ភ្នំពេញ៖ មន្ទីរសាធារណការ និងដឹកជញ្ជូន ៦ខេត្ត បានចុះអនុវត្តការងារ ជួសជុលថែទាំផ្លូវថ្នល់ជាតិ នៅតាមបណ្តាខេត្ត ដើម្បីធ្វើឱ្យប្រសើរឡើង និងជួយសម្រួល ដល់ការធ្វើដំណើររបស់បងប្អូនប្រជាពលរដ្ឋ ការដឹកជញ្ជូនឆ្លងកាត់ ឱ្យកាន់តែមានភាព ងាយស្រួលថែមទៀត ព្រមទាំងចំណេញពេលវេលា និងបន្ថយការគ្រោះថ្នាក់ចរាចរណ៍ គិតចាប់ពីថ្ងៃទី១៧ ខែមិថុនា ដល់ថ្ងៃទី៣ ខែកក្កដា ឆ្នាំ២០២៣ ក្រុមការងារបច្ចេកទេស នៃមន្ទីរសាធារណការ និងដឹកជញ្ជូន ខេត្តត្បូងឃ្មុំ រតនគិរី ព្រះវិហារ បាត់ដំបង សៀមរាប និងខេត្តព្រះវិហារ បានខិតខំប្រឹងប្រែងយកចិត្តទុកដាក់យ៉ាងសកម្ម ដោយបានជួសជុល ថែទាំ សាងសង់-សម្អាតស្មៅ កៀរនិងកិនបង្ហាប់គ្រឹះ លុបសំបុកមាន់ អ៊ុតកៅស៊ូ (Reseal) រោយថ្មម៉ិចពង្រីកតួផ្លូវ អ៊ុតចិញ្ចើមផ្លូវ អ៊ុតគំនូស-បំពាក់ផ្លាកបង្គោលសញ្ញា ចរាចរណ៍ លាបថ្នាំ-ដាំបង្គោលបង្ហាញផ្លូវ កៀរសម្អាតចិញ្ចើមផ្លូវ ប៉ះចិញ្ចើមផ្លូវ នៅលើកំណាត់ផ្លូវជាច្រើនខ្សែ រួមមាន កំណាត់ផ្លូវជាតិលេខ៧ លេខ៨ លេខ៦២ លេខ៧២ លេខ១៥៧១B លេខ៩៥ លេខ៩ លេខ១១ លេខ៧២ លេខ៦៧ លេខ៦៣ លេខ៦ លេខ៦៤ និងផ្លូវជាតិលេខ៩៥ ។ ទន្ទឹមនឹងផ្លូវថ្នល់ស្អាតល្អ ក្រសួងសាធារណការ បានស្នើបងប្អូនប្រជាពលរដ្ឋ កុំបំពាន យកដីចំណីផ្លូវ មកធ្វើអាជីវកម្ម ដើម្បីប្រយោជន៍ផ្ទាល់ខ្លួន ជៀសវាងការចាក់ដីខ្ពស់ជាងផ្លូវ និងកុំដឹកទំនិញលើសទម្ងន់ ដើម្បីរក្សាផ្លូវថ្នល់ ឱ្យមានភាពល្អប្រសើរ និងអាចប្រើប្រាស់ បានយូរអង្វែង។ ប្រសិនបើមានបញ្ហាផ្លូវថ្នល់ ខូចខាតក្លាយជាជង្ហុកសំបុកមាន់ សូមបងប្អូនប្រជាពលរដ្ឋ ទាញយកកម្មវិធីថែទាំផ្លូវ (Road Care) និងរាយការណ៍មកក្រសួងសាធារណការ និងដឹកជញ្ជូន ដើម្បីអាចចាត់ក្រុមការងារ ចុះជួសជុល ថែទាំបានទាន់ពេលវេលា។ ទាញយកកម្មវិធី តាមរយៈតំណភ្ជាប់ខាងក្រោម៖ – iOS: roadcare.mpwt.gov.kh – Android: roadcare.mpwt.gov.kh ៕