[Khmer 7 News] - ក្រសួងសាធារណការរៀបចំ កំពង់ផែកាណូត១៥ទីតាំង ដើម្បីផ្តល់សេវាដឹកជញ្ជូនតាមផ្លូវទឹក
2018-01-03
ទៅកាន់ទំព័រចុះផ្សាយក្នុង Khmer 7 News
ក្រសួងសាធារណការ និងដឹកជញ្ជូនបាននិងកំពុងរៀបចំកំពង់ផែចំណតកាណូត ដឹកអ្នកដំណើរ១៥ទីតាំងចេញពីតំបន់ព្រែកព្នៅ ទៅកាន់តាខ្មៅ ដែលអាចនឹងដំណើរការបាននៅមុនចូលឆ្នាំប្រពៃណីជាតិខ្មែរខាងមុខ។
យោងតាមបណ្តាញសង្គមហ្វេសប៊ុករបស់ក្រសួងសាធារណការ និងដឹកជញ្ជូនបានឲ្យដឹងថា ចំណតកំពង់ផែទាំង១៥ទីតាំង ចេញពីតំបន់ព្រែកព្នៅ ទៅក្រុងតាខ្មៅ រួមមាន ទី១ គល់ស្ពានព្រែកព្នៅត្រើយខាងកើត (កំពុងពិចារណា) ទី២ គីឡូម៉ែត្រលេខ៦ ទី៣ ខាងមុខឃ្លាំងសាំងឬស្សីកែវ ជាប់នឹងទីលានប្រជាធិបតេយ្យថ្មី ទី៤ ផែបណ្ដែតមុខផ្សាររាត្រី, ទី៥ កំពង់ចម្លងកោះពេជ្រ-អារីយ៍ក្សត្រ ទី៦ ភូមិដើមចាន់ ឬគល់ស្ពានក្បាលថ្នល់ខាងកើត ទី៧ ចំណតរថយន្តចាក់អង្រែក្រោម។
ទី៨ បាក់ខែងត្រង់ផ្លូវបំបែក លីយ៉ុងផាត់ ទី៩ ទល់មុខផ្សារព្រែកលៀប (កំពង់ចម្លងព្រែកលៀប) ទី១០ ជាប់សណ្ឋាគារសុខាភ្នំពេញ ទី ១១ ភូមិកោះនរា ទី១២ កំពង់ចម្លងក្តីតាកុយ ទី១៣ កំពង់ចម្លងតាព្រហ្មមាត់ក្រសះ ដោយឡែកចំនួន២ទីតាំង ផ្សេងទៀតស្ថិតនៅខេត្តកណ្តាល គឺទី១ នៅមុខវត្តព្រែកសំរោងក្រុងតាខ្មៅ (កំពុងពិចារណា) និងទី២ ស្ថិតនៅកំពង់ចម្លងរោងចក្រក្តាបន្ទះផ្លូវត្រី។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនធ្លាប់បានមានប្រសាសន៍លើកឡើងថា គម្រោងដឹកជញ្ជូនអ្នកដំណើរតាមផ្លូវទឹកនេះ នឹងអាចដំណើរបាននៅមុនចូលឆ្នាំប្រពៃណីជាតិខ្មែរខាងមុខ (ខែមេសា) ដើម្បីជួយសម្រួលក្នុងការធ្វើដំណើររបស់បងប្អូនប្រជាពលរដ្ឋ ជាពិសេសកាត់បន្ថយការកកស្ទះចរាចរណ៍។ ឯកឧត្តមទេសរដ្ឋមន្ត្រីបញ្ជាក់បន្ថែមថា តាមគម្រោងនឹងមាននាវាល្បឿនលឿនចំនួន២០គ្រឿង ដែលក្នុងមួយគ្រឿងអាចផ្ទុកអាចដំណើរប្រមាណ១០០នាក់ នឹងត្រូវឲ្យធ្វើប្រតិតបត្តិការចាប់ពីពេលព្រឹកម៉ោង០៦ រហូតដល់ម៉ោង០៨យប់៕
