ភ្នំពេញ ថ្ងៃទី០៥ ខែ​មីនា ឆ្នាំ​២០២១ -- លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាលើនីតិវិធីនៃការជ្រើសរើសសាស្ត្រាចារ្យបង្រៀន នៅវិទ្យាស្ថានតេជោសែន សាធារណការ និងដឹកជញ្ជូន ផ្នែកដឹកជញ្ជូន និងភ័ស្តុភារកម្ម តាមរយៈប្រព័ន្ធវីដេអូពីចម្ងាយ កាលពី​ថ្ងៃ៦រោច ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃព្រហស្បតិ៍ ទី០៤ ខែមីនា ឆ្នាំ២០២១ នៅទីស្តីការក្រសួងសាធារណការ ដើម្បីស្វែងរកគ្រូមានចំណេះដឹង និងពិសោធន៍ពិតប្រាកដ ដែលអាចផ្តល់ចំណេះដឹងដល់ធនធានមនុស្សជំនាន់ក្រោយ និង​ជួបពិភាក្សាជាមួយគ្រូបង្រៀន ជាមន្ត្រីរាជការក្នុងក្រសួងចំនួនប្រាំពីររូបដែលមានបំណងចូលបង្រៀននៅក្នុងវិទ្យាស្ថាននេះផងដែរ។ នៅក្នុង​ឱកាសនោះ លោកជំទាវរដ្ឋលេខាធិការ បានមាន​ប្រសាសន៍កោតសរសើរ ចំពោះការខិតខំប្រឹងប្រែង បំពេញការងាររហូតសម្រេចបានលទ្ធផលដ៏ល្អប្រសើរ របស់គណៈកម្មការរៀបចំការប្រឡងសិស្សដែលបានដាក់ពាក្យសុំប្រឡង នៅវិទ្យាស្ថានតេជោសែនសាធារណការ និងដឹកជញ្ជូន នៃក្រសួងសាធារណការ និងដឹកជញ្ជូន។ លោកជំទាវ​បាន​គូសបញ្ជាក់ថា គណៈកម្មការរៀបចំការប្រឡងនឹងប្រកាសផ្សព្វផ្សាយលទ្ធផលសិស្ស ដែលបានប្រឡងជាប់ជាស្ថាពរចំនួន២០០នាក់ និងសិស្សជាប់បម្រុងចំនួន៥៧នាក់ នៅថ្ងៃទី០៥ ខែមីនា ឆ្នាំ២០២១ ដើម្បីផ្ដល់លទ្ធភាពឱ្យសិស្សដែលបានប្រឡងជាប់ទាំងអស់ អាចធ្វើការចុះឈ្មោះចូលរៀនជាផ្លូវការបានទាន់ពេលវេលា បន្ទាប់ពីធ្វើការផ្សព្វផ្សាយលទ្ធផលរួច។ ជាមួយគ្នានេះដែរ លោកជំទាវបានមាន​ប្រសាសន៍បន្ថែមទៀតថា បន្ទាប់ពីការប្រកាសផ្សព្វផ្សាយលទ្ធផលសិស្សដែលបានប្រឡងជាប់រួចហើយ គណៈកម្មការនឹងធ្វើការរៀបចំប្រឡងជ្រើសរើសគ្រូ និងបានស្នើសុំឱ្យគ្រូដែលជាមន្ត្រីរាជការនៅក្នុងក្រសួង ផ្តល់ប្រវត្តិរូបរបស់ខ្លួនឱ្យបានមុនថ្ងៃទី០៧ ខែមីនា ឆ្នាំ២០២១ ដើម្បីគណៈកម្មការអាចពិនិត្យទៅលើសញ្ញាបត្រ ចំណេះដឹង ជំនាញ និងបទពិសោធន៍ និង​ជូនដំណឹងទៅក្រសួងអប់រំ យុវជន និងកីឡា ស្របតាមលក្ខខណ្ឌតម្រូវរបស់ក្រសួងអប់រំផងដែរ។ ទន្ទឹមនឹងនេះ លោកជំទាវរដ្ឋលេខាធិការ បានថ្លែងអំណរគុណចំពោះ​គ្រូជាមន្ត្រីរាជការនៅក្នុងក្រសួង ដែលមានទឹកចិត្តចូលរួមចំណែក ក្នុងការបណ្ដុះបណ្ដាលធនធានមនុស្សថ្មី ឱ្យទទួលបានចំណេះដឹងថែមទៀតនៅក្នុងវិទ្យាស្ថានថ្មីនេះ ក៏ដូចជាដើម្បីផ្តល់ចំណេះដឹង និងជំនាញច្បាស់លាស់ដល់ពួកគាត់ ដែលអាចឆ្លើយតបទៅនឹងតម្រូវការទីផ្សារការងារបច្ចុប្បន្ន និងនាពេលអនាគតផងដែរ។ សូមបញ្ជាក់ថា ក្រោយពីការប្រឡងជ្រើសរើសគ្រូរួចរាល់ហើយ គណៈកម្មការនឹងរៀប ចំពិធីសំណេះសំណាលរវាងសិស្សដែលបានប្រឡងជាប់ ជាមួយនឹងគ្រូ ដែលបានជ្រើសរើស ក្រោមអធិបតីភាពដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១៩ ខែមីនា ឆ្នាំ២០២១ បើគ្មានការប្រែប្រួល ហើយកម្មវិធីសំណេះ សំណាលនេះនឹងមានការណែនាំផងដែរ អំពីបទបញ្ជាផ្ទៃក្នុងនៃវិទ្យាស្ថានតេជោសែន សាធារណការ និងដឹកជញ្ជូន ទាក់ទងនឹងការអនុវត្តផ្សេងៗ៕