[Rasmei Kampuchea Daily News] - ស្ពានតភ្ជាប់ពីផ្លូវជាតិលេខ៥ទៅកាន់ទីក្រុងរណបជ្រោយចង្វារសម្រេចបានជាង៣០ភាគរយ
ភ្នំពេញៈ ការសាងសង់ស្ពានតភ្ជាប់រវាងផ្លូវជាតិលេខ៥ និងទីក្រុងរណបជ្រោយចង្វារសម្រេចបានប្រមាណ៣០ភាគរយហើយ រហូតមកទល់ពេលនេះ ខណៈដំណើរការសាងសង់កំពុងប្រព្រឹត្តទៅដោយរលូន។
អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៥ ខែកុម្ភៈថា ដំណើរការសាងសង់ស្ពានបាន បានវិវត្តន៍ទៅមុខតាមការគ្រោងទុក ដោយមិនមានការពន្យាពេលនោះទេ ព្រោះក្រុមការងារជំនាញកំពុងធ្វើការងារនេះយ៉ាងសកម្ម ដែលរហូតមកទល់ពេលនេះ តាមការប៉ាន់ស្មានដំណើរការសាងសង់សម្រេចបានប្រមាណ៣០ភាគរយហើយ។
លោកបន្តថា “តាមការស្មាន ខ្ញុំគិតថាស្ពាននេះសម្រេចបាន៣០ភាគរយហើយ ព្រោះពេលនេះសរសរស្ពានបានផុសចេញពីទឹកហើយ”។
ស្ពាននេះជាប្រភេទស្ពានសាងសង់ យោងដោយខ្សែកាបនេះ នឹងមានប្រវែងជាង៥០០ម៉ែត្រ និងចំណាយថវិកាសាងសង់៣៥លានដុល្លារអាមេរិក ដែលបានមកពីគំរោងជួលដីទីក្រុងរណបជ្រោយចង្វាររបស់រដ្ឋាភិបាលដល់ក្រុមហ៊ុនOCIC។
លោកបណ្ឌិត វ៉ាន់ វ៉ាត អ្នកឯកទសផ្នែកនគរូបនីយកម្មបានថ្លែងថា ការសាងសង់ស្ពានវាជាជម្រើសល្អប្រសើរមួយ ដើម្បីកាត់បន្ថយការកកស្ទះចរាចរណ៍ ព្រោះវាផ្តល់ជម្រើសកាន់តែច្រើនសម្រាប់ប្រជាពលរដ្ឋធ្វើដំណើរ។
លោកបន្តថា “តំបន់នេះមានចរាចរណ៍មមាញឹក ហេតុនេះការសាងសង់ស្ពានថ្មីបន្ថែមទៀត ពិតជាអាចជួយដោះស្រាយបញ្ហាកកស្ទះចរាចរណ៍នៅតំបន់នេះបាន”៕
