នៅរសៀលថ្ងៃចន្ទ ៧កើត ខែបុស្ស ឆ្នាំជូត ទោស័ក ឆ្នាំ២៥៦៤ ត្រូវនឹងថ្ងៃទី២១ ខែធ្នូ ឆ្នាំ២០២០ នៅសាលាខេត្តពោធិ៍សាត់ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាប្រធានផ្នែកអប់រំផ្សព្វផ្សាយ និងបណ្តុះបណ្តាល នៃអគ្គលេខាធិការដ្ឋាន គ.ស.ច.គ. បានដឹកនាំក្រុមការងារជំរុញអនុវត្តផែនការសកម្មភាពសុវត្ថិភាពចរាចរណ៍ផ្លូវគោក ជួបប្រជុំជាមួយអនុគណៈកម្មការសុវត្ថិភាពចរាចរណ៍ផ្លូវគោកខេត្តពោធិ៍សាត់ ក្រោមអធិបតីភាព លោកជំទាវ ម៉ែន ផល្លី អភិបាលរង នៃគណៈអភិបាលខេត្តពោធិ៍សាត់ ព្រមទាំងមានការចូលរួមពី លោក ឆាំង ហាវ អនុប្រធានមន្ទីរសាធារណការ និងដឹកជញ្ជូនខេត្តពោធិ៍សាត់ និងជាអនុប្រធានលេខាធិការដ្ឋានអនុគណៈកម្មការសុវត្ថិភាពចរាចរណ៍ផ្លូវគោកខេត្តពោធិ៍សាត់ ស្នងការរងនៃស្នងការដ្ឋាននគរបាលខេត្តពោធិ៍សាត់ មេបញ្ជាការរង នៃកងរាជអាវុធហត្ថខេត្តពោធិ៍សាត់ ព្រមទាំងតំណាងមន្ទីរពាក់ព័ន្ធ រួមមាន៖ មន្ទីរសុខាភិបាល មន្ទីរអប់រំ យុវជន និងកីឡា មន្ទីរអភិវឌ្ឍន៍ជនបទ មន្ទីរព័ត៌មាន និងមន្ទីរការងារ និងបណ្តុះបណ្តាលវិជ្ជាជីវៈ សរុបអ្នកចូលរួមមាន ១៨នាក់។ គួរបញ្ជាក់ថា ការត្រួតពិនិត្យ និងវាយតម្លៃការអនុវត្តផែនការសកម្មភាពការងារសុវត្ថិភាពចរាចរណ៍ផ្លូវគោក គឺឈរលើលក្ខណៈវិនិច្ឆ័យចំនួន ៨ចំណុច រួមមាន៖ - ប្រសិទ្ធភាពនៃការគ្រប់គ្រងសុវត្ថិភាពចរាចរណ៍ផ្លូវគោក - ហេដ្ឋារចនាសម្ព័ន្ធផ្លូវថ្នល់ប្រកបដោយសុវត្ថិភាព - យានយន្តមានសុវត្ថិភាព - អាកប្បកិរិយាប្រកបដោយសុវត្ថិភាពរបស់អ្នកប្រើប្រាស់ផ្លូវ - កិច្ចធានាប្រព័ន្ធសង្គ្រោះបន្ទាន់ - ការអនុវត្តច្បាប់ប្រកបដោយប្រសិទ្ធភាព និងតម្លាភាព - ការផ្តល់បណ្ណបើកបរប្រកបដោយគុណភាព - ការគ្រប់គ្រង និងវាយតម្លៃលើសុវត្ថិភាពដឹកជញ្ជូនអ្នកដំណើរ កម្មករ និងទំនិញ។