[PNN] - អាងហែលទឹកពហុកីឡដ្ឋានជាតិអូឡាំពិក ត្រូវបានសម្ពោធជាផ្លូវការ។
2020-09-30
ទៅកាន់ទំព័រចុះផ្សាយក្នុង PNN
អាងហែលទឹកពហុកីឡដ្ឋានជាតិអូឡាំពិក ត្រូវបានសម្ពោធជាការ។
អាងហែលទឹកពហុកីឡដ្ឋានជាតិអូឡាំពិក ត្រូវបានសម្ពោធ ជាការ ដើម្បីត្រៀមសម្រាប់ព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ខាងមុខ ដែលនឹងក្លាយជាព្រឹត្តិការណ៍ប្រវត្តិសាស្ត្រសម្រាប់ព្រះរាជាណាចក្រកម្ពុជា ដោយបានប្រព្រឹត្តទៅជាលើកដំបូង បន្ទាប់ពីអាក់ខានអស់រយៈពេល៥៤ឆ្នាំកន្លងទៅនេះគិតចាប់ពី ១៩៥៩-២០២៣។
ព្រឹត្តិការណ៍ប្រកួតកីឡាថ្នាក់អន្តរជាតិនេះ នឹងជួយពង្រឹងកិត្តិនាម និងកិត្យានុភាពរបស់ព្រះរាជាណាចក្រកម្ពុជា។ វាក៏នឹងក្លាយជាឱកាសមួយដើម្បីបង្ហាញពីវប្បធម៌ អរិយធម៌ សក្ដានុពលទេសចរណ៍ កម្លាំងសេដ្ឋកិច្ច និងសង្គមដល់ពិភពលោក។
សម្តេចពិជ័យសេនា ទៀ បាញ់ ឧបនាយករដ្ឋមន្រ្តីរដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិរៀបចំព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) បានផ្ដល់កិត្តិយសក្នុងពិធីកាត់ខ្សែបូដើម្បីសម្ពោធអាងហែលទឹកដែលបានកែលម្អថ្មីនេះ ក្នុងនោះក៏មានវត្តមានឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមទាំងថ្នាក់ដឹកនាំជាច្រើនរូបផ្សេងទៀត។
សូមជម្រាបថា អាងហែលទឹកពហុកីឡដ្ឋានអូឡាំពិកត្រូវបានសាងសង់ឡើងនៅចន្លោះឆ្នាំ១៩៦១ ដល់ ១៩៦៥ និងជាស្នាដៃរបស់ស្ថាបត្យករវ៉ាន់ ម៉ូលីវណ្ណ ក្រោមគំនិតផ្តួចផ្តើមរបស់សម្តេចព្រះនរោត្តមសីហនុ។ អាងហែលទឹកនេះត្រូវបានជួសជុលឡើងវិញនាថ្ងៃសុក្រ ទី២៦ ខែតុលា ឆ្នាំ២០១៨ និងបានជួសជុលរួចរាល់នៅអំឡុងខែមេសា ឆ្នាំ២០២០កន្លងទៅនេះ។
