លោក ច័ន្ទធី សុជីវ៉ា អគ្គនាយករងនៃអគ្គនាយកដ្ឋានសាធារណការ បានដឹកនាំគណៈប្រតិភូចូលរួមកិច្ចប្រជុំចំនួនបីក្នុងក្របខណ្ឌអាស៊ាន ថ្ងៃចន្ទ ០៥រោច ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី៧ ខែកញ្ញា ឆ្នាំ២០២០ នៅទីស្ដីការក្រសួង លោក ច័ន្ទធី សុជីវ៉ា អគ្គនាយករងនៃអគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូនបានដឹកនាំគណៈប្រតិភូក្រសួងចូលរួមកិច្ចប្រជុំចំនួនបីក្នុងក្របខណ្ឌអាស៊ាន តាមរយៈសន្និសីទវីដេអូពីចម្ងាយ។ កម្មវិធីនេះបានប្រព្រឹត្តទៅរយៈពេលបីថ្ងៃគឺនៅថ្ងៃទី៧ ទី៨ និងទី៩ ខែកញ្ញា ឆ្នាំ២០២០ ដោយរួមមានកិច្ចប្រជុំចំនួនបី ១.កិច្ចប្រជុំក្រុមការងារពិសេសសុវត្ថិភាពចរាចរណ៍ផ្លូវគោកពហុវិស័យអាស៊ាន ២. កិច្ចប្រជុំអនុក្រុមការងារផ្លូវហាយវេអាស៊ានលើកទី១៨ និង ៣. កិច្ចប្រជុំក្រុមការងារដឹកជញ្ជូនផ្លូវគោកអាស៊ានលើកទី២៩។ កិច្ចប្រជុំនេះធ្វើឡើងក្នុងគោលបំណងពង្រឹងកិច្ចសហការបន្ថែមទៀតរវាងប្រទេសជាសមាជិកអាស៊ានទាក់ទងនឹងការប្រើប្រាស់វិធីសាស្ត្រ យុទ្ធសាស្ត្រ និងយន្តការនានា ដើម្បីកាត់បន្ថយមរណភាពដោយគ្រោះថ្នាក់ចរាចរណ៍ឱ្យបាន៥០%នៅឆ្នាំ២០២០ និងបន្តកាត់បន្ថយឱ្យបានច្រើនជាង៥០% នៅឆ្នាំ២០៣០ ស្របតាមគោលដៅសកល៕