[Rasmei Kampuchea Daily News] - ប្រធានមន្ទីរសាធារណការខេត្តព្រះវិហារ អំពាវនាវពលរដ្ឋកុំបោះចោលសំរាមតាមទីសាធារណៈ
ព្រះវិហារ: លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានអំពាវនាវដល់ប្រជាពលរដ្ឋឲ្យ ត្រូវមានស្មារតីទទួលខុសត្រូវក្នុងការវេចខ្ចប់សំរាមរបស់ខ្លួន ទុកដាក់ឱ្យបានត្រឹមត្រូវ ចៀសវាងយកទៅបោះចោល តាមទីសាធារណៈផ្សេងៗ ។
ការអំពាវនាវនេះខណៈដែលគំនរសំរាមជាច្រើនកន្លែ ងនៅចំណុចស្ពានដងស្ទឹងស្រអែម ស្ថិតក្នុង ឃុំស្រអែម ស្រុកជាំក្សាន្ត ត្រូវបានក្រុមការងារថែទាំផ្លូវថ្នល់ របស់មន្ទីរធ្វើការសម្អាតរួចរាល់។
លោក សំ លាងទ្រី បាននិយាយកាលពីរសៀលថ្ងៃទី១០ ខែធ្នូថា ការចោលសំរាមនៅតាមទីសាធារណៈផ្សេងៗ ក្រៅពីធ្វើឱ្យប៉ះពាល់ដល់សណ្តាប់ធ្នាប់ គឺធ្វើឱ្យប៉ះពាល់ដល់បរិស្ថានយ៉ាងធ្ងន់ធ្ងរ ជាងនេះទៅទៀតធ្វើឱ្យប៉ះពាល់ដល់សុខភាពអ្នកធ្វើដំណើរ ក៏ដូចជាសុខភាពប្រជាពលរដ្ឋ ដែលរស់នៅក្បែរគំនរ សំរាមនោះផងដែរ។
ជាមួយគ្នានោះលោក សំ លាងទ្រី ក៏បានអរគុណដល់ក្រុមការងារថែទាំ និងជួសជុលផ្លូវថ្នល់នៃមន្ទីរសាធារណការ ព្រះវិហារ ប្រចាំផ្លូវជាតិលេខ៦២ ដែលបានរួមគ្នាសម្អាតសំរាម នៅចំណុចខាងលើបានយ៉ាងស្អាត៕
