កិច្ចប្រជុំលើកទី២៩ នៃគណៈកម្មាធិការចម្រុះកម្ពុជា-ជប៉ុន ក្រោមកិច្ចព្រមព្រៀងរវាងព្រះរាជាណាចក្រកម្ពុជា និងជប៉ុន ស្តីពីសេរីភាវូបនីយកម្ម ការជំរុញ និងការការពារវិនិយោគ ក្រុមប្រឹក្សាអភិវឌ្ឍន៍កម្ពុជា៖ នាព្រឹកថ្ងៃពុធ ទី៥ ខែមីនា ឆ្នាំ២០២៥ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ចូលរួមកិច្ចប្រជុំលើកទី២៩ នៃគណៈកម្មាធិការចម្រុះកម្ពុជា-ជប៉ុន ក្រោមកិច្ចព្រមព្រៀងរវាងព្រះរាជាណាចក្រកម្ពុជា និងជប៉ុន ស្តីពីសេរីភាវូបនីយកម្ម ការជំរុញ និងការការពារវិនិយោគ ក្រោមអធិបតីភាពសហប្រធាន ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា រួមជាមួយ ឯកឧត្តម អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំព្រះរាជាណាចក្រកម្ពុជា ដោយមានការចូលរួមពីឯកឧត្តម លោកជំទាវតំណាងក្រសួង-ស្ថាប័នពាក់ព័ន្ធ សមាគមធុរកិច្ចជប៉ុនប្រចាំកម្ពុជា (JBAC) អង្គការពាណិជ្ជកម្មក្រៅប្រទេសជប៉ុន (JETRO) ទីភ្នាក់ងារសហប្រតិបត្តិការអន្តរជាតិជប៉ុន(JICA) ប្រចាំកម្ពុជា និងមន្ត្រីជំនាញពាក់ព័ន្ធជាច្រើនរូបផងដែរ។ កិច្ចប្រជុំនេះ ត្រូវបានរៀបចំឡើងក្នុងគោលបំណងសំខាន់ៗចំនួន៣ គឺ៖ (១) ស្វែងយល់ពីបញ្ហាប្រឈមនានា ដែលក្រុមហ៊ុនជប៉ុនបានជួបប្រទះក្នុងការធ្វើធុរកិច្ចកម្ពុជា តាមរយៈការធ្វើបទបង្ហាញពីតំណាង JBAC (២) ស្វែងរកការពិនិត្យ បំភ្លឺ និងដោះស្រាយពីក្រសួងស្ថាប័នពាក់ពន្ធដែលបានចូលរួម និង (៣) បរិយាកាសវិនិយោគនៅកម្ពុជា។ ថ្លែងក្នុងកិច្ចប្រជុំលើកទី២៩ នាឱកាសនេះ ឯកឧត្តម ហេង ណន រដ្ឋលេខាធិការ បានជម្រាបជូនអង្គប្រជុំថា ក្រសួងសាធារណការ និងដឹកជញ្ជូន មានក្ដីសោមនស្សរីករាយក្នុងកិច្ចការសហការការងារជាមួយភាគីជប៉ុន ក្នុងការចូលរួមស្វែងរកដំណោះស្រាយលើបញ្ហាប្រឈមនានា និងសម្របសម្រួលជាមួយស្ថាប័នពាក់ព័ន្ធ ធ្វើយ៉ាងណាឱ្យវិស័យភស្តុភារកម្មនៅកម្ពុជាកាន់តែមានភាពល្អប្រសើរ សំដៅរួមចំណែកលើកកម្ពស់កំណើនសេដ្ឋកិច្ចជាតិ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube