[BTV] - កម្ពុជានឹងអនុញ្ញាតឱ្យជនមានពិការភាពមួយចំនួនអាចទទួលបានប័ណ្ណបើកបរ
2020-07-01
ទៅកាន់ទំព័រចុះផ្សាយក្នុង BTV
ភ្នំពេញ ៖ តាមរយៈសេចក្ដីព្រាង ប្រកាសអន្តរក្រសួង ដែលរួមមាន ក្រសួងសាធារណការ និងដឹកជញ្ជូន ក្រសួងសុខាភិបាល និងក្រសួងសង្គមកិច្ច ស្ដីពី “ លក្ខខណ្ឌនៃការចេញប័ណ្ណបើកបរសម្រាប់ជនមានពិការភាព” បញ្ជាក់ថា ជនមានពិការភាពទាំងជនជាតិខ្មែរ និងជនបរទេស ដែលពិការភាពផ្នែកមួយចំនួនអាចទទួលបានប័ណ្ណបើកបរ ដូចប្រជាពលរដ្ឋមានអវយវៈគ្រប់គ្រាន់ធម្មតាផងដែរ។
ជាការយកចិត្តទុកដាក់ចំពោះ ជនមានពិការភាពជាជនជាតិខ្មែរ និងជនបរទេស ដែលរស់នៅកម្ពុជាក្នុងការប្រើប្រាស់យានយន្តនោះ ខាងអន្តរក្រសួងដែលរួមមាន ក្រសួងសាធារណការនិងដឹកជញ្ជូន ក្រសួងសុខាភិបាល និងក្រសួងសង្គមកិច្ច បានរៀបចំសេចក្ដីព្រាងប្រកាសរួមគ្នា ដើម្បីអាចផ្ដល់ប័ណ្ណបើកបរស្របច្បាប់ចំពោះជនមានពិការភាពប្រភេទមួយចំនួនដែលអាចមានសមត្ថភាពបើកបរបាន។
ជុំវិញកិច្ចការងារសំខាន់មួយនេះ ឯកឧត្តម ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការ ក្នុងឱកាសបើកសិក្ខាសាលាពិគ្រោះយោបល់លើសេចក្ដីព្រាងប្រកាសអន្តរក្រសួង ដែលរៀបចំឡើង នាព្រឹកថ្ងៃទី ០១ ខែកក្កដា ឆ្នាំ២០២០នេះ បញ្ជាក់ថា ប្រកាសអន្តរក្រសួងនេះ អាចចេញជាធរមានក្នុងពេលឆាប់ៗ បន្ទាប់ពីប្រមូលធាតុចូលបន្ថែមពីជនមានពិការភាពដែលមានវត្តមាននៅថ្ងៃនេះ។
ឯកឧត្តម ក៏បានសំណូមពរដល់កម្លាំងមានសមត្ថកិច្ចអនុវត្តច្បាប់ចរាចរណ៍ ក្នុងកំឡុងពេលសេចក្ដីប្រកាសអន្តរក្រសួងនេះ មិនទាន់ចេញជាធរមាន មេត្តាជួយយោគយល់សម្រួលដល់ជនមានពិការភាពដែលពុំទាន់មានប័ណ្ណបើកបរស្របច្បាប់ អាចធ្វើដំណើរក្នុងជីវភាពរស់នៅ ការប្រកបរបរចិញ្ចឹមជីវិតបានងាយស្រួល។
សេចក្ដីប្រកាសអន្តរក្រសួងនេះកំណត់ថា ជនពិការភ្នែកម្ខាង ពិការដៃម្ខាង ពិការជើងម្ខាង ពិការគរ ពិការថ្លង់ត្រូវមានឧបករណ៍ជំនួយការស្ដាប់ អាចអនុញ្ញាតឱ្យបើកបរដោយពុំចាំបាច់កែច្នៃយានយន្តនោះទេ។ រីឯជនមានពិការភាព ដែលពិការជើងទាំងពីរ ពិការដៃម្ខាង ពិការជើងម្ខាងវិញ អាចអនុញ្ញាតឱ្យបើកបរដោយតម្រូវឱ្យកែច្នៃយានយន្ត។
ចំពោះជនមានពិការភាព ដែលពិការដៃ និងជើងទាំងសងខាង ពិការភ្នែកទាំងពីរ ពិការគរ និងថ្លង់ដោយមិនមានឧបករណ៍ជំនួយ ពិការផ្នែកសតិបញ្ញា និងពិការផ្នែកគ្រប់គ្រងអារម្មណ៍ គឺមិនអនុញ្ញាតឱ្យបើកបរបាននោះទេ។
សម្រាប់ការកែច្នៃយានយន្តវិញ គឺសំដៅលើផ្នែក ហ្វ្រាំង ហ្គារ ចង្កឹះលេខ ដៃចង្កូត កៅអី ដែលការកែច្នៃទាំងនោះ សមស្របនិងបង្ករការងាយស្រួលសម្រាប់ជនមានពិការភាពប្រកបដោយសុវត្ថិភាព៕
