យោងតាមក្រុមហ៊ុនរ៉ូយ៉ាល់គ្រុបបានឲ្យដឹងថា ផ្លូវដែករបស់អាកាសយានដ្ឋានអន្តរជាតិភ្នំពេញដែលលាតសន្ធឹងលើមហាវិថីសហព័ន្ធរុស្ស៊ីនឹងត្រូវបិទដំណើរការដើម្បីសន្សំសំចៃលើចំណាយក្នុងការថែទាំ ខណៈដែលខ្សែផ្លូវដែកនេះនាពេលបច្ចុប្បន្នមិនត្រូវបានប្រើប្រាស់ដោយសារតែកង្វះអ្នកដំណើរ។ លោក ​លី បូរិន ​អនុរដ្ឋលេខាធិការ​នៃក្រសួង​សាធារណការ​ និង​ដឹក​ជញ្ជូនទទួលបន្ទុក​ផ្លូវ​ដែក​ បានមានប្រសាសន៍ថា៖ «[ចាប់តាំងពីមានករណីនៃជម្ងឺរាតត្បាត] យើងមិនបានដំណើរការសេវារថភ្លើងនោះទេ ដូច្នេះការទុកផ្លូវដែកអាចបង្កគ្រោះថ្នាក់ដល់អ្នកធ្វើដំណើរនានា»។ នាយកប្រតិបត្តិក្រុមហ៊ុនរថភ្លើងរ៉ូយាល់រេលវេយ៍ លោក John Guiry បានបញ្ជាក់ឲ្យដឹងថាផ្លូវដែកនេះនឹងត្រូវផ្អាកដំណើរការរហូតដល់ស្ថានភាពនៃករណីវីរុសកូវីដ១៩ស្ថិតក្រោមការគ្រប់គ្រងដែលផ្លូវដែកនេះអាចនឹងចាប់ផ្តើមសេវាកម្មម្តងទៀតនាពេលអនាគត។ លោកថ្លែងថា៖ «ផ្លូវដែកទាំងនេះនឹងត្រូវផ្អាកដំណើរការរហូតដល់ស្ថានភាពនៃវីរុសកូវីដ ១៩ មានភាពធូរស្បើយនៅទូទាំងពិភពលោក ហើយជើងហោះហើរចាប់ផ្តើមដំណើរការឡើងវិញ ខណៈដែលនឹងកាត់បន្ថយការចំណាយលើការថែទាំផងដែរ។ សេវាកម្មនេះមិនមានតំរូវការនោះទេរហូតដល់អ្វីៗចាប់ផ្តើមវិលមករកភាពធម្មតាវិញ ខណៈពេលដែលគ្មាននរណាម្នាក់ប្រាកដថាពេលណានោះទេ»។ សេវាកម្មរថភ្លើងដឹកអ្នកដំណើររវាងអាកាសយានដ្ឋានអន្តរជាតិភ្នំពេញនិងស្ថានីយកណ្តាលក្នុងរាជធានីភ្នំពេញត្រូវបានបើកជាសាធារណៈកាលពីថ្ងៃទី ១០ ខែមេសាឆ្នាំ ២០១៨ ។ លោក John Guiry បានបន្តឲ្យដឹងថា ក្រុមហ៊ុនរ៉ូយ៉ាល់គ្រុបបានចំណាយថវិកាចន្លោះពី ១ លាន ទៅ ២ លានដុល្លារអាមេរិកសម្រាប់ជើងរថភ្លើងទៅកាន់អាកាសយានដ្ឋានក្នុងឆ្នាំ ២០១៩ ។ លោកបានពន្យល់បន្ថែមថា ដោយសារតែមានតម្រូវការសម្រាប់ជើងរថភ្លើងទាំងនៅក្រុងព្រះសីហនុនិងនៅប៉ោយប៉ែត ដូច្នេះហើយរថភ្លើងទាំងនេះនឹងត្រូវបញ្ជូនទៅកាន់ទីតាំងទាំងនោះ។ ជាមួយគ្នានេះផងដែរ ក្រសួងសាធារណការ និងដឹកជញ្ជូន ក៏បានធ្វើបច្ចុប្បន្នភាពលើស្ថានភាពនៃការសិក្សាលទ្ធភាពមួយចំនួនសម្រាប់គម្រោងផ្លូវធ្វើដំណើរនៅក្នុងរាជធានីភ្នំពេញ។ ការសិក្សាលើសំណើររថភ្លើងលើអាកាសភ្ជាប់ពីកណ្តាលទីក្រុងភ្នំពេញជាមួយអាកាសយានដ្ឋានបានបញ្ចប់ខណៈដែលការសិក្សាអំពីលទ្ធភាពនៃរថភ្លើងក្រោមដី ឬ MONORAIL មិនទាន់អាចឈានដល់ការសន្និដ្ឋាននៅឡើយទេ។ លោក លី បូរិន បានកត់សម្គាល់ថាការសិក្សាអំពីគម្រោងទាំងនេះត្រូវការពេលវេលាដោយសារតែការចំណាយខ្ពស់ទាក់ទងនឹងការវិនិយោគ។ លោកបានបន្ថែមថា៖ «ការសិក្សាពីគម្រោងរថភ្លើងលើអាកាសបានបញ្ចប់ហើយ ខណៈដែលការចំណាយមានចំនួនច្រើន។ ទោះជាយ៉ាងណាក៏ដោយ ការសម្រេចចិត្តនានាគឺអាស្រ័យលើរដ្ឋាភិបាល»។ ក្រសួងសាធារណការ និងដឹកជញ្ជូនធ្លាប់បានឲ្យដឹងថាជម្រើសចំនួនបីដែលមានដូចជារថភ្លើងលើអាកាស រថភ្លើង Mono Rail និងរថភ្លើងក្រោមដីគឺកំពុងតែស្ថិតនៅក្នុងការពិចារណា។ នៅពេលដែលការសិក្សាអំពីលទ្ធភាពទាំងបីត្រូវបានបញ្ចប់ ក្រសួងនឹងធ្វើការប្រៀបធៀប និងវិភាគលើគម្រោងទាំងនេះដើម្បីធ្វើការសម្រេចចិត្តលើអ្វីដែលសមស្របបំផុត។ គួរបញ្ជាក់ឲ្យដឹងផងដែរថា ការចំណាយលើគម្រោងប្រព័ន្ធរថភ្លើងថ្មីត្រូវបានប៉ាន់ស្មានថាមានចន្លោះពី ១ ពាន់លានដុល្លារទៅ ១,៤ ពាន់លានដុល្លារ៕