ក្នុងរយៈពេលមួយឆ្នាំត្រឹមនៃការបង្កើត និងដាក់ឱ្យដំណើរការជាផ្លូវការនូវកម្មវិធីថែទាំផ្លូវលើទូរស័ព្ទដៃ ដែលមានឈ្មោះថា Road Care ត្រូវបានទទួលការគាំទ្រ និងប្រើប្រាស់យ៉ាងច្រើនពីសំណាក់ពលរដ្ឋ ។ បើតាមមន្ត្រីជំនាញនៃក្រសួងសាធារណការនិងដឹកជញ្ជូន បានប្រាប់ឱ្យដឹងថា Road Care Mobile App បានជួយដោះស្រាយបញ្ហាផ្លូវខូចខាត ចំនួន៣៥០ករណី នៃ២,០០០របាយការណ៍ ដែលបានស្នើជូនមកកាន់មន្ត្រីជំនាញតាមរយៈកម្មវិធីទូរស័ព្ទដៃ ក្នុងរយៈពេលមួយឆ្នាំមកនេះ ។ មន្ត្រីដដែលបានអះអាងថា តួលេខនេះ គឺជាជោគជ័យដ៏ធំបំផុត ហើយការងារជួសជុលផ្លូវនាពេលកន្លងមក គឺត្រូវបានធ្វើឡើងដោយគិតគូរយ៉ាងល្អិតល្អន់ ទាំងផ្នែកអាទិភាព សុវត្ថិភាព និងគុណភាព ។កម្មវិធី Road Care Mobile App ត្រូវបានបង្កើតឡើងក្រោមការផ្តួចផ្តើម និងចង្អុលបង្ហាញពីលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន និងដាក់ឱ្យដំណើរការផ្លូវការនៅក្នុងថ្ងៃទី១៣ ខែធ្នូ ឆ្នាំ២០១៨ ដែលគិតមកទល់នឹងចុងឆ្នាំ២០១៩នេះ គឺមានរយៈពេលប្រមាណ១ឆ្នាំហើយ ។បើតាមលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការនិងដឹកជញ្ជូន បានប្រាប់ថា Road Care Mobile App ត្រូវបានបង្កើតឡើងក្នុងគោលបំណងផ្តល់ឱកាសឱ្យប្រជាពលរដ្ឋចូលរួមចំណែកក្នុងការថែទាំផ្លូវ តាមរយៈការរាយការណ៍តាមប្រព័ន្ធអេឡិចត្រូនិក ហើយមន្ត្រីជំនាញនិងកំណត់អាទិភាព ដើម្បីដោះស្រាយនូវរាល់បញ្ហាទាំងនោះ...បើតាមរបាយការណ៍ និងជាតួលេខជាក់ស្តែង ចំនួនអ្នកប្រើប្រាស់ Road Care Mobile App មានចំនួនខ្ទង់ប្រមាណជាង១៧,០០០នាក់ ។ ដោយឡែក ចំនួនរបាយការណ៍ដែលបានរាយការណ៍មកកាន់មន្ត្រីជំនាញតាមរយៈកម្មវិធីលើទូរស័ព្ទដៃនេះ គឺមានប្រមាណ ២,៥០០របាយការណ៍ ក៏ប៉ុន្តែ មានតែ ២,០០០របាយការណ៍ប៉ុណ្ណោះ ជារបាយការណ៍យកជាការបាន ។ ក្នុងនោះ មាន១៧% ប្រមាណ៣៥០របាយការណ៍ ត្រូវបានដោះស្រាយរួចរាល់ជូនទៅប្រជាពលរដ្ឋវិញ នៅទូទាំងប្រទេស ។បើតាមស្តាប់មើលទៅ ចំនួន១៧%ដែលមន្ត្រីជំនាញបានដោះស្រាយជូនពលរដ្ឋស្របតាមការរាយការណ៍នេះ ហាក់បីដូចជា មានចំនួនតិចតួច ក៏ប៉ុន្តែបើតាមលោក ហ៊ាង សុទ្ធាយុត្តិ បានចាត់ទុកអត្រា១៧%នេះ គឺជាលទ្ធផលដ៏ជោគជ័យធំមួយក្នុងជំហានដំបូង ម្យ៉ាងទៀតលោកបញ្ជាក់ថា ការងារជួសជុលផ្លូវនាពេលកន្លងមក គឺត្រូវបានគិតគូរយ៉ាងល្អិតល្អន់ ទាំងផ្នែកអាទិភាព សុវត្ថិភាព និងគុណភាពអ្នកនាំពាក្យក្រសួងសាធារណការនិងដឹកជញ្ជូនរូបនេះបានឱ្យដឹងថា តាមរយៈ App ថែទាំផ្លូវនេះ គឺមានការវាយតម្លៃខ្ពស់ពីប្រជាពលរដ្ឋ និងបណ្តាញសារព័ត៌មានមួយចំនួន ដែលបានផ្សាយអំពីគុណតម្លៃ និងវឌ្ឍនភាពនៃ Road Care Mobile App នេះ ។លោក សុទ្ធាយុត្តិ បានបញ្ជាក់យ៉ាងខ្លីថា ចំពោះពលរដ្ឋដែលបានទាញយកកម្មវិធី Road Care ទៅប្រើប្រាស់នៅក្នុងទូរស័ព្ទដៃរបស់ខ្លួន និងរាយការណ៍នូវបញ្ហាសំបុកមាន់ ផ្លូវខូចខាតនានាមកក្រសួង នោះគឺបង្ហាញអំពីការគាំទ្រ ហើយលោក ហ៊ាង សុទ្ធាយុត្តិ បានប្រាប់បន្តថា យោងតាមការចង្អុលបង្ហាញពីលោករដ្ឋមន្ត្រីក្រសួងសាធារណការនិងដឹកជញ្ជូន ការឆ្លើយតបទៅនឹងការរាយការណ៍របស់ប្រជាពលរដ្ឋ គឺត្រូវបានធ្វើឡើងជាពីរដំណាក់កាល ដំណាក់កាលទីមួយនឹងឆ្លើយតបមិនលើសពីមួយថ្ងៃ ហើយដំណាក់កាលទីពីរ គឺនឹងឆ្លើយតបមិនលើសពីមួយខែជាបញ្ហាប្រឈមធំបំផុតនាពេលកន្លងមក គឺចំណេះដឹងផ្នែកបច្ចេកវិទ្យាព័ត៌មានរាប់ទាំងមន្ត្រី និងប្រជាពលរដ្ឋនៅមានកម្រិតនៅឡើយ ។ ដោយហេតុដូច្នេះហើយ ទើបក្រសួងបានបង្កើតឱ្យមានការផ្សព្វផ្សាយ បញ្ជ្រាបចំណេះដឹងនានា ដូចជាការបង្កើតវីដេអូស្តីអំពីវិធីប្រើប្រាស់កម្មវិធី Road Care នៅលើទូរស័ព្ទដៃ ពិសេសគឺបង្កើតសិក្ខាសាលាអប់រំនានាទៅកាន់ទាំង២៥រាជធានី-ខេត្ត និងមានកម្មវិធីជំរុញលើកទឹកចិត្តពលរដ្ឋឱ្យចូលរួម ដើម្បីឱ្យពួកគេក្លាយជាពលរដ្ឋសកម្ម រួមចំណែកក្នុងការអភិវឌ្ឍសង្គម ។លោក ហ៊ាង សុទ្ធាយុត្តិ អំពាវនាវឱ្យពលរដ្ឋចូលរួមគាំទ្រ តាមរយៈការទាញយកកម្មវិធី Road Care ប្រើប្រាស់ និងរាយការណ៍នូវរាល់ផ្លូវថ្នល់ផ្សេងៗដែលទទួលរងនូវការខូចខាតនានា ដើម្បីឱ្យមន្ត្រីជំនាញពិនិត្យលទ្ធភាព ចុះពិនិត្យ ជួសជុលឱ្យបានទាន់ពេលវេលា និងស្នើឱ្យបញ្ជាក់ឱ្យបានច្បាស់អំពីសណ្ឋាននៃបញ្ហា និងប្រើប្រាស់ពាក្យពេចន៍ឱ្យមានក្រមសីលធម៌ទៅវិញទៅមករវាងប្រជាពលរដ្ឋនិងមន្ត្រីជំនាញ៕