ថ្ងៃព្រហស្បតិ៍ ១៥កើត ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២១ ខែតុលា ឆ្នាំ២០២១ នៅទីស្តីការក្រសួង ឯកឧត្តម សួន រចនា រដ្ឋលេខាធិការក្រសួងសាធារណការ និងដឹកជញ្ជូន បាន អញ្ជើញដឹកនាំក្រុមការងារក្រសួងចូលរួមក្នុងកិច្ចប្រជុំលើកទី១៩ របស់គណៈកម្មាធិការជាតិសម្រាប់ការ អភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ(គ.ជ.អ.ប) ក្រោមអធិបតីភាពដ៏ខ្ពង់ខ្ពស់សម្ដេច ក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ ដោយមានការចូលរួមដោយផ្ទាល់ និងតាមរយៈប្រព័ន្ធវីដេអូពីចម្ងាយពីឯកឧត្តម លោកជំទាវតំណាងថ្នាក់ដឹកនាំក្រសួង-ស្ថាប័នដែលផ្ទេរមុខងារ ទៅថ្នាក់ក្រោមជាតិ ប្រធានក្រុមប្រឹក្សាភិបាលរាជធានី-ខេត្ត សមាជិកសមាជិកាគ.ជ.អ.ប និងភាគីពាក់ ព័ន្ធទាំងឡាយផងដែរ។ កិច្ចប្រជុំលើកទី១៩ របស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោម ជាតិ(គ.ជ.អ.ប)នាពេលនេះ ធ្វើឡើងក្នុងគោលបំណងដើម្បីពិនិត្យឡើងវិញនូវវឌ្ឍនភាព និងបញ្ហាប្រឈម នានា និងការអភិវឌ្ឍកម្មវិធីកំណែទម្រង់វិមជ្ឈការនិងវិសហមជ្ឈការក្នុងឆ្នាំ២០២០ និងឆមាសទី១ ឆ្នាំ ២០២១ ជាពិសេស ដើម្បីពិនិត្យលើសេចក្តីព្រាងឯកសារសកម្មភាពសម្រាប់ការអភិវឌ្ឍតាមបែបប្រជាធិប តេយ្យនៅថ្នាក់ក្រោមជាតិ ដំណាក់កាលទី២ ឆ្នាំ២០២១ ដល់ឆ្នាំ២០៣០។ អង្គប្រជុំបានពិភាក្សាលើរបៀបវារៈសំខាន់ៗមួយចំនួនរួមមាន៖ ១.ការពិនិត្យ និងអនុម័តលើសេចក្តីព្រាង កំណត់ហេតុកិច្ចប្រជុំលើកទី១៨ របស់ គ.ជ.អ.ប ២.សេចក្តីរាយការណ៍អំពីវឌ្ឍនភាព និងបញ្ហាប្រឈម នៃការអនុវត្តកម្មវិធីកំណែទម្រង់មជ្ឈការ និងវិសហមជ្ឈការសម្រាប់ឆ្នាំ២០២០-២០២១ ៣.ការពិនិត្យនិង ពិភាក្សាលើសេចក្តីព្រាងឯកសារកម្មវិធីជាតិស្ដីពីការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទីពីរឆ្នាំ២០២១ និងឆ្នាំ២០៣០ និង៤.សេចក្តីរាយការណ៍អំពីលទ្ធផលនៃការកែសម្រួលសេចក្តីណែនាំស្ដីពីគោលការណ៍ និងនីតិវិធីនៃការគ្រប់គ្រងបុគ្គលិកក្រោមឱវាទថ្នាក់ក្រោមជាតិ។ ថ្លែងក្នុងកិច្ចប្រជុំនាឱកាសនោះ សម្ដេចក្រឡាហោម បានគូសបញ្ជាក់អំពីសមិទ្ធផលសម្រេចបានធំៗជា ច្រើនក្នុងការអនុវត្តកញ្ចប់កម្មវិធីជាតិរយៈពេល១០ឆ្នាំ ដំណាក់កាលទី១ ឆ្នាំ២០១០-២០២០ ពាក់ព័ន្ធនឹង ការរៀបចំ និងដាក់ឱ្យដំណើរការស្ថាប័នរដ្ឋបាលថ្នាក់ក្រោមជាតិ ស្របតាមគោលការណ៍ នៃការអភិវឌ្ឍតាមបែបប្រជាធិបតេយ្យ រួមជាមួយនឹងការផ្ទេរមុខងារ និងធនធានចាំបាច់មួយចំនួនទៅឱ្យ រដ្ឋបាលថ្នាក់ ក្រោមជាតិដើម្បីធានាដល់ការលើកកម្ពស់ប្រសិទ្ធភាព និងគុណភាពនៃការផ្ដល់សេវាសាធារណៈចាំបាច់នានាជូនប្រជាពលរដ្ឋ។ ឆ្លៀតក្នុងឱកាសនោះ សម្ដេចក្រឡាហោម បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះ ភាគីពាក់ព័ន្ធទាំងអស់ដែលបានខិតខំប្រឹងប្រែងបំពេញការងារ និងចូលរួមគាំទ្រក្នុងកិច្ចដំណើរការកំណែ ទម្រង់វិមជ្ឈការ និងវិសហមជ្ឈការតាមតួនាទី និងការទទួលខុសត្រូវរៀងៗខ្លួន៕