ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ក្រសួង បានឃើញនូវសំណូមពររបស់ប្រជាពលរដ្ឋដែលស្នើឱ្យដំឡើងល្បឿនកំណត់សម្រាប់យានយន្តដែលធ្វើដំណើរតាមដងផ្លូវនានា ដោយក្រសួង កំពុងធ្វើវិសោធនកម្មច្បាប់ទាក់ទងនឹងបញ្ហានេះ។ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា៖ "យើងកំពុងធ្វើវិសោធនកម្មច្បាប់របស់យើង។ យើងខ្ញុំនឹងពិភាក្សាពិចារណាជាមួយនឹងសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក លើបញ្ហាដែលយើងទទួលបានហ្នឹង តើយើងអាចធ្វើបានដែរឬទេ? ឧទាហរណ៍ ផ្លូវខ្លះអាចបានដល់៩០ យើងនឹងពិចារណាឱ្យត្រឹមត្រូវ"។ យ៉ាងណាមិញ លោករដ្ឋមន្ត្រី បានមានប្រសាសន៍បន្តថា ស្ដង់ដាផ្លូវយើង គឺបើកបានត្រឹមតែ ៨០គីឡូម៉ែត្រក្នុងមួយម៉ោងទេ ហើយគ្រោះថ្នាក់ចរាចរណ៍ ស្លាប់ច្រើន ក៏ដោយសារតែបញ្ហាបើកបរលើសល្បឿនកំណត់នេះផងដែរ។ សូមជម្រាបថា ប្រសាសន៍របស់លោកទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានធ្វើឡើង ក្នុងពិធីសម្ពោធ និងដាក់ឱ្យប្រើប្រាស់ជាផ្លូវការ មជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់ នាព្រឹកថ្ងៃព្រហស្បតិ៍ ទី០៤ ខែកុម្ភៈ ឆ្នាំ២០២១នេះ៕