កិច្ចប្រជុំពិនិត្យវឌ្ឍនភាពការងាររៀបចំសេចក្តីព្រាងរបាយការណ៍បូកសរុបលទ្ធផលការងារសន្និបាតប្រចាំឆ្នាំ២០២៥ និងលើកទិសដៅការងារឆ្នាំ២០២៦ រួមទាំងការវាយតម្លៃសមិទ្ធកម្មផែនការសកម្មភាពអាទិភាពប្រចាំឆ្នាំ២០២៥ និងរៀបចំផែនការសកម្មភាពអាទិភាពឆ្នាំ២០២៦ របស់អង្គភាពជំនាញក្រោមឱវាទក្រសួង ទីស្តីការក្រសួង៖ នាថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥ ឯកឧត្តម សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយ ដឹកនាំកិច្ចប្រជុំពិនិត្យវឌ្ឍនភាពការងាររៀបចំសេចក្តីព្រាងរបាយការណ៍បូកសរុបលទ្ធផលការងារសន្និបាតប្រចាំឆ្នាំ២០២៥ និងលើកទិសដៅការងារឆ្នាំ២០២៦ រួមទាំងការវាយតម្លៃសមិទ្ធកម្មផែនការសកម្មភាពអាទិភាពប្រចាំឆ្នាំ២០២៥ និងរៀបចំផែនការសកម្មភាពអាទិភាពឆ្នាំ២០២៦ របស់អង្គភាពជំនាញក្រោមឱវាទក្រសួងដោយមានការអញ្ជើញចូលរួមពី លោក លោកស្រីជាថ្នាក់ដឹកនាំ និងមន្រ្តីរាជការ ដែលជាតំណាងអង្គភាពថ្នាក់ជាតិ និងសហគ្រាសសាធារណៈ ក្រោមឱវាទក្រសួង សរុប ៦០នាក់។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីពិនិត្យវឌ្ឍនភាពនៃការរៀបចំសេចក្តីព្រាងរបាយការណ៍ទាំង៣ខាងលើ បញ្ហាប្រឈមនានា សំណូមពរ ការប្រមូលធាតុចូលបន្ថែមឱ្យបានគ្រប់ជ្រុងជ្រោយ និងការដាក់ចេញទិសដៅបន្ត ដើម្បីឱ្យគ្រប់អង្គភាពយកទៅអនុវត្តឱ្យមានប្រសិទ្ធភាព សង្គតិភាព និងជោគជ័យទាន់ពេលវេលាតាមផែនការគ្រោងទុក។ ជារួម អង្គភាពជំនាញបានឯកភាពផ្តល់របាយការណ៍ដែលនៅសេសសល់ មកអគ្គនាយកដ្ឋានផែនការ និងគោលនយោបាយ ឱ្យបានរួចរាល់ត្រឹមសប្តាហ៍នេះ។ ទន្ទឹមនេះ ឯកឧត្តមអគ្គនាយក ក៏បានស្នើឱ្យមន្រ្តីបង្គោលមកពីគ្រប់អង្គភាពជួយពិនិត្យ និងផ្តល់យោបល់បន្ថែមឱ្យបានគ្រប់ជ្រុងជ្រោយលើសេចក្តីព្រាងរបាយការណ៍សង្ខេបដែលក្រុមការងារបានបូកសរុប និងសូមផ្តល់យោបល់ត្រឡប់វិញ ត្រឹមថ្ងៃទី២៤ ខែធ្នូ ឆ្នាំ២០២៥ ដើម្បីរៀបចំជូនថ្នាក់ដឹកនាំពិនិត្យ និងផ្តល់យោបល់៕