[Rasmei Kampuchea Daily News] - ផ្លូវបេតុងជាប់មាត់ទន្លេតូច ស្រុកកោះសូទិន នឹងចាប់ផ្តើមជួសជុល ក្នុងរង្វង់ខែមេសា ឆ្នាំក្រោយ
កំពង់ចាម៖ ផ្លូវបេតុងចម្ងាយប្រវែងជាង ១៤ គីឡូម៉ែត្រ ជាប់មាត់ ទន្លេតូច ស្ថិតក្នុងស្រុកកោះសូទិន ដែលរងការខូចខាត ចំនួនបីកន្លែង ដោយទឹកជំនន់ ទន្លេមេគង្គ កន្លងមក គឺនឹងចាប់ផ្តើមជួសជុលឡើងវិញ នៅក្នុងរង្វង់ខែមេសា ឆ្នាំ២០២៣ ។ នេះបើយោងតាមលទ្ធផលចុះត្រួតពិនិត្យផ្លូវខូច ដឹកនាំដោយលោក អ៊ុន ចាន់ដា ជាអភិបាលខេត្តកំពង់ចាម នៅព្រឹកថ្ងៃទី២១ ធ្នូ នេះ។
លោកអភិបាលខេត្តកំពង់ចាម អមដំណើរដោយលោក យិន វណ្ណៈ ជាអភិបាលស្រុក កោះសូទិន និងមន្ត្រីពាក់ព័ន្ធជាច្រើនរូប បានលើកដៃសំពះតបទៅកាន់ប្រជាពលរដ្ឋ ជាច្រើននាក់ ដែលបានមកឈរទទួលស្វាគមន៍ យ៉ាងត្រៀបត្រា នៅចំទីតាំងផ្លូវបេតុងខូច ចម្ងាយប្រមាណជាង ១០០ ម៉ែត្រ ស្ថិតក្នុងភូមិព្រែកចង្ក្រាន ឃុំល្វេ ស្រុកកោះសូទិនថាៈ សូមបងប្អូន រង់ចាំបន្តិច ខាងក្រុមហ៊ុនសាងសង់ផ្លូវ នឹងរៀបចំជួសជុលផ្លូវដែលរងការខូច ខាត បានល្អឡើងវិញ នៅខែបួន (ខែមេសា) ឆ្នាំក្រោយ ឆាប់ៗនេះហើយ។ជាមួយនោះ លោក យិន វណ្ណៈ អភិបាលស្រុកកោះសូទិន បានរំលឹកឱ្យដឹងថាៈ ផ្លូវបេតុង មួយខ្សែនេះ មានចម្ងាយសរុបជាង ១៤ គីឡូម៉ែត្រ ឆ្លងកាត់ឃុំពាមប្រធ្នួស និងឃុំល្វេ ជាជំនួយរបស់ ធនាគារអភិវឌ្ឍន៍អាស៊ី (ADB) អនុវត្តគម្រោងសាងសង់ ដោយក្រសួងអភិវឌ្ឍន៍ជនបទ ដែលបានសាងសង់រួចរាល់ស្ថាពរ ក្នុងកំឡុងខែមិថុនា ឆ្នាំ២០២២ កន្លងទៅនេះ។
លោកអភិបាលស្រុកកោះសូទិន បានបន្តថាៈ ប្រមាណ បួនខែក្រោយ ពីការស្ថាបនា ពោលគឺ ក្នុងចន្លោះខែតុលា ឆ្នាំនេះ ទឹកជំនន់ទន្លេមេគង្គ និងជំនន់ទឹកភ្លៀង បានបង្កឱ្យ បាក់ស្រុតច្រាំងទន្លេតូច បណ្តាលឱ្យប៉ះពាល់ដល់ផ្លូវបេតុង ជាប់មាត់ច្រាំងទន្លេនេះ បាក់ស្រុតចំនួន បីកន្លែង គឺក្នុងឃុំល្វេចំនួន ពីរ កន្លែង និងឃុំពាមប្រធ្នួសចំនួន មួយ កន្លែង ប៉ុន្តែមិនអនុញ្ញាតឱ្យរថយន្តធុនធំ ឆ្លងកាត់បានទេ៕
