ខេត្តកោះកុងជាខេត្តមួយជាប់សមុទ្រ នឹងជាទីប្រជុំកោះ ដែលមានក្រុងខេមរភូមិន្ទជាទីរួមខេត្ត នឹងស្ថិតនៅទិសនិរតីនៃប្រទេសកម្ពុជា។ ហើយក៏ជាខេត្តមួយដែលប្រកបទៅដោយសក្តានុពលទេសចរណ៍ធម្មជាតិ សត្វព្រៃ តំបន់បូរាណដែលកំពុងទាក់ទាញអ្នកស្រលាញ់ដំណើរកំសាន្តបែបផ្សងព្រេងផងដែរ។ ក្នុងនោះ តំបន់អេកូទេសចរណ៍អារ៉ែង និងជីផាត់គឺជាតំបន់ពីរដែលមានសក្តានុពលខ្លាំងជាងគេ ដោយសារមានព្រៃភ្នំ ទឹកជ្រោះ និងវត្ថុបុរាណជាដើម។ ក្រឡេកមកមើលក្រុងខេមរភូមិន្ទវិញ ដែលជាអតីតស្រុកស្មាច់មានជ័យនោះ នៅពេលនេះត្រូវបានក្រសួងសាធារណការ និងដឹកជញ្ជូន បានចុះមកពិនិត្យគម្រោងសាងសង់កំពង់ផែទេសចរណ៍ ជាមួយនឹងទីតាំងដែលមានសក្តានុពល ដើម្បីបង្កើនទេសចរណ៍ផង ផ្តល់ភាពងាយស្រួលដល់ការដឹកជញ្ជូនឆ្លងកាត់ ក្នុងតំបន់ និងទៅកាន់ក្រៅប្រទេសផងដែរ។ នេះបើតាមឯកឧត្ដម ឡេង ធនយុទ្ធា និង ឯកឧត្ដម អៀង វេងស៊ុន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណៈប្រតិភូជាន់ខ្ពស់របស់ក្រសួង និងមន្ត្រីជំនាញ ចុះត្រួតពិនិត្យដល់ទីតាំងគម្រោងសាងសង់កំពង់ផែទេសចរណ៍ក្រុងខេមរភូមិន្ទ ខេត្តកោះកុង នាព្រឹកថ្ងៃទី២៨ ខែមករា ឆ្នាំ២០២១ ដោយមានការសហការចូលរួមពីគ្រប់ភាគីពាក់ព័ន្ធផងដែរនោះ គឺក្នុងគោលបំណង ដើម្បីពិភាក្សាសិក្សាស្វែងយល់បន្ថែម អំពីសក្តានុពលនៃទីតាំងសម្រាប់សាងសង់កំពង់ផែទេសចរណ៍ផង និងសម្រាប់ការដឹកជញ្ជូនទំនិញឆ្លងកាត់ផងដែរ។ គួរបញ្ជាក់ថា៖ គម្រោងសាងសង់កំពង់ផែទេសចរណ៍ក្រុងខេមរៈភូមិន្ទ នឹងផ្តល់ជាផលប្រយោជន៍ ក៏ដូចជាកាន់តែធ្វើឱ្យខេត្តកោះកុង មានសក្តានុពល ជាពិសេសនោះ នឹងក្លាយជាចលកសម្រាប់ជម្រុញកំណើននៃវិស័យទេសចរណ៍ វិស័យសេដ្ឋកិច្ច និងការងារដឹកជញ្ជូនគ្រប់ប្រភេទរបស់ខេត្តអោយកាន់តែងាយស្រួល និងមានប្រសិទ្ធភាពខ្ពស់ ជាមួយបណ្តាខេត្តជាប់មាត់សមុទ្ររបស់កម្ពុជា និងប្រទេសជិតខាងផងដែរ។