(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី១១ ខែមីនានេះ បានផ្ញេីសារដល់បងប្អូនប្រជាពលរដ្ឋយកចិត្តទុកដាក់គោរពច្បាប់ចរាចរណ៍ឲ្យបានខ្ជាប់ខ្ជួនបំផុត ព្រោះគ្រោះថ្នាក់ចរាចរណ៍កំពុងសម្លាប់មនុស្សជារៀងរាល់ថ្ងៃច្រេីនជាងជំងឺឆ្លងទៅទៀត។ ទំព័រហ្វេសប៊ុករបស់សម្តេចតេជោ បានសរសេរដូច្នេះថា៖ សុខសប្បាយជាទេបងប្អូនជនរួមជាតិ? ខ្ញុំសូមកោតរសេីរចំពោះបងប្អូនជនរួមជាតិដែលយកចិត្តទុកដាក់មានការប្រុងប្រយ័ត្នខ្ពស់ចំពោះសុខភាពអនាម័យផ្ទាល់ខ្លូនជាពិសេសក្នុងការទប់ស្កាត់ជំងឺឆ្លងកូវីឌ-១៩. និងជំងឺឆ្លងផ្សេងៗទៀត។ ប៉ុន្តែទន្ទឹមនឹងនេះ សូមបងប្អូនប្រជាពលរដ្ឋយកចិត្តទុកដាក់គោរពច្បាប់ចរាចរណ៍អោយបានខ្ជាប់ខ្ជួនបំផុតដែរ គឺត្រូវពាក់មួកសុវត្ថិភាព និងពាក់ខ្សែក្រវ៉ាត់សុវត្ថិភាពពេលបេីកបរគ្រប់ពេលជានិច្ច។ ព្រោះគ្រោះថ្នាក់ចរាចរណ៍កំពុងសម្លាប់មនុស្សជារៀងរាល់ថ្ងៃច្រេីនជាងជំងឺឆ្លងទៅទៀត។ សូមជូនពរបងប្អូនមានសុខភាល្អ និងមានសុខសុវត្ថិភាពក្នុងការធ្វេីដំណេីរជិតឆ្ងាយនៅទូទាំងប្រទេស៕