ខណៈដែលកិច្ចព្រមព្រៀងពាណិជ្ជកម្មសេរីចំនួន ៥ ស្ថិតនៅក្នុងការពិចារណានៅឆ្នាំនេះ ប្រទេសកម្ពុជាកំពុងអភិវឌ្ឍបណ្តាញភ័ស្តុភាររបស់ខ្លួនក្នុងការស្វាគមន៏កិច្ចព្រមព្រៀងពាណិជ្ជកម្មសេរីទាំងនេះ។ ទាក់ទងនឹងករណីនេះ លោកនាយករដ្ឋមន្រ្តីកាលពីខែមុនបានយល់ព្រមក្នុងការអភិវឌ្ឍច្រកទ្វារអន្តរជាតិស្ទឹងបត់ បាវិត និងប៉ោយប៉ែត។ លោកស្រី សន សុភាវត្តី ប្រធាននាយកដ្ឋានអង្កេត និងបូកសរុប នៃអគ្គនាយកដ្ឋានភស្តុភារកម្មនៃក្រសួងសាធារណការ និងដឹកជញ្ជូនបានមានប្រសាសន៍ថាសម្រាប់ច្រកទ្វារអន្តរជាតិបាវិតជាមួយប្រទេសវៀតណាម ផ្លូវនឹងត្រូវពង្រីកពីចំនួន ៤ គន្លង ទៅកាន់ ៦ គន្លងក្នុងរយៈពេល ៦ ខែ ខណៈដែលច្រកទ្វារអន្តរជាតិប៉ោយប៉ែតនឹងពង្រីកពី ២ គន្លង ទៅកាន់ ៤ គន្លង។ លោកស្រីថា៖ «យើងដឹងថាឡានដឹកទំនិញត្រូវរង់ចាំក្នុងរយៈពេលច្រើនថ្ងៃដើម្បីឆ្លងកាត់ព្រំដែន ជាពិសេសនៅច្រកអន្តរជាតិបាវិត»។ លោកស្រីបានបន្ថែមថាផ្លូវល្បឿនលឿនពីភ្នំពេញទៅក្រុងព្រះសីហនុបច្ចុប្បន្នបានបញ្ចប់ ៣៥ ភាគរយហើយ ដែលគ្រោងនឹងបញ្ចប់នៅខែសីហាឆ្នាំ ២០២២។ លោកស្រីថា៖ «ផ្លូវនេះគឺជាផ្លូវយុទ្ធសាស្ត្រមួយក្នុងការកែលំអភ័ស្តុភាររបស់ប្រទេសជាតិ ខណៈដែលផ្លូវនេះតភ្ជាប់ជាមួយតំបន់សេដ្ឋកិច្ចពិសេសក្រុងព្រះសីហនុ ហើយនឹងអនុញ្ញាតឱ្យមានការចូលទៅកាន់រាជធានីភ្នំពេញនិងក្រុងបាវិតកាន់តែច្រើន»។ លោកស្រីបន្តថាក្រុមការងារមួយក៏ត្រូវបានបង្កើតឡើងផងដែរដើម្បីស្វែងរកទីតាំងផ្លូវថ្មីពីភ្នំពេញទៅបាវិត ខណៈដែលមជ្ឈមណ្ឌល​ភស្តុភារ​កម្ម​នៅភ្នំពេញនិងព្រះសីហនុស្ថិតនៅក្រោមការសិក្សា។ មជ្ឈមណ្ឌល​ភស្តុភារ​កម្ម​ភ្នំពេញបានកើតឡើងជាបណ្តើរៗ ខណៈដែលកិច្ចព្រមព្រៀងនឹងត្រូវចុះហត្ថលេខានៅ ២ សប្តាហ៍ក្រោយ។ បច្ចុប្បន្ន ទីតាំងសមរម្យសម្រាប់មជ្ឈមណ្ឌល​ភស្តុភារ​កម្មក្រុងព្រះសីហនុកំពុងស្ថិតនៅក្រោមការពិនិត្យជាមួយក្រុមហ៊ុនសិង្ហបុរីដែលកំពុងសិក្សាពីរបៀបភ្ជាប់បណ្តាញដឹកជញ្ចូនជាមួយផ្លូវសេដ្ឋកិច្ចពិសេសនិងតំបន់សេដ្ឋកិច្ចពិសេសក្រុងព្រះសីហនុនាពេលខាងមុខនេះ។ ជាមួយគ្នានេះផងដែរ កំពង់ផែស្វយ័តភ្នំពេញនិងខេត្តព្រះសីហនុក៏ត្រូវបានកំណត់ក្នុងការអភិវឌ្ឍបន្ថែមទៀតផងដែរ។ កំពង់ផែស្វយ័តក្រុងព្រះសីហនុបច្ចុប្បន្នមានជម្រៅ ២០,៥ ម៉ែត្រនិងអាចផ្ទុកបាន កុងតឺន័រ (TEU) ទំហំ ២០ ហ្វីត ចំនួន ២០០០។ TEU គឺជាការវាស់វែងស្តង់ដារសម្រាប់សមត្ថភាពដឹកជញ្ជូនក្នុងឧស្សាហកម្ម។ ការស្ថាបនាកំពង់ផែក្រុងព្រះសីហនុថ្មីគ្រោងនឹងបញ្ចប់នៅឆ្នាំ ២០២៥ ខាងមុខ។ នៅពេលដែលបញ្ចប់ កំពង់ផែនេះនឹងអាចទទួលបានកុងតឺន័រ (TEU) ទំហំ ២០ ហ្វីតចំនួប ៥០០០ ហើយនឹងមានជម្រៅ ៤០,៥ ម៉ែត្រ។ ខណៈពេលដែលកិច្ចព្រមព្រៀងពាណិជ្ជកម្មសេរីទ្វេភាគីជាមួយចិនគឺជាកិច្ចព្រមព្រៀងតែមួយគត់ដែលបានចុះហត្ថលេខា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងកិច្ចព្រមព្រៀងពាណិជ្ជកម្មសេរីជាមួយកូរ៉េខាងត្បូង រួមជាមួយការពិភាក្សាពាណិជ្ជកម្មផ្សេងទៀតមានសារៈសំខាន់ដើម្បីជំរុញសមត្ថភាពដឹកជញ្ជូននៅកម្ពុជា។ សន្ទស្សន៍លទ្ធផលការងារភស្តុភារ (Logistics Performance Index) របស់ធនាគារពិភពលោកបានផ្តល់ពិន្ទុដល់ប្រទេសកម្ពុជាចំនួន ២,៨ ក្នុងឆ្នាំ ២០១៨ ដែលជាចំណាត់ថ្នាក់ទាបជាងតំបន់អាស៊ីបូព៌ានិងប៉ាស៊ីហ្វិកដទៃទៀត។ ទិន្ន័យរបស់ភ្នាក់ងារសហប្រតិបត្តិការអន្តរជាតិជប៉ុន (JICA) បានរកឃើញថាប្រទេសកម្ពុជាមានតម្លៃនៃការដឹកជញ្ចូនខ្ពស់បើប្រៀបធៀបជាមួយប្រទេសថៃនិងវៀតណាម។ ភ្នាក់ងារដដែលបន្តថា៖ «តាមរយៈចក្ខុវិស័យហេដ្ឋារចនាសម្ព័ន្ធ ពិន្ទុមធ្យមរបស់កម្ពុជាគឺតិចជាងមធ្យមភាគនីមួយៗ ហើយហេដ្ឋារចនាសម្ព័ន្ធរបស់ខ្លួនត្រូវបានចាត់ទុកថាទាប ហើយត្រូវការការកែលម្អបន្ថែមទៀតដើម្បីឆ្លើយតបនឹងតម្រូវការបច្ចុប្បន្ននិងអនាគត»៕