ក្រសួងសាធារណការ និងដឹកជញ្ជូន ឲ្យដឹងថា សមិទ្ធផលសំខាន់ៗលើវិស័យសាធារណការដែលសម្រេចបានគិតត្រឹមត្រីមាសទី១ ឆ្នាំ២០២០នេះរួមមាន៖ សម្ពោធបើកឲ្យប្រើប្រាស់ផ្លូវជាតិលេខ៥៥ ការបើកការដ្ឋាន សាងសង់ផ្លូវជាតិ១០ សម្ពោធបើកឲ្យប្រើប្រាស់ផ្លូវជាតិលេខ៥៨ និងគម្រោងធ្វើឲ្យប្រសើរឡើងផ្លូវជាតិលេខ២ និងផ្លូវជាតិលេខ២២។ ក្រសួងជំនាញមួយនេះ បានបញ្ជាក់ឲ្យដឹងនៅថ្ងៃទី១៥ ខែឧសភានេះថា ផ្លូវជាតិលេខ៥៥ តភ្ជាប់ពីពោធិសាត់ វាលវែង ដល់ថ្មដា ប្រវែង១៨២,១៦គីឡូម៉ែត្រ ត្រូវបានសម្ពោធដាក់ឲ្យប្រើប្រាស់ជាផ្លូវការនៅខែមីនា ឆ្នាំ២០២០ ខណៈការសាងសង់ផ្លូវជាតិលេខ១០ មានប្រវែងសរុបចំនួន១៩៨,៧១គីឡូម៉ែត្រ តភ្ជាប់ពីសំឡូត វាលវែង អូរសោម ដល់កោះកុង ដែលប្រើប្រាស់រយៈពេល៤៨ខែ គ្រោងបញ្ចប់ក្នុងឆ្នាំ២០២៣។ ផ្លូវជាតិលេខ៥៥ និងផ្លូវជាតិលេខ១០នេះ នឹងចូលរួមចំណែកលើកកម្ពស់ប្រសិទ្ធភាពនៃការដោះដូរពាណិជ្ជកម្ម ការវិនិយោគដំណាំកសិផល កសិឧស្សាហកម្ម និងទេសចរណ៍ ជាពិសេសប្រទេសជិតខាង តាមរយៈច្រកទ្វារព្រំដែនអន្តរជាតិកម្ពុជា-ថៃ។ ចំណែកផ្លូវជាតិលេខ៥៨ តភ្ជាប់ពីក្រុងប៉ោយប៉ែត ដល់ឃុំផ្អុង ខេត្តឧត្តរមានជ័យ មានប្រវែង១៧៤,១៦គីឡូម៉ែត្រ ត្រូវបានសម្ពោធដាក់ឲ្យប្រើប្រាស់ជាផ្លូវការ កាលពីថ្ងៃទី២៦ ខែកុម្ភៈ ឆ្នាំ២០២០ បន្ទាប់ពីប្រើប្រាស់រយៈពេលក្នុងការសាងសង់ចំនួន៤៣ខែ។ ផ្លូវនេះមានសារៈសំខាន់ ជាយុទ្ធសាស្ត្រដែលមានទីតាំងស្ថិតនៅស្របតាមខ្សែបន្ទាត់ព្រំដែនកម្ពុជា-ថៃ ភាគពាយ័ព្យ។ ដោយឡែក សម្រាប់ គម្រោងធ្វើឲ្យប្រសើរឡើងផ្លូវជាតិលេខ២ និងផ្លូវជាតិលេខ២២ ត្រូវបានបើកការដ្ឋានសាងសង់នៅថ្ងៃទី១១ ខែកុម្ភៈ ឆ្នាំ២០២០ ដោយផ្លូវនេះ មានប្រវែងសរុប៧២,១៧គីឡូម៉ែត្រ ចាប់ពីរង្វង់មូលតាខ្មៅ ខេត្តកណ្តាល ដល់អូរចំបក ខេត្តតាកែវ និងអង្គតាសោម ដោយប្រើប្រាស់រយៈពេលសាងសង់៣០ខែ គិតពីខែតុលា ឆ្នាំ២០១៩ និងគ្រោងបញ្ចប់ក្នុងខែមេសា ឆ្នាំ២០២០។ បន្ទាប់ពីផ្លូវនេះបានសាងសង់រួចជាស្ថាពរ នឹងក្លាយជាខ្សែផ្លូវមួយដ៏មានសក្តានុពលខ្ពស់ និងជួយលើកកម្ពស់ប្រសិទ្ធភាពនៃការធ្វើដំណើរ កាត់បន្ថយគ្រោះថ្នាក់ចរាចរណ៍ និងការកកស្ទះ ពិសេសសម្រួលដល់ការដឹកជញ្ជូនក្នុងស្រុក និងអន្តរជាតិ តាមរយៈច្រកទ្វារព្រំដែនអន្តរជាតិកម្ពុជា-វៀតណាម (ភ្នំដិន-តិញបៀន)៕