ថ្ងៃសៅរ៍ ១៤រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២២ ខែកុម្ភៈ ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង និងក្រុមការងារបច្ចេកទេសក្រោមឱវាទចុះពិនិត្យវឌ្ឍនភាពនៃការសាងសង់អាងហែលទឹកកោះធំ ជិះកង់ត្រួតពិនិត្យគុណភាពផ្លូវជាតិលេខ២១ និងជួបសំណេះសំណាលសាកសួរសុខទុក្ខបងប្អូនប្រជាពលរដ្ឋ ចំនួន១២ភូមិ ស្ថិតក្នុងឃុំណ្រែកស្តី ស្រុកកោះធំ ខេត្តកណ្ដាល។ ឯកឧត្តមទេសរដ្ឋមន្ត្រី បានអញ្ជើញចុះពិនិត្យមើលវឌ្ឍនភាពនៃការសាងសង់អាងហែលទឹកកោះធំ ដែលរហូតមកដល់ពេលនេះ ការសាងសង់សម្រេចបាន៩៥ភាគរយហើយ នៅសល់តែការងារមួយចំនួន ដូចជាការលាបថ្នាំនិងជម្រះស្មៅ និងបានជំរុញឲ្យក្រុមហ៊ុនសាងសង់ពន្លឿនការងារដែលនៅសេសសល់ឲ្យបានចប់សព្វគ្រប់ ដើម្បីត្រៀមរៀបចំសម្ពោធដាក់ឲ្យប្រើប្រាស់ជាផ្លូវការនៅខែមីនា ឆ្នាំ២០២០ ដោយគ្រោងរៀបចំឱ្យមានការប្រកួតលើវិញ្ញាសាកីឡាហែលទឹកចម្ងាយ១០០ម៉ែត្រ និងកីឡាបាល់ទឹកផងដែរ។ សូមជម្រាបជូនថា៖ អាងហែលទឹកកោះធំមានទទឹង២២ម៉ែត្រ បណ្តោយ៤២ម៉ែត្រ ឋិតនៅក្នុងបរិវេណ កីឡដ្ឋានស្រុកកោះធំ ក្នុងភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល គ្រោងចំណាយថវិកាអស់សរុបប្រមាណ៣០ម៉ឺនដុល្លារសហរដ្ឋអាមេរិក សម្រាប់សិស្សានុសិស្ស ក៏ដូចជាកីឡាករហែលទឹកអាចហ្វឹកហាត់កីឡាដើម្បីសុខភាព និងត្រៀមចូលរួមប្រកួតកីឡាស៊ីហ្គេម ដែលកម្ពុជាគ្រោងធ្វើជាម្ចាស់ផ្ទះនៅ ឆ្នាំ២០២៣ខាងមុខ។ ជាមួយគ្នានេះផងដែរ ឯកឧត្តមទេសរដ្ឋមន្ត្រី បានចុះត្រួតពិនិត្យផ្លូវជាតិលេខ២១ ដើម្បីធានាបានគុណភាពរឹងមាំ ប្រើប្រាស់បានយូរអង្វែង បន្ទាប់ពីរកឃើញភាពមិនប្រក្រតីមួយចំនួនទាក់ទងនឹងគុណភាព ក្រោយពេលសាងសង់រួចរាល់ និងបានណែនាំឱ្យក្រុមហ៊ុនសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីបច្ចេកទេសរបស់ក្រសួងត្រូវតែធ្វើការដោយផ្ដោតលើគុណភាពជាចម្បង មុននឹងសម្ពោធដាក់ឱ្យប្រើប្រាស់ជាផ្លូវការ។ បន្ទាប់ពីការជិះកង់ត្រួតពិនិត្យគុណភាពផ្លូវជាតិលេខ២១ ឯកឧត្តមទេសរដ្ឋមន្ត្រីបានជួបសំណេះសំណាល និងសាកសួរសុខទុក្ខបងប្អូនប្រជាពលរដ្ឋនៅតាមបណ្ដាភូមិចំនួន១២ ស្ថិតក្នុងស្រុកកោះធំ ខេត្តកណ្ដាល ដែលបានរង់ចាំទទួលស្វាគមន៍ក្រោមទឹកមុខញញឹមស្រស់ស្រាយរួសរាយរាក់ទាក់ ជាមួយនឹងការពិសារអាហារសាមគ្គីប្រកបដោយបរិយាកាសរីករាយផងដែរ។ ការជួបសំណេះសំណាល និងសាកសួរសុខទុក្ខនេះធ្វើឡើងក្នុងគោលបំណង ផ្សារភ្ជាប់ទំនាក់ទំនងរវាងថ្នាក់ដឹកនាំជាតិ និងប្រជាពលរដ្ឋនៅតាមមូលដ្ឋាន ជាពិសេសដើម្បីស្វែងយល់អំពីជីវភាពរស់នៅប្រចាំថ្ងៃរបស់ប្រជាពលរដ្ឋនៅតាមមូលដ្ឋានថាតើមានការរីកចម្រើនដល់កម្រិតណា។ គួរកត់សម្គាល់ថា៖ គិតរហូតមកទល់នេះ ឃុំស្ទើរតែទាំងអស់នៃស្រុកកោះធំ មានការអភិវឌ្ឍច្រើនលើវិស័យហេដ្ឋារចនាសម្ព័ន្ធផ្លូវ ថ្នល់ ដោយក្នុងនោះក្នុងឃុំនីមួយៗ មានផ្លូវបេតុងខ្វាត់ខ្វែង និងលែងមានស្ពានឈើទៀតហើយ។ ថ្លែងទៅកាន់បងប្អូនប្រជាពលរដ្ឋដែលរង់ចាំទទួលស្វាគមន៍ ឯកឧត្តមទេសរដ្ឋមន្ត្រី បានគូសបញ្ជាក់អំពីសារសំខាន់នៃសុខសន្តិភាពក្រោមការដឹកនាំដ៏ត្រឹមត្រូវរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានអំពាវនាវឲ្យរួបរួមសាមគ្គីគ្នាថែរក្សាសុខសន្តិភាពដែលរកបានដោយលំបាកនេះឲ្យបានគង់វង្ស ដើម្បីបន្តអភិវឌ្ឍន៍សង្គមជាតិឲ្យមានការរីកចម្រើនច្រើនឡើងថែមទៀត ៕