ភ្នំពេញ៖ ថ្ងៃសៅរ៍ ១០កើត ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៣ ខែមករា ឆ្នាំ២០២១ នៅទីស្ដីការក្រសួងសាធារណការ និងដឹកជញ្ជូន ឯកឧត្ដម ឈៀង ពេជ្រ អគ្គនាយក នៃអគ្គនាយកដ្ឋានភ័ស្តុភារកម្ម និងជាប្រធានឧត្តមមន្ត្រីដឹកជញ្ជូនកម្ពុជា បានដឹកនាំគណៈប្រតិភូក្រសួងចូលរួមកិច្ចប្រជុំ “គណៈកម្មាធិការសហគមន៍សេដ្ឋកិច្ចអាស៊ានទាំងមូលលើកទី១១” (the 11th Meeting of the Committee of the Whole (CoW) for ASEAN Economic Community) តាមរយៈសន្និសីទវីដេអូពីចម្ងាយ (Video-conference)។ កិច្ចប្រជុំនេះមានគោលបំណងសំខាន់ដូចតទៅ៖ (១) ពិនិត្យឡើងវិញនូវសមិទ្ធផលនានាដែលទទួលបានក្នុងឆ្នាំ២០២០ លើគ្រប់វិស័យទាំងអស់នៅក្រោមសសរស្តម្ភសហគមន៍សេដ្ឋកិច្ចអាស៊ាន (២) លើកទិសដៅ និងផែនការសកម្មភាពសម្រាប់អនុវត្តនៅឆ្នាំ២០២១ និង (៣) ពិនិត្យឡើងវិញនូវតួនាទី និងភារៈកិច្ចរបស់ CoW។ គួរសម្គាល់ថា៖ ប្រធានតាមផ្នែកនីមួយៗបានធ្វើបទបង្ហាញអំពីវឌ្ឍនភាពតាមវិស័យរៀងៗខ្លួន ក្នុងនោះរួមមានបទបង្ហាញអំពី៖ ប្រព័ន្ធព័ត៌មានវិទ្យា ពាណិជ្ជកម្មតាមប្រព័ន្ធអេឡិចត្រូនិច សហប្រតិបត្តិការថាមពល ដឹកជញ្ជូន ទេសចរណ៍ គយ ការប្រកួតប្រជែង និងកម្មសិទ្ធិបញ្ញា។ ដោយឡែកខាងភាគីកម្ពុជាមានបទបង្ហាញចំនួនបីរួមមាន៖ បទបង្ហាញពីឧត្តមមន្រ្តីដឹកជញ្ជូនអាស៊ាន ឧត្តមមន្រ្តីកសិកម្មនិងរុក្ខាប្រមាញ់ និងអង្គការទេសចរណ៍ជាតិអាស៊ាន។ ទាក់ទងនឹងផ្នែកដឹកជញ្ជូន ឯកឧត្ដមអគ្គនាយក បានសហការជាមួយលេខាធិការដ្ឋានអាស៊ានក្នុងផ្នែកដឹកជញ្ជូន និងបានរៀបចំបទបង្ហាញអំពីវឌ្ឍនភាពក្នុងវិស័យដឹកជញ្ជូន ដោយផ្តោតជាសំខាន់ទៅលើរបាយការណ៍ត្រួតពិនិត្យពាក់កណ្តាលអាណត្តិ នៃផែនការយុទ្ធសាស្រ្តដឹកជញ្ជូនអាស៊ានដែលបានវាយតម្លៃយ៉ាងល្អិតល្អន់នូវកិច្ចសហប្រតិបត្តិការតាមវិស័យនីមួយៗ (ដូចជា៖ ផ្លូវគោក ផ្លូវទឹក ផ្លូវដែក ។ល។) និងបានផ្តល់អនុសាសន៍លើការកែសម្រួលរបាយការណ៍នេះ ដោយបន្ថែមនូវផែនការសកម្មភាព និងគោលដៅថ្មីសម្រាប់អនុវត្តឆ្នាំ២០២១។ ជាមួយគ្នានោះផងដែរ ឯកឧត្ដមអគ្គនាយកបានគូសបញ្ជាក់ថា៖ ដើម្បីឆ្លើយតបទៅនឹងការកើនឡើងនៃតម្រូវការជាក់ស្តែងក្នុងដំណាក់កាលជំងឺកូវីដ-១៩ ដែលតម្រូវឱ្យមានការដឹកជញ្ជូននូវផលិតផលត្រជាក់ និងវ៉ាក់សាំងបង្ការជំងឺកូវីដ-១៩ សេចក្តីណែនាំអំពីការដឹកជញ្ជូនផលិតផលត្រជាក់ ត្រូវបានដាក់បញ្ជូលទៅក្នុងផែនការ KLTSP ផងដែរ៕