ថ្ងៃព្រហស្បតិ៍ ៤កើត ខែមិគសិរ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៩ ខែវិច្ឆិកា ឆ្នាំ២០២០ ក្រោមអធិបតីភាព ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តលើសទម្ងន់កម្រិតកំណត់ បានដឹកនាំសិក្ខាសាលាស្តីអំពីការគ្រប់គ្រង និងនីតិវិធីក្នុងការរៀបចំឯកសារនានា ពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់សម្រាប់ឆ្នាំ២០២០ជូនដល់មន្ត្រីនៃស្ថានីយជញ្ជីង។ សិក្ខាសាលាចូលរួមដោយ អនុរដ្ឋលេខាធិការទទួលបន្ទុក អនុប្រធានគណៈកម្មាធិការសម្របសម្រួលអចិន្ត្រៃយ៍ ប្រធាន អនុប្រធាន និងសមាជិក សមាជិកាលេខាធិការដ្ឋាន និងមន្រ្តីមកពីគ្រប់ស្ថានីយ ប្រមាណ ៨០នាក់។ ការរៀបចំសិក្ខាសាលានេះ ក្នុងគោលបំណងពង្រឹងការអនុវត្តការងារពាក់ព័ន្ធដល់មន្រ្តីជំនាញលើការទុកដាក់ រៀបចំឯកសារបទដ្ឋានគតិយុត្តិ និងឯកសារពាក់ព័ន្ធនានា ជាពិសេសលើឯកសារពិន័យតាមប្រកាសលេខ ២៧២ សហវ.ប្រក ចុះថ្ងៃទី១៧ ខែមីនា ឆ្នាំ២០១១ របស់ក្រសួងសេដ្ឋកិច្ច និងហិរញ្ញវត្ថុ ស្តីពីការដាក់ឱ្យប្រើប្រាស់បង្កាន់ដៃបង់ប្រាក់។ ក្នុងអង្គសិក្ខាសាលា ក្រុមការងារបច្ចេកទេសនៃលេខាធិការដ្ឋានក៏បានផ្តល់បទបង្ហាញស្តីពីការជួសជុល និងថែទាំបឋមលើជញ្ជីង និងប្រព័ន្ធបច្ចេកវិទ្យាគ្រប់គ្រងដល់មន្រ្តីនៃស្ថានីយ។ បន្ថែមពីនេះ ក្រុមការងារក៏បានផ្តល់ព័ត៌មាន និងទិសដៅបន្តលើការដាក់ប្រើប្រាស់បច្ចេកវិទ្យាលើការទប់ស្កាត់លើសទម្ងន់កម្រិតកំណត់៕