ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ បានថ្លែងថា ក្រសួងសាធារណការគ្រោង ប្រមូលថវិកាពីម្ចាស់សណ្ឋាគារ និងផ្ទះប្រជាពលរដ្ឋ ដើម្បីយកមកគ្រប់គ្រង និងជួសជុលប្រព័ន្ធ ទឹកកខ្វក់នៅខេត្តព្រះសីហនុ ។ ក្នុងសិក្ខាសាលា ស្តីពីការសិក្សាផែនការមេ និងសមិទ្ធលទ្ធភាពគម្រោង អភិវឌ្ឍន៍ប្រព័ន្ធទឹកកខ្វក់ នៅទីក្រុងព្រះសីហនុ នាថ្ងៃទី២៣ ខែសីហា ឆ្នាំ២០១៩ លោក ស៊ុន ចាន់ថុល បានឲ្យដឹងថា អាងចម្រោះទឹកពេលបច្ចុប្បន្នមិនអាចបានគ្រប់គ្រាន់នោះទេ ដូច្នេះភាគីពាក់ព័ន្ធព្យាយាមកែច្នៃធ្វើអាងចម្រោះទឹក ដែលមានសមត្ថភាព អាចចម្រោះទឹកឲ្យ បាន៤ម៉ឺនម៉ែត្រគូប ក្នុង១ថ្ងៃ នៅឆ្នាំ២០២១ ខាងមុខ។ លោកថា ខេត្តព្រះសីហនុត្រូវការស្ថានីយ៍ចម្រោះទឹក៤កន្លែង ទើបអាចចម្រោះទឹកកង្វក់ទាន់ពេលវេលាដើម្បីកុំឲ្យហូរចូលទៅក្នុងសមុទ្រ។ លោករាប់រៀបថា សព្វថ្ងៃខេត្តព្រះសីហនុមានប្រព័ន្ធលូមេចំនួន១៥៧គីឡូម៉ែត្រ ដើម្បីបង្វែរទឹកកង្វក់ចូលទៅក្នុងអាងចម្រោះ ដែលក្នុងនោះ មានលូរងសម្រាប់បង្ហូរចេញពីផ្ទះសំណាក់ និងសណ្ឋាគាររាប់រយគីឡូម៉ែត្រទៀត ដើម្បីបង្ហូរចូលទៅលូមេ ដែលនេះគឺត្រូវចំណាយថវិកាយ៉ាងច្រើន។ លោកមានប្រសាសន៍ថា “ចឹងត្រូវការថវិកាដើម្បីកសាងផង ដើម្បីយើងធ្វើអាងចម្រោះទឹកកខ្វក់ ហើយនេះយើងត្រូវតែគ្រប់គ្រងវា។ ចឹងចំណូលហ្នឹងមកពីណាត្រូវចំណាយ ចឹងយើងត្រូវការចំណូលដើម្បីគ្រប់គ្រងស្ថានីយ៍របស់យើងឲ្យមានប្រសិទ្ធិភាព ។ ក្នុងនៅកិច្ចប្រជុំនេះ នឹងពន្យល់តើសណ្ឋាគារ យកប៉ុន្មាន ? ផ្ទះប្រជាពលរដ្ឋយើងយកប៉ុន្មាន ? ដើម្បីល្មមយកមកគ្រប់គ្រងទឹកកខ្វក់នេះឯង”។ យោងតាមសេចក្តីព្រាងផែនការមេបរិមាណទឹកកខ្វក់ក្នុងក្រុងព្រះសីហនុ ត្រូវបានប៉ាន់ប្រមាណថា មានចំនួន២៥,៧០០ម៉ែត្រគូប១ថ្ងៃ នៅឆ្នាំ២០១៨ និងមានបរិមាណប្រមាណ៤៧,០០០ ម៉ែត្រគូប១ថ្ងៃ នៅឆ្នាំ២០២៣ និងប្រមាណ៦៤,០០០ ម៉ែត្រគូប១ថ្ងៃ នៅឆ្នាំ២០៣០៕