[BTV] - រដ្ឋមន្ត្រីសាធារណការ ស្នើឱ្យក្រុមហ៊ុនកសាងផ្លូវជាតិលេខ២ ស្រោចទឹកលើដងផ្លូវកុំឱ្យហុយ
2021-02-19
ទៅកាន់ទំព័រចុះផ្សាយក្នុង BTV
ភ្នំពេញ៖ ដើម្បីជាប្រយោជន៍ដល់អ្នកធ្វើដំណើរ និងអ្នករស់នៅក្នុងតាមបណ្តោយផ្លូវជាតិលេខ២ដែលកំពុងស្តារ និងសាងសង់ ឯកឧត្តម ស៊ុន ចាន់ថុលរដ្ឋមន្ត្រីក្រសួងសាធារការ និងដឹកជញ្ជូន បានស្នើដល់ក្រុមហ៊ុនម៉ៅការសាងសង់ផ្លូវជាតិលេខ២ ត្រូវធ្វើផ្លូវប្រកបដោយគុណភាព និងជាពិសេសត្រូវមានរថយន្តស្រោចទឹកលើដងផ្លូវ។
ឯកឧត្ដម ស៊ុន ចាន់ថុលទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១៩ ខែកុម្ភៈនេះ បានដឹកនាំគណៈប្រតិភូក្រសួង អញ្ជើញចុះពិនិត្យគុណភាពនៃ ការសាងសង់ផ្លូវជាតិលេខ២ និងផ្លូវជាតិលេខ២២ ដោយមានការចូលរួមពីក្រុមការងារបច្ចេកទេសក្រសួង តំណាងក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស និងភាគីពាក់ព័ន្ធមួយចំនួនទៀតផងដែរ។
នៅក្នុងឱកាស ឯកឧត្ដមមានប្រសាសន៍ប្រាប់អ្នកសារព័ត៌មានថា គិតត្រឹមថ្ងៃទី១៩ ខែកុម្ភៈនេះ ការសាងសងផ្លូវជាតិ២ សម្រេចបានក្នុងរង្វង់២៧ភាគរយ យឺតជាងផែនការដែលព្រមព្រៀងគ្នារវាងក្រសួងសាធារណការ និងក្រុមម៉ៅការផ្លូវ។ លើសពីនេះ ឯកឧត្តម ស៊ុន ចាន់ថុល បានស្នើដល់ក្រុមហ៊ុនម៉ៅការ សាងសង់ផ្លូវជាតិលេខ២ ត្រូវធ្វើផ្លូវប្រកបដោយគុណភាព និងជាពិសេសត្រូវមានរថយន្តស្រោចទឹកលើដងផ្លូវ គោរពទៅតាមកិច្ចសន្យា។
គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ២ និងផ្លូវជាតិលេខ២២ បានបើកការដ្ឋានសាងសង់ នៅថ្ងៃទី១១ ខែកុម្ភៈ ឆ្នាំ២០២០ ក្រោមអធិបតីភាពសម្តេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា។គម្រោងផ្លូវនេះ ត្រូវចំណាយថវិកាប្រមាណ៥៦,១លានដុល្លាសហរដ្ឋអាមេរិក ដែលជាហិរញ្ញប្បទានពីរដ្ឋាភិបាលនៃសាធារណរដ្ឋកូរ៉េខាងត្បូង និងថវិកាបដិភាគរបស់រាជរដ្ឋាភិបាលកម្ពុជា។ហើយគ្រោងបញ្ចាប់ការសាងសង់នៅអំឡុងខែមេសា ឆ្នាំ២០២២។
ការសាងសង់ផ្លូវជាតិលេខ២ និងផ្លូវជាតិលេខ២២ មានប្រវែងសរុបជាង៧២គីឡូម៉ែត្រ ដែលចាប់ពីរង្វង់មូលតាខ្មៅ ដល់អូរចំបក់ មានប្រវែង ៦២,៥៦ គីឡូម៉ែត្រ និងផ្លូវជាតិលេខ២២ ពីអូរចំបក់ ដល់ អង្គតាសោម មានប្រវែង ៩,៦១គីឡូម៉ែត្រ ស្ថិតក្នុងភូមិសាស្ត្រ ខេត្តតាកែវ៕
