[Rasmei Kampuchea Daily News] - ស្ពានឆ្លងកាត់ទន្លេបាសាក់ ឋិតក្នុងគម្រោងសាងសង់ ផ្លូវក្រវាត់ក្រុង ខ្សែទី៣ សម្រេចបានជាង ៩៧%
ភ្នំពេញ: ស្ពានឆ្លងកាត់ទន្លេបាសាក់ ឋិតក្នុងគម្រោងសាងសង់ ផ្លូវក្រវាត់ក្រុងខ្សែទី៣ សម្រេចបាន ៩៧,២៥% ហើយ គិតរហូតមកទល់ពេលនេះ ក្នុងនោះ៖ ស្ពានឆ្លងកាត់ទន្លេបាសាក់ ខាងកើត ប្រវែង ៦៣០ ម៉ែត្រ សម្រេចបាន ៩៥,១០% គ្រោងនឹងបញ្ចប់ នៅខែតុលា ឆ្នាំ២០២១ និងស្ពានឆ្លងកាត់ ទន្លេបាសាក់ ខាងលិច ប្រវែង ៣៦៦ ម៉ែត្រ សម្រេចបាន ៩៩,៤០% គ្រោងនឹងបញ្ចប់ នៅខែកញ្ញា ឆ្នាំ២០២១។
គម្រោងសាងសង់ ផ្លូវក្រវាត់ក្រុង ខ្សែទី៣ (ផ្លូវជាតិលេខ៤-ផ្លូវជាតិលេខ១) មានប្រវែងសរុប ៥២,៩៨៣ គីឡូ ម៉ែត្រ ក្នុងនោះ ផ្លូវមេ មានប្រវែង ៤៧,៦០៨ គីឡូម៉ែត្រ ជាប្រភេទផ្លូវក្រាលបេតុង ស៊ីម៉ង់ត៍សរសៃដែក ទទឹង ២២ម៉ែត្រ (៤គន្លង) និងកម្រាស់ ២២ សង់ទីម៉ែត្រ និងផ្លូវខ្នែងប្រវែង៥,៣៧៥គីឡូម៉ែត្រ ជាប្រភេទផ្លូវក្រាល បេតុងកៅស៊ូ(AC) ទទឹង ១០ ម៉ែត្រ លើតួផ្លូវ ១២ ម៉ែត្រ កម្រាស់បេតុងកៅស៊ូ ៩ សង់ទីម៉ែត្រ កំណាត់ផ្លូវមេ ក្នុងទីប្រជុំជន ២,៨០ គីឡូម៉ែត្រ មានទទឹងសរុប ២៧ម៉ែត្រ កំណាត់ផ្លូវមេ ក្រៅទីប្រជុំជន ៤៤,៨០ គីឡូម៉ែត្រ មានទទឹងសរុប ២៥ ម៉ែត្រ ខ្សែផ្លូវកាត់ភូមិសាស្ត្រ រាជធានី ១៥,៤២ គីឡូម៉ែត្រ ខ្សែផ្លូវកាត់ភូមិសាស្ត្រ ខេត្តកណ្តាល ៣៧,៥៦ គីឡូម៉ែត្រ (ផ្លូវមេ ៣២,១៩ គីឡូម៉ែត្រ និងផ្លូវខ្នែង ៥,៣៧ គីឡូម៉ែត្រ)។
ផ្លូវក្រវាត់ក្រុងខ្សែទី៣នេះ តភ្ជាប់ទៅនឹងផ្លូវទំនប់កប់ស្រូវ ផ្លូវជាតិលេខ៥ និងភ្ជាប់ទៅនឹងស្ពានឈ្នះឈ្នះ និងមហាវិថីឈ្នះឈ្នះ និងផ្លូវជាតិលេខ៦ ដែលនឹងប្រែក្លាយ ទៅជាផ្លូវក្រវាត់ក្រុងដ៏ធំ និងទំនើបមួយបម្រើ ឱ្យជាផ្លូវដឹកជញ្ជូនវាង រាជធានីភ្នំពេញ តភ្ជាប់ពីផ្លូវជាតិលេខ៦ ផ្លូវជាតិលេខ៥ ផ្លូវជាតិលេខ៤ ផ្លូវជាតិ លេខ៣ ផ្លូវជាតិលេខ២ និងផ្លូវជាតិលេខ២១ ឆ្លងកាត់ទន្លេបាសាក់ (ស្ពានទន្លេបាសាក់ ខាងកើត និងខាងលិច កំពុងសាងសង់) ព្រមទាំង កោះអន្លង់ចិន និងតភ្ជាប់ទៅនឹងផ្លូវជាតិលេខ១ ពិសេសតភ្ជាប់ទៅចំណត ផែកុងតេន័រថ្មី របស់កំពងផែស្វ័យតភ្នំពេញ នៅស្រុកកៀនស្វាយ ក៏ដូចជា ការបំពេញឱ្យការតភ្ជាប់ផ្លូវ អាស៊ានហាយវ៉េយ (AH1 និងAH11) និងផ្លូវរបៀបសំខាន់ៗ (របៀងកណ្តាល និង របៀងសេដ្ឋកិច្ច ភាគខាងត្បូង) របស់មហាអនុតំបន់មេគង្គ។
គម្រោងផ្លូវនេះ ចាប់ផ្តើមពីចំណុច ផ្លូវជាតិលេខ៤ (PK:១៤+១០៥) ស្ថិតក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ និងបញ្ចប់ នៅចំណុចផ្លូវជាតិលេខ១ (PK២៤+៨៤០) ស្ថិតក្នុងភូមិ ស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល (ផ្លូវមេ) និងផ្លូវជាតិលេខ១ (PK៣០+១៤០) ស្ថិត ក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល (ផ្លូវខ្នែង)។
គម្រោងផ្លូវនេះ មានស្ពានវែង ប្រវែង ៩៩៦ ម៉ែត្រ ក្នុងនោះរួមមាន៖ ស្ពានបាសាក់ខាងកើត ប្រវែង ៦៣០ ម៉ែត្រ ទទឹង ២៥ ម៉ែត្រ កម្ពស់នាវាអាចចរាចរណ៍បាន ៤៥ម៉ែត្រ គុណនឹង ៨ម៉ែត្រ និងស្ពានបាសាក់ខាងលិច ប្រវែង ៣៦៦ម៉ែត្រ និងទទឹង២៥ម៉ែត្រ កម្ពស់នាវាអាចចរាចរណ៍បាន ៣០ម៉ែត្រ គុណនឹង៥ម៉ែត្រ និងស្ពានមធ្យមនិង ខ្លី មានចំនួន ៦ កន្លែង ប្រវែងសរុប ៤៨៨ ម៉ែត្រ ក្នុងផ្លូវមេ ៣៥៨ ម៉ែត្រ និងផ្លូវខ្នែង ១៣០ ម៉ែត្រ ស្ពានរំលងប្តូរ ទិសចំនួនពីរឋិត (Interchange) នៅផ្លូវជាតិលេខ២ ប្រវែងតួស្ពាន ២២០ ម៉ែត្រ កម្ពស់អាចធ្វើចរាចរណ៍ បាន ៣០ គុណនឹង ៥,៥ ម៉ែត្រ និងឋិតនៅផ្លូវជាតិលេខ៣ ប្រវែងតួស្ពាន ២២០ ម៉ែត្រ កម្ពស់អាចធ្វើចរាចរណ៍ បាន ៣០ គុណនឹង ៥,៥ម៉ែត្រ និងមានស្ពានរំលង (Flyover) ចំនួនពីរ គឺឋិតនៅផ្លូវជាតិលេខ៤ ប្រវែងតួស្ពាន ៣៤៤ ម៉ែត្រ កម្ពស់អាចធ្វើចរាចរណ៍បាន ៣០គុណនឹង៥,៥ម៉ែត្រ និងឋិតនៅផ្លូវជាតិលេខ២១ ប្រវែងតួស្ពាន ២២០ ម៉ែត្រ កម្ពស់អាចធ្វើចរាចរណ៍បាន ៣០ គុណនឹង ៥,៥ម៉ែត្រ។
គម្រោងសាងសង់ផ្លូវនេះ គ្រោងចំណាយថវិកា សរុបប្រមាណ ២៦៧,៦៧ លានដុល្លារអាមេរិក ក្រោម ហិរញ្ញប្បទានសម្បទាន ពីរដ្ឋាភិបាល នៃសាធារណរដ្ឋប្រជាមានិតចិន និងថវិកាបដិភាគរបស់ រាជរដ្ឋាភិបាលកម្ពុជា សម្រាប់ការដោះស្រាយ ផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ អនុវត្តការសាងសង់ ដោយក្រុមហ៊ុនសំណង់ Shanghai Construction Group Co., Ltd និងតម្លៃត្រួត ពិនិត្យគម្រោង ៥,៣៨ លានដុល្លារអាមេរិក ដោយក្រុមហ៊ុន Guangzhou Wanan Construction Supervision Co., Ltd និងចំណាយរយៈពេលសាងសង់ ចំនួន ៤២ ខែ ចាប់ពីខែធ្នូ ឆ្នាំ២០១៨ និងបញ្ចប់នៅខែធ្នូ ឆ្នាំ២០២១។
សូមជម្រាបជូនថា៖ វឌ្ឍនភាពការងារ ដោយឡែក ទាក់ទងនឹងការសាងសង់ ស្ពានឆ្លងកាត់ទន្លេបាសាក់ ឋិត ក្នុងគម្រោងសាងសង់ផ្លូវ ក្រវាត់ក្រុងខ្សែទី៣នេះ សម្រេចបាន ៩៧,២៥% ហើយ គិតរហូតមកទល់ពេលនេះ ក្នុងនោះ ស្ពានឆ្លងកាត់ ទន្លេបាសាក់ ខាងកើត ប្រវែង ៦៣០ ម៉ែត្រ សម្រេចបាន ៩៥,១០% គ្រោងនឹងបញ្ចប់ នៅខែតុលា ឆ្នាំ២០២១ និងស្ពានឆ្លងកាត់ទន្លេបាសាក់ ខាងលិច ប្រវែង ៣៦៦ ម៉ែត្រ សម្រេចបាន ៩៩,៤០% គ្រោងនឹងបញ្ចប់នៅ ខែកញ្ញា ឆ្នាំ២០២១។
គួរកត់សម្គាល់ថា៖ ផ្លូវក្រវាត់ក្រុងខ្សែទី៣នេះ មានអត្ថប្រយោជន៍ ជួយដល់ការចូលរួមចំណែក កាត់បន្ថយ ការកកស្ទះ និងគ្រោះថ្នាក់ចរាចរណ៍ ដែលធ្លាប់មានកន្លងមក និងជួយសម្រួល ដល់ការធ្វើដំណើររបស់បង ប្អូនប្រជាពលរដ្ឋ ក្នុងរាជធានីបន្ថែមទៀត ខណៈពេល ដែលរាជធានីភ្នំពេញ កំពុងត្រូវបានពង្រីកកាន់តែធំទៅៗ ស្របតាមកំណើនប្រជាជន និងការអភិវឌ្ឍ ដែលធ្វើឱ្យចរាចរណ៍ យានយន្តគ្រប់ប្រភេទ នៅតាមដងផ្លូវ ជួបប្រទះនូវការកកស្ទះ ចរាចរណ៍ ជាញឹកញាប់៕
