដំណើរកម្សាន្ត អាចគយគន់ធម្មជាតិដ៏ស្រស់ត្រកាល ដោយសារផ្លូវនេះមានតំបន់ធម្មជាតិជាច្រើន ជាពិសេសព្រៃឈើ ក្រាស់ៗយ៉ាងស្រស់ស្អាត។
លោក បានជំរុញឱ្យក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស បន្តយកចិត្តទុកដាក់លើកិច្ចការងារសាងសង់ប្រកបដោយការទទួលខុសត្រូវខ្ពស់ និងស្រប តាមស្តង់ដារបច្ចេកទេសត្រឹមត្រូវដើម្បីធានាការប្រើប្រាស់បានយូរអង្វែង និងចូលរួមអនុវត្តឱ្យបាននូវវិធានការរបស់រាជរដ្ឋាភិបាល ៣កុំ ៣ការពារ ទាំងអស់គ្នាដើម្បីបញ្ជៀសការឆ្លងជម្ងឺកូវីដ-១៩ ។
បើតាមអ្នកនាំពាក្យនៃក្រសួងសាធារណការនិងដឹកជញ្ជូន លោកវ៉ាស៊ឹម សូរិយា ធ្លាប់បានលើកឡើងថា គម្រោងអភិវឌ្ឍន៍ ហេដ្ឋារចនាសម្ព័ន្ធធំៗ នៅកម្ពុជានឹងមិនមានការផ្អាកដោយសារតែវិបត្តិកូវីដ១៩នោះទេ ព្រោះគម្រោងទាំងនោះបានអនុម័តថវិកាជាតិរួចហើយ ជាក់ស្ដែងដូចជាគម្រោងផ្លូវល្បឿនលឿនភ្នំពេញ ក្រុងព្រះសីហនុក៏នៅតែបន្តអភិវឌ្ឍសាងសង់ជាប់ជានិច្ច ដោយមិនបានផ្អាកការងាររបស់ក្រុមជំនាញឡើយ ដូច្នេះគម្រោងនេះ អាចនឹងបញ្ចប់ទៅតាមផែនការ ហើយគម្រោងផ្លូវផ្សេងទៀតដូចជាគម្រោងផ្លូវជាតិលេខ៣ក៏រំពឹងថានឹងរួចរាល់មុនផែនការផងដែរ ៕
