បាត់ដំបង៖ កំណាត់ផ្លូវពីរខ្សែ តពីផ្លូវជាតិលេខ៥ ប្រវែងជាង៧គីឡូម៉ែត្រ សំដៅក្រុងបាត់ដំបង ដែលរងការខូច​ខាតដោយជំនន់ទឹកភ្លៀងកន្លងមក ត្រូវបានមន្ទីរសាធារណការ និង​ដឹកជញ្ជូន​ខេត្ត ចាប់ផ្តើមស្ថាបនាថ្មីដោយ​​ចាក់​បេតុង អ៊ុតកៅស៊ូស្រទាប់លើ រឺភាសាបច្ចេកទេស ហៅប្រភេទអូវ៉ាឡេAC ដែលជាប្រភេទផ្លូវគុណ ភាពល្អ ជាប់បានយូរ។ លោក ចាន់សំបូរ ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានមានប្រសាសន៍​ថា កំណាត់ផ្លូវទាំងពីរខ្សែ ដែលត្រូវស្ថាបនាថ្មីនេះ ដោយសារតែរងគ្រោះខ្លាំងពីជំនន់ទឹកភ្លៀង ធ្វើឱ្យផ្លូវរមួលខ្លាំង ទើបយើងប្រើបច្ចេកទេសចាក់ផ្លូវប្រភេទអូវ៉ាឡេACនេះ ដើម្បីជាប់បានយូរ និងអាចធ្វើដំណើរបានស្រួល ។ លោកបញ្ជាក់ថា ការចំណាយថវិកាស្ថាបនានេះ ជាគម្រោងរបស់រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន ចំណែកមន្ទីរជាអ្នកអនុវត្តន៍ផ្ទាល់។ លោកបញ្ជាក់ទៀតថា កំណាត់ផ្លូវពីរខ្សែនេះ គឺផ្លូវទី១ ចាប់ពីចំណុចដៃប្រាំបី ដល់រង្វង់មូលយាយទេព ប្រវែង២២០០ ម៉ែត្រ ជាប្រភេទផ្លូវភ្លោះ ដែលមួយចំហៀង៩ម៉ែត្រ និង ផ្លូវទោលមួយខ្សែទៀត ប្រវែង៥គីឡូម៉ែត្រ គុណនិង១០ម៉ែត្រ ចាប់ពីចំណុចពុកឆ្មារ ដល់រង្វង់មូលព្រាបសរ ។ លោកប្រធានមន្ទីរសាធារណការ និងដឹកជញ្ជូន ខេត្តបាត់ដំបង បញ្ជាក់ថា ក្រៅពីផ្លូវពីរខ្សែខាងលើនេះ នៅមានគម្រោងចាក់ផ្លូវប្រភេទគុណភាពខាងលើ ក្នុងក្រុងបាត់ដំបងបន្ថែមទៀតដែរ ជាគម្រោងរបស់រដ្ឋបាលខេត្តបាត់ដំបង ចាប់ពីចំណុចមុខសាលាខេត្តដល់ផ្សារលើ និង ផ្លូវលេខពីរ ចាប់ពីចំណុចវត្តដំរីស ដល់ផ្លូវជាតិលេខប្រាំ ៕