[Rasmei Kampuchea Daily News] - ពលរដ្ឋ ស្នើអាជ្ញាធរក្រុងប៉ោយប៉ែត អោយជួយសម្រួលការជួលជុល ស្ថាបនាផ្លូវមួយខ្សែ ក្នុងភូមិមិត្តភាព
ដោយៈ ភ្នំស្វាយ / បន្ទាយមានជ័យៈ ប្រជាពលរដ្ឋ ភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានសំណូមពរ ដល់អាជ្ញាធរក្រុង និង សង្កាត់ប៉ោយប៉ែត ជួយសម្រួល ជួសជុល ឬឈានដល់ស្ថាបនា តម្លើងកម្រិតធ្វើអោយ ប្រសើរឡើង ផ្លូវលំមួយខ្សែ ក្នុងទីតាំងដែលពួកគេ រស់នៅ ខណៈរដូវភ្លៀងធ្លាក់ បានឈានចូលមកដល់ហើយ ។
ពោលគឺ ពេលមានភ្លៀងធ្លាក់ម្តងៗ ផ្លូវលំក្រាលក្រួស ១ខ្សែនេះ បង្កការលំបាកស្អិត ជាប់ផុង និងរអិលទាំងថ្មើរជើង ជិះកង់ ម៉ូតូ រថយន្ត ឬក៍មធ្យោបាយផ្សេងទៀត ។
ពលរដ្ឋ បានអោយដឹងថាៈ ផ្លូវនោះ វាស្ថិតនៅត្រង់ចំណុចទីតាំងចុងផ្លូវបេតុងអតីតផ្លូវហ្សូអា ZOA (អង្គការជួយជនភៀសខ្លួនហូឡង់) មកដល់ម្តុំខាងមុខ ទីស្នាក់ការគណបក្ស ប្រជាជន សង្កាត់ប៉ោយប៉ែត ក្នុងភូមិមិត្តភាព ។
ប្រជាពលរដ្ឋ ដែលតែងតែគាំទ្រ និងមានជំនឿលើអាជ្ញាធរ នៃរាជរដ្ឋាភិបាលឲ្យដឹងបន្ត ទៀតថាៈ កន្លងមក ប្រជាពលរដ្ឋទាំងឡាយ និងភ្នាក់ងារភូមិ បានគៀងគរ ធនធានសម្ភារ: រៃអង្គាសប្រមូលថវិកា ដើម្បីទិញដី ឬកម្ទេចថ្មក្រាល ចាក់ផ្លូវលំនេះ ។ ប៉ុន្តែ ក្នុងអំឡុងមាន វិបត្តិសាកល នៃការរីករាលដាលជំងឺកូវីដ-១៩ ជិត ២ ឆ្នាំកន្លងមកនេះ ពួកគាត់ (ពលរដ្ឋ) គ្មានលទ្ធភាពធនធានសម្ភារៈថវិកា សម្រាប់ទិញដី ក្រួស ឬកម្ទេចថ្ម ចាក់ក្រាលផ្លូវ នេះទៀតទេ ។ ហេតុដូច្នេះ ទើបពួកគេ ស្នើសុំជំនួយពីអាជ្ញាធរ និងក្រុមការងារ ចុះជួយមូលដ្ឋាន ឱ្យជួយ។ ពោលគឺ បើមិនបានជាផ្លូវក្រាលបេតុង ដូចចំណុចផ្សែងនៃ ភូមិនេះ និងភូមិដទៃទៀត ក៏សំណូមពរបានផ្លូវក្រាលកម្ទេចថ្មដែរ ។
លោក សន មន្នី មេភូមិមិត្តភាព លោកបានឲ្យដឹងថាៈ កន្លងមក ក្នុងនាមលោកជាមេភូមិ លោកតែងតែទទួលនូវ សំណូមពរ និងសម្រាលទុក្ខលំបាក របស់ប្រជាពលរដ្ឋ រស់នៅក្នុងមូលដ្ឋាន ហើយក៏បានលើកសំណើ ជូនទៅអាជ្ញាធរសង្កាត់ប៉ោយប៉ែត និងក្រុងប៉ោយប៉ែត ។
ចំណែកលោក គាត ហ៊ុល អភិបាលក្រុងប៉ោយប៉ែត បានអោយដឹង នៅថ្ងៃទី១៩ ខែមេសា ថាៈ សម្រាប់ផ្លូវនានា ក្នុងក្រុង គឺជាអំណោយរបស់ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន និងជាប្រធានក្រុមការងារ រាជរដ្ឋាភិបាល ចុះមូលដ្ឋាន ខេត្តបន្ទាយមានជ័យ បានផ្តល់ថ្មម៉ិច រួចហើយ ។ ហេតុនេះ លោក គាត ហ៊ុល អភិបាលក្រុង បានស្នើសុំត្រឡប់ មកពលរដ្ឋដែលជាអ្នក ទទួលផល , សូមរកមធ្យោបាយ យកទៅដឹកខ្លួនឯង ឬជួលគេ ។
ចំណែកលោកផ្ទាល់ (គាត ហ៊ុល) នឹងជួយគ្រឿងចក្របន្ថែម ដើម្បីឈូសឆាយ បង្ហាប់កៀរកិន ជួសជុល ឬស្ថាបនា លើកកម្រិតគុណភាពផ្លូវ៕/V
