ឯកឧត្តម កឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យពិភាក្សាបន្តលើការរៀបចំសេចក្តីព្រាងច្បាប់ស្តីពី ទឹកកខ្វក់ និងប្រព័ន្ធលូ ភ្នំពេញ៖ ថ្ងៃពុធ ១២រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែតុលា ឆ្នាំ២០២០ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន តំណាងឯកឧត្តមរដ្ឋលេខាធិការ ប៉ាល់ ចន្ទតារា បានអញ្ជើញដឹកនាំកិច្ចប្រជុំពិភាក្សាបន្តលើសេចក្តីព្រាងច្បាប់ស្តីពី ទឹកកខ្វក់ និងប្រព័ន្ធលូ ដោយមានការអញ្ជើញចូលរួមពីថ្នាក់ដឹកនាំ និងមន្ត្រីជំនាញបច្ចេកទេសពាក់ព័ន្ធជាច្រើនរូប។ កិច្ចប្រជុំនេះធ្វើឡើងដើម្បីពិភាក្សាបន្តលើសេចក្តីព្រាងច្បាប់ស្ដីពីទឹកកខ្វក់និងប្រព័ន្ធលូរ ក្នុងមាត្រា ២៦(២៣ថ្មី) ដោយផ្ដោតជាសំខាន់លើការប្រើប្រាស់ពាក្យពេចន៍ ឃ្លា ប្រយោគ និងការកំណត់និយមន័យឱ្យបានច្បាស់លាស់ ជាក់លាក់ ស៊ីជម្រៅ និងគ្រប់ជ្រុងជ្រោយ ជាពិសេសជៀសវាងការបកស្រាយផ្សេងផ្ទុយពីខ្លឹមសារនៃច្បាប់។ ឯកឧត្ដមអនុរដ្ឋលេខាធិការបានឱ្យដឹងថា អង្គប្រជុំបានជជែក និងឯកភាពសម្រេចកែសម្រួលខ្លឹមសារនិងអត្ថន័យមួយចំនួននៃមាត្រា២៦(២៣ថ្មី)នេះ ដើម្បីឱ្យមានខ្លឹមសារជាគតិយុត្តគ្រប់គ្រាន់ និងមានវិសាលភាពគ្របដណ្ដប់គ្រប់ជ្រុងជ្រោយក្នុងក្របខណ្ឌគ្រប់គ្រងទឹកកខ្វក់ និងប្រព័ន្ធលូក្នុងព្រះរាជាណាចក្រកម្ពុជា។ ឯកឧត្តមរដ្ឋលេខាធិការបានមានប្រសាសន៍ថា ដើម្បីឱ្យការរៀបចំសេចក្ដីព្រាងច្បាប់នេះមានសន្ទុះទៅមុខកាន់តែលឿន យើងត្រូវបន្តវប្បធម៌សាមគ្គីសហការ ពិនិត្យខ្លឹមសារតាមមាត្រានីមួយៗឱ្យបានល្អិតល្អន់មុនកិច្ចប្រចុំមកដល់ ដោយគូសសម្គាល់ចំណុចទាំងឡាយណាយល់ថាមិនទាន់មានខ្លឹមសារច្បាស់លាស់ ទុកពិភាក្សាក្នុងកិច្ចប្រជុំ ដែលត្រូវធ្វើឡើងជារៀងរាល់សប្ដាហ៍។ ឯកឧត្ដមអនុរដ្ឋលេខាធិការបានថ្លែងអំណរគុណយ៉ាងជ្រាលជ្រៅចំពោះក្រុមការងារដែលបានចូលរួមយ៉ាងផុលផុសក្នុងការផ្ដល់ធាតុចូល និងបានស្នើឱ្យក្រុមការងារជំនាញពិនិត្យលើការប្រើប្រាស់ពាក្យពេចន៍ ឃ្លា ប្រយោគឱ្យបានល្អិតល្អន់និងស៊ីជម្រៅ ព្រមទាំងខិតខំប្រមូលឯកសារគតិយុត្តពាក់ព័ន្ធទាំងឡាយនៅក្នុងព្រះរាជាណាចក្រកម្ពុជា ក៏ដូចជាសិក្សាគំរូច្បាប់របស់ប្រទេសនានា ដើម្បីជាមូលដ្ឋានគ្រឹះ ក្នុងការរៀបចំសេចក្ដីព្រាងច្បាប់នេះឱ្យមានខ្លឹមសារនិងវិសាលភាពគ្រប់ជ្រុងជ្រោយតាមកម្មវត្ថុនៃច្បាប់៕