ថ្ងៃសុក្រ ៩កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែមករា ឆ្នាំ២០២១ ឯកឧត្តម ទេសរដ្ឋមន្ត្រី រដ្ឋមន្ត្រី បានអញ្ជើញអមដំណើរសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងពិធីសម្ពោធបើកឱ្យ ប្រើប្រាស់ជាការអគារទីស្តីការ និងវិទ្យាស្ថាន តេជោសែន សាធារណការ ដោយមានការអញ្ជើញចូលរួមពី សម្តេច ឯកឧត្ដម ជំទាវ ភ្ញៀវកិត្ដិ យសជាតិ-អន្ដរជាតិ បុគ្គលិក-មន្រ្តីរាជការក្រោមឱវាទក្រសួងផងដែរ។ សូមជម្រាបជូនថា៖ អគារទីស្តីការក្រសួងថ្មីនេះមានទីតាំងឋិតនៅលេខ៥៩៨ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ (ជាសុផារ៉ា) រួមមាន៖ អគាររដ្ឋបាលកម្ពស់ ៩ជាន់ ទំហំ ៥៩,៥០ម៉ែត្រ គុណ ២៣,២០ម៉ែត្រ អគាររដ្ឋបាល២ខ្នង (អគារស្លាបសងខាង) កម្ពស់៨ជាន់ ទំហំ៤០ម៉ែត្រ គុណ ២០ម៉ែត្រ អគារសាលប្រជុំ និងបណ្ណាល័យ១ខ្នង កម្ពស់៣ជាន់ ទំហំ៥០ម៉ែត្រ គុណ ២០ម៉ែត្រ ព្រមទាំងបំពាក់សម្ភារការិយាល័យ សម្ភារសង្ហារឹម និងជណ្តើរយន្ត អគារដាក់គ្រឿងចក្រ៥ខ្នង ទំហំ៤០ម៉ែត្រ គុណ ២០ម៉ែត្រ អគារចាស់ៗដែលមានស្រាប់ចំនួន៦ខ្នង សាងសង់របងព័ទ្ធជុំវិញ និងរៀបចំបណ្តាញ បណ្តាញអគ្គិសនី បណ្តាញទឹកស្អាត បង្ហូរទឹកកខ្វក់ និងសួនច្បារក្នុងបរិវេណក្រសួង ព្រមទាំង បានទិញគ្រឿងចក្រចំនួន២២២គ្រឿងសម្រាប់ផ្តល់ជូន រាជធានី-ខេត្ត និងអគ្គនាយកដ្ឋានប្រព័ន្ធចម្រោះទឹកកខ្វក់ ដោយបានចំណាយថវិកាសរុបប្រមាណ ២៦ ៦១៣ ០៤០ ដុល្លារអាមេរិក។ ជាមួយគ្នានេះផងដែរក្នុងបរិវេណនៃអគារទីស្តីការក្រសួងថ្មីនេះ ក៏មានសាងសង់អគារវិទ្យាស្ថានបណ្តុះបណ្តាលបច្ចេកទេសសាធារណការ ចំនួន១ខ្នង កម្ពស់៤ជាន់ មានបណ្តោយ៧៤,៥ម៉ែត្រ ទទឹង១៧ម៉ែត្រ ដោយប្រសិទ្ធិនាមថា៖ “វិទ្យាស្ថាន តេជោសែន សាធារណការ ” ក្នុងនោះ រួមមាន៖ បន្ទប់សិក្សាចំនួន២៤បន្ទប់ ការិយាល័យរដ្ឋបាលចំនួន៣បន្ទប់ មន្ទីរពិសោធន៍ចំនួន១បន្ទប់ បណ្ណាល័យចំនួន១បន្ទប់ បំពាក់ដោយសម្ភារសិក្សា និងឧបករណ៍បច្ចេកទេសពិសោធន៍ទំនើបៗ ចំណាយថវិកាសរុបប្រមាណ ២ ៥០០ ០០០ (ពីរលាន ប្រាំសែន) ដុល្លារអាមេរិក សម្រាប់បណ្តុះបណ្តាល បុគ្គលិក-មន្រ្តី រាជការ សិក្ខាកាម និងសិស្ស-និស្សិតដើម្បីលើកកម្ពស់សមត្ថភាពកូនខ្មែរ លើជំនាញបច្ចេកទេសសាងសង់ហេដ្ឋារចនាសម្ព័ន្ធ- ដែលនឹងធានាថា៖ “កូនខ្មែរអាចមានសមត្ថភាពកសាង-របស់ ខ្លួនប្រកបដោយគុណភាពនាពេលអនាគត”។ លើសពីលើនេះ អគារទីស្តីការក្រសួងថ្មីនេះក៏មានរៀបចំបំពាក់ប្រព័ន្ធសូឡាទាញយកថាមពលប្រើប្រាស់ពីពន្លឺព្រះអាទិត្យនៅលើដំបូលអគារផ្ទាល់ទាំងអស់ផងដែរ ដើម្បីចូលរួមចំណែកក្នុងការកាត់បន្ថយចំណាយលើការប្រើប្រាស់ថាមពលអគ្គិសនីប្រចាំថ្ងៃ និងរួមចំណែកសន្សំសំចៃថវិកាជាតិ រួមជាមួយនឹងការគិតគូរដល់ការចូលរួមកាត់បន្ថយផលប៉ះពាល់បរិស្ថានតាមរយៈការប្រើប្រាស់ថាមពលបៃតងផងដែរ។ ថ្លែងក្នុងរបាយការណ៍គោរពជូនសម្ដេចតេជោនាយករដ្ឋមន្ដ្រី និងអង្គពិធីទាំងមូល ឯកឧត្តមទេសរដ្ឋមន្ត្រី បានថ្លែងថា៖ ដោយផ្អែកលើការអភិវឌ្ឍ និងការរីកចម្រើនរបស់ប្រទេសជាតិ បានរៀបចំកែទម្រង់រចនាសម្ព័ន្ធរបស់ខ្លួន ក្នុងនោះរួមមាន៖ បានរៀបចំធនធានមនុស្សឡើងវិញនិងប្រព័ន្ធបច្ចេកវិទ្យាទំនើប ព្រមទាំងបានគិតគូរពីចក្ខុវិស័យវែងឆ្ងាយ និងបេសកកម្មចម្បងរបស់ក្រសួង ក្នុងការលើកកម្ពស់ប្រសិទ្ធភាពនៃការបំពេញការងាររបស់មន្ត្រីរាជការ និងការផ្តល់សេវា សាធារណៈជូនបងប្អូនប្រជាពលរដ្ឋ។ ឯកឧត្តមទេសរដ្ឋមន្ត្រី បានបន្ថែមថា៖ ការផ្លាស់ប្តូរទីតាំងអគារទីស្តីការ និងដឹក ជញ្ជូនមកទីតាំងថ្មី និងការដាក់ឱ្យដំណើរការ វិទ្យាស្ថានតេជោសែន សាធារណការ នេះ គឺជាការបញ្ជាក់ពីប្រវត្តិសាស្ត្រថ្មីមួយទៀត ដែលបង្ហាញឱ្យឃើញពីការផ្លាស់ប្តូរ និងការរីកចម្រើនលើ ក្នុង សម័យតេជោ ដ៏រុងរឿងពោរពេញដោយសុខសន្តិភាព និងការអភិវឌ្ឍ។ សមិទ្ធផលថ្មីលើទឹកដីសន្តិភាព ដែលលេចចេញជារូបរាងឡើងនេះ គឺជាចំណងដៃដ៏ថ្លៃថ្លាមិនអាចកាត់ ថ្លៃ បានរបស់រាជរដ្ឋាភិបាលកម្ពុជា ជូនដល់បងប្អូនមន្រ្តីរាជការទាំងអស់ ក៏ដូចជាប្រជាពលរដ្ឋនិងសង្គមជាតិទាំងមូល ក្រោមការដឹកនាំប្រកបដោយគតិបណ្ឌិត និងទស្សនទានវែងឆ្ងាយរបស់សម្ដេចតេជោនាយករដ្ឋ មន្ដ្រីដែលជាអគ្គមគ្គុទេ្ទសក៍ និងជាប្រតិបត្តិករនយោបាយឈ្នះ-ឈ្នះ ដែលបានតស៊ូរំដោះប្រទេសជាតិឱ្យរួចផុតពីរបបប្រល័យពូជសាសន៍ និងបានពុះពារកសាងសន្តិភាព លទ្ធិប្រជាធិបតេយ្យ ខឿនសេដ្ឋកិច្ច វឌ្ឍនភាពសង្គមដ៏គាប់ប្រសើរ និងការអភិវឌ្ឍលើគ្រប់វិស័យ ជាពិសេស បានដឹកនាំនាវា កម្ពុជាឆ្ពោះទៅរក ភាពជោគជ័យថ្មីៗជាបន្តបន្ទាប់ជាច្រើន សម្រាប់ជាប្រវត្តិសាស្រ្តនៃប្រជាជាតិកម្ពុជាទាំងមូល។