ខេត្តព្រះវិហារ៖ សមត្ថកិច្ចជំនាញខេត្តព្រះវិហារ កាលពីយប់ ថ្ងៃទី២១ ខែកុម្ភៈ ឆ្នាំ២០១៨ ម្សិលមិញ បានបើកប្រតិបត្តិការ ឃាត់រថយន្តដែលកែច្នៃ និងដឹកខុសលក្ខណៈបច្ចេកទេស តាមគោលដៅនានាទូទាំងខេត្ត ដោយបានត្រួតពិនិត្យរថយន្ត ជិត២០០គ្រឿង ដោយរកឃើញរថយន្តដឹកសំពីងសំពោងចំនួន ២៨គ្រឿង រថយន្តតទ្រុងកែច្នៃខុសបច្ចេកទេសចំនួន ៣គ្រឿង និងរថយន្តដឹកលើសទម្ងន់ ១គ្រឿងផងដែរ។ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឲ្យដឹងថា ការចុះត្រួតពិនិត្យរថយន្តកែច្នៃ ខុសលក្ខណៈបច្ចេកទេស និងដឹកលើសទម្ងន់ជិត២០០គ្រឿង ក្នុងបានឃាត់រថយន្តកែខុសលក្ខណៈបច្ចេកទេសចំនួន ៣គ្រឿង ព្រមទាំងកាត់ទ្រុងចោលនៅនឹងកន្លែងផងដែរ ក្នុងនោះរថយន្ត១គ្រឿងកែច្នៃខុសលក្ខណះបច្ចេកទេស និងដឹក លើសទម្ងន់(ដឹកថ្ម)រហូត ១៧តោន។ លោកថា ក្រុមការងារការបានធ្វើការពិន័យលើរថយន្តដែលដឹកលើសទម្ងន់នេះ ក្នុងមួយតោន៣០ម៉ឺនរៀល ស្មើនឹង ៥,២៤៤,០០០រៀល បង់ចូលរដ្ឋ ក្រៅពីនោះឲ្យរើទម្ងន់ដែលលើសទម្លាក់ចុះ និងកាត់ទ្រុងដែលកែច្នៃខុសបច្ចេកទេសចេញ ទើបអនុញ្ញាតិឲ្ទៅមុខទៀតបន្ត។ លោក សំ លាងទ្រី បញ្ជាក់ថា កន្លងមកក្រុមការងារមិនចង់ធ្វើការពិន័យរថយន្តនោះទេ តែដោយសារក្រុមហ៊ុនដឹកថ្មនេះ បានធ្វើការអប់រំជាច្រើនដងមកហើយ ថែមទាំងធ្លាប់ធ្វើកិច្ចសន្យាទៀត តែគេមិនអនុវត្តតាម ទើបក្រុមការងារយើងសម្រេច ចិត្តអនុវត្តទៅតាមច្បាប់តែម្តង។ លោកថា រហូតមកដល់ពេលនេះ ក្នុងទឹកដីខេត្តព្រះវិហារ ឲ្យតែមានរថយន្ត តទ្រុងខុស លក្ខណៈបច្ចេកទេស និងដឹកលើស ទម្ងន់ គឺក្រុមការងារនឹងបន្តអនុវត្តចាប់ឃាត់ និងកាត់ទ្រុងនៅនិងកន្លែង ដោយមិនមាន ការលើកលែងនោះឡើយ៕