កិច្ចប្រជុំក្រុមការងារលេខាធិការដ្ឋាន ដើម្បីពិនិត្យវឌ្ឍនភាពការងារវិភាគមុខងារ និងរចនាសម្ព័ន្ធនៃក្រសួងសាធារណការ និងដឹកជញ្ជូន ទីស្តីការក្រសួង៖ នាថ្ងៃសុក្រ ទី១៨ ខែតុលា ឆ្នាំ២០២៤ លោកជំទាវ ហួត លីដា អនុរដ្ឋលេខាធិការ និងជាប្រធានលេខាធិការដ្ឋាន បានអញ្ជើញដឹកនាំកិច្ចប្រជុំក្រុមការងារលេខាធិការដ្ឋាន ដើម្បីបន្តពិនិត្យលើវឌ្ឍនភាពការងារពាក់ព័ន្ធនឹងការវិភាគមុខងារ និងរចនាសម្ព័ន្ធនៃក្រសួងសាធារណការ និងដឹកជញ្ជូន។ អង្គប្រជុំបានពិនិត្យ និងពិភាក្សាដោយផ្តោតលើការពិនិត្យ និងរៀបចំរបាយការណ៍វឌ្ឍនភាពការងារវិភាគមុខងារ និងរចនាសម្ព័ន្ធជូនក្រសួងមុខងារសាធារណៈ រួមទាំងពិនិត្យលើរចនាសម្ព័ន្ធ និងតួនាទីភារកិច្ចដែលមានបច្ចុប្បន្ន និងការស្នើសុំកែសម្រួលថ្មីរបស់អគ្គនាយកដ្ឋាន និងអង្គភាពក្រោមឱវាទក្រសួង។ ជាជំហានបន្ទាប់ អង្គប្រជុំក៏បានសម្រេចបែងចែកភារកិច្ចឱ្យសមាជិកលេខាធិការដ្ឋានទាំងអស់ ធ្វើការពិនិត្យ និងវិភាគឱ្យបានលម្អិត និងគ្រប់ជ្រុងជ្រោយទៅលើការកែសម្រួលរចនាសម្ព័ន្ធ និងតួនាទីភារកិច្ចថ្មី ដែលស្នើឡើងដោយអគ្គនាយកដ្ឋាន និងអង្គភាពក្រោមឱវាទក្រសួង ដើម្បីផ្ដល់ជាមតិយោបល់ និងធាតុចូលសម្រាប់ក្រុមការងារលេខាធិការដ្ឋានបន្តកិច្ចប្រជុំពិនិត្យ និងពិភាក្សាបន្ថែម ក្នុងការត្រៀមរៀបចំសេចក្ដីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់ក្រសួងសាធារណការ និងដឹកជញ្ជូនថ្មី៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube