សិក្ខាសាលាផ្សព្វផ្សាយ ស្តីពី “នីតិវិធីនៃការគ្រប់គ្រងហិរញ្ញវត្ថុនៅក្នុងគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ” នៃគម្រោងCMU-2 ក្រោមហិរញ្ញប្បទានឥណទានធនាគារពិភពលោក នៅថ្ងៃចន្ទ ១១កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែកុម្ភៈ ឆ្នាំ២០២១ លោក ចៅ សុភៈភិបាល អគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាង ឯកឧត្តម សំរ៉ងឌី ណាម៉ូ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានចូលរួមជាអធិបតីភាពបើកកម្មវិធីសិក្ខាសាលាផ្សព្វផ្សាយ ស្តីពី “នីតិវិធីនៃការគ្រប់គ្រងហិរញ្ញវត្ថុនៅក្នុងគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ” ដល់អង្គភាពគ្រប់គ្រងគម្រោង CMU-2 ក្រោមហិរញ្ញប្បទានឥណទានរបស់ធនាគារពិភពលោក បានរៀបចំឡើងក្នុង ខេត្តសៀមរាប ដោយមានការចូលរួមជាគ្រូបង្កោល ផ្តល់នូវបទបង្ហាញ ពីតំណាងធានាគារពិភពលោក ផងដែរ។ សិក្ខាសាលានាថ្ងៃនេះ មានគោលបំណងដើម្បីផ្សព្វផ្សាយខ្លឹមសារនៃនីតិវិធីនៃការគ្រប់គ្រងហិរញ្ញវត្ថុ សម្រាប់សមាសភាគទី២ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ដល់ក្រុមការងារហិរញ្ញវត្ថុ មន្រ្តីគម្រោង និងទីប្រឹក្សា ស្តីពីនីតិវិធី និងគោលការណ៍នៃការរៀបចំ និងការគ្រប់គ្រងផ្នែកហិរញ្ញវត្ថុរបស់គម្រោង។ និងឈានដល់ការអនុវត្តគម្រោងមានប្រសិទ្ធភាព ដោយអនុលោមទៅតាមនីតិវិធី លើការគ្រប់គ្រង រៀបចំ និងតាមដានការអនុវត្តគម្រោងហិរញ្ញប្បទានពីដៃគូអភិវឌ្ឍន៍ជាមួយក្រសួងសាធារណការ និងដឹកជញ្ជូន។ ទន្ទឹមនោះ លោក បានកើនរំឮកដល់អង្គសិក្ខាសាលាទាំងមូល ត្រូវចូលរួមថែរក្សាសុខភាព និងប្រកាន់ខ្ជាប់អនាម័យគ្រប់ពេល និងត្រូវគោរពតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ នូវវិធានការទប់ស្កាត់ការពារ កូវីដ១៩ “ ៣ការពារ ៣កុំ ” គឺ៖ - ៣ការពារ ៖ ១: ពាក់ម៉ាស់ , ២: លាងដៃ , ៣: គម្លាតសង្គម គម្លាតបុគ្គល (ចាប់ពី១,៥ម៉ែត្រឡើងទៅ) - ៣កុំ ៖ ១: កុំចូលទៅកន្លែងបិទជិតគ្មានខ្យល់ចេញចូល និងម៉ាស៊ីនត្រជាក់ច្រើន , ២: កុំទៅកន្លែងមានមនុស្សច្រើន , ៣: កុំប៉ះពាល់គ្នា កុំចាប់ដៃ កុំកៀកស្មា កុំឱបគ្នាជាដើម។ ចុងក្រោយ លោក ចៅ សុភៈភិបាល បានស្នើគ្រប់សមាសភាពដែលអញ្ជើញមកពីគ្រប់អង្គភាព មន្រ្តីជំនាញ និងអង្គភាពពាក់ព័ន្ធទាំងអស់ ត្រូវផ្តោតការយកចិត្តទុកដាក់ស្វែងយល់ ពិភាក្សាឱ្យកាន់តែស៊ីជម្រៅបន្ថែមទៀត ទៅលើការរៀបចំ នីតីវិធីនៃការគ្រប់គ្រងហិរញ្ញវត្ថុនៅក្នុងគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ របស់ក្រសួងសាធារណការ និងដឹកជញ្ជូន ព្រមទាំងធានាឱ្យបាននូវការរៀបចំកិច្ចបញ្ជីការគណនេយ្យ ផែនការប្រចាំឆ្នាំ ឱ្យមានសង្គតិភាពពេលវេលាជាមួយប្រតិទិននៃការរៀបចំគម្រោងថវិកាចំណាយ ព្រមទាំងអាចផលិតបាននូវរបាយការណ៏ហិរញ្ញវត្តុ ដែលមានលក្ខណៈគ្រប់ជ្រុងជ្រោយ៕