ក្រសួងសាធារណការ និងដឹកជញ្ជូនបានកំណត់យកថ្ងៃ៧ ខែមករា ឆ្នាំ២០២០ ខាងមុខនេះ ដើម្បីបើកឲ្យដំណើរការជាផ្លូវការនូវការលក់លេខ ចុះបញ្ជីពិសេសផ្ទាល់ខ្លួនសម្រាប់រថយន្ត ដោយការរៀបចំពិធីបើកដំណើរការជាផ្លូវការនេះ ក្រោមវត្តមានឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន ដែលនឹងប្រព្រឹត្តទៅ នៅថ្ងៃអង្គារ ទី០៧ ខែមករា ឆ្នាំ២០២០ វេលាម៉ោង ៣ រសៀល នៅផ្សារទំនើប AEON MALL សែនសុខ ស៊ីធី។ យោងតាមក្រសួងសាធារណការ និងដឹកជញ្ជូន គោលបំណងក្នុងការដាក់ឲ្យប្រើប្រាស់ស្លាកលេខពិសេសនេះ គឺដើម្បីឲ្យប្រជាពលរដ្ឋកម្ពុជាទាំងអស់ អាចជ្រើសរើសស្លាកលេខរថយន្ត ដែលខ្លួនស្រឡាញ់ តាមរយៈការដាក់ពាក្យស្នើសុំទិញក្នុងប្រព័ន្ធ ឬតាមរយៈការដាក់ដេញថ្លៃក្នុងប្រព័ន្ធ ដោយបង្កភាពងាយ ស្រួល តម្លាភាព ទំនុកចិត្ត លឿនរហ័ស និងសុវត្ថិភាពខ្ពស់។ ជាមួយគ្នានេះក្រសួងសាធារណការក៏បានបញ្ជាក់ថាលក្ខណៈសម្បត្តិរបស់ស្លាកលេខពិសេសផ្ទាល់ខ្លួន គឺត្រូវបានបោះពុម្ពដោយមានអក្សរ «កម្ពុជា» នៅផ្នែកខាងលើ និងការួមបញ្ចូលគ្នានៃលេខឡាតាំង ឬអក្សរ ចាប់ពី ០១ ដល់ ០៨ខ្ទង់ បោះពុម្ពនៅផ្នែកកណ្តាល ព្រមទាំងមាន QR Code នៅផ្នែកខាងស្តាំនៃស្លាកលេខផងដែរ៕