[VOA] - ក្រសួង ព្រមានចាត់វិធានការក្រុមហ៊ុនចិនមួយ បើមិនកែគុណភាពផ្លូវឡើងវិញ
2019-06-14
Go to the website published VOA
ក្រសួង តម្រូវឱ្យក្រុមហ៊ុនចិនមួយកែសម្រួលគុណភាពផ្លូវឡើងវិញ ក្រោយពីរកឃើញថា ផ្លូវដែលក្រុមហ៊ុននេះទទួលបានសិទ្ធិសាងសង់ មានស្នាមបែក ប្រេះ និងដក់ទឹកដោយកន្លែង ខណៈកំពុងសាងសង់នៅឡើយ។
នៅថ្ងៃព្រហស្បតិ៍ម្សិលមិញ រដ្ឋមន្ត្រីក្រសួងសាធារណការ លោក ស៊ុន ចាន់ថុល និងមន្ត្រីមួយចំនួន បានចុះទៅពិនិត្យការដ្ឋានសាងសង់ផ្លូវមួយកន្លែងស្ថិតនៅខេត្តកំពត។
តាមរយៈហ្វេសប៊ុករបស់ក្រសួង លោក ស៊ុន ចាន់ថុល អះអាងថា ក្រសួងមិនទទួលយកផ្លូវនោះទេ បើក្រុមហ៊ុនមិនកែសម្រួលគុណភាពឡើងវិញ។ រដ្ឋមន្ត្រីរូបនេះ បន្តថា ផ្លូវនោះសាងសង់មិនទាន់ស្របតាមលក្ខណៈបច្ចេកទេសនៅឡើយទេ ព្រោះមានស្នាមបែក ប្រេះ និងសំបុកមាន់។ លោកបញ្ជាឱ្យមានវិធានការដោះស្រាយបន្ទាន់។
អ្នកនាំពាក្យក្រសួងសាធារណការ លោក ហ៊ាង សុទ្ធាយុត្តិ ឱ្យដឹងបន្ថែមថា ក្រុមហ៊ុនម៉ៅការនេះជាក្រុមហ៊ុនចិន តែថា លោកមិនចាំឈ្មោះ។
លោក ហ៊ាង សុទ្ធាយុត្តិ មានប្រសាសន៍ទៀតថា ការដែលក្រសួងតម្រូវឱ្យកែគុណភាពនេះ ជាការព្រមានដំបូង។ លោកថា វិធានការបន្ទាប់អាចនឹងកើតឡើង បើមន្ត្រីជំនាញរបស់ក្រសួងពិនិត្យឃើញថា ការកែតម្រូវនោះ ក្រុមហ៊ុនមិនបានធ្វើតាមលក្ខណៈបច្ចេកទេសដូចមានចែងក្នុងកិច្ចសន្យា។
លោក មានប្រសាសន៍ថា៖ «បើគាត់អត់កែតម្រូវទេ ចុងក្រោយគឺយើងអត់ស៊ីញ៉េទទួលគម្រោងហ្នឹងទេ។ អ៊ីចឹង មានន័យថា គាត់ [ក្រុមហ៊ុន] អត់អាចបញ្ចប់ អត់អាចបើកយកលុយបានទេ។ ហើយយើងក៏ធ្វើលិខិតទៅរដ្ឋាភិបាលដែលជាម្ចាស់ជំនួយកម្ចីថវិកាហ្នឹង ដើម្បីឱ្យគាត់ពិចារណាជួយចាត់វិធានការយើង។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ក្រុមហ៊ុនដែលធ្វើផ្លូវគ្មានគុណភាព អាចមានច្រើនទៀត។ ប៉ុន្តែ លោកចាត់ទុកវិធានការនេះ ថាជាសារព្រមានមួយដល់ក្រុមហ៊ុនខិលខូចដទៃទៀត ។
អ្នកឃ្លាំមើលរូបនេះផ្តល់ជាយោបល់ថា ដើម្បីធានាការសាងសង់ផ្លូវប្រកបដោយគុណភាព រដ្ឋមន្ត្រីក្រសួងនេះត្រូវទប់ស្កាត់កុំឱ្យមានអំពើពុករលួយជាប្រព័ន្ធពីសំណាក់មន្ត្រីខ្លួនក្នុងការជ្រើសរើសដៃគូសម្រាប់អភិវឌ្ឍន៍ និងការដេញថ្លៃគម្រោង ជាដើម ទើបវិធានការដោះស្រាយចំបញ្ហា។
លោក ថា៖ «ទី២ គេត្រូវមានវិធានការទៅលើមន្ត្រីបច្ចេកទេស ក្នុងកម្រិតមន្ត្រីផ្នែកសាងសង់ផ្លូវហ្នឹង ហើយបើវាជាទម្រង់មួយធំ កន្លែងហ្នឹង អង្គភាពប្រចាំងអំពើពុករលួយមិនបាច់ប្រាប់ទេ ត្រូវបើកការស៊ើបអង្កេតទៅលើអំពើពុករលួយណាមួយដែលអាចកើតមាន»។
បើតាមក្រសួងសាធារណការ និងដឹកជញ្ជូន ក្រុមហ៊ុនចិនមួយនេះ ទទួលបានសិទ្ធិម៉ៅការសាងក្រោមគម្រោងជួសជុល និងសាងសង់ឡើងវិញ ជាប្រភេទផ្លូវបេតុង កៅស៊ូ (AC) ស្ថិតលើផ្លូវជាតិលេខ៣ ពីទីរួមខេត្តកំពតទៅរង្វង់មូលវាលរេញ ភ្ជាប់នឹងផ្លូវជាតិលេខ៤ខេត្តព្រះសីហនុ ប្រវែងផ្លូវប្រវែង ៥៤,៣០ គម ។
គម្រោងសាងសង់ មានរយៈពេល ៥៤ខែ ចំណាយថវិកាប្រមាណ ១២,០៦១លានដុល្លារ ក្រោមគម្រោងឥណទានធនាគារពិភពលោក ។ បច្ចុប្បន្ន ការជួសជុលសម្រេចបាន ៦៧,៥០% និងគ្រោងបញ្ចប់នៅខែសីហា ឆ្នាំ២០១៩ ខាងមុខ៕
