នៅរសៀល ថ្ងៃព្រហស្បតិ៍ ១រោច ខែមិគសិរ ឆ្នាំកុរ ឯកស័ក ព.ស.២៥៦៣ នៅសាលាបឋមសិក្សាអន្លង់វិល ស្ថិតក្នុងឃុំអន្លង់វិល ស្រុកសង្កែ ខេត្តបាត់ដំបង មានរៀបចំពិធីផ្តល់អំណោយមួកសុវត្ថិភាពដល់សិស្សានុសិស្ស លោកគ្រូ អ្នកគ្រូ និងមាតាបិតាសិស្ស ចំនួន ១.២៣៨នាក់ និងដោយមានការអញ្ជើញចូលរួមជាគណ:អធិបតី លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋានគណ:កម្មាធិការជាតិសុវត្ថិភាពចរាចរណ៍ផ្លូវគោក ឯកឧត្តម ងួន រតន: អភិបាលនៃគណ:អភិបាលខេត្តបាត់ដំបង និងជាប្រធាននៃអនុគណ:កម្មការសុវត្ថិភាពចរាចរណ៍ផ្លូវគោកខេត្តបាត់ដំបង លោក Robert Elliott នាយកប្រតិបត្តិចាត់ការក្រុមហ៊ុន Manulife Cambodia និងចូលរួមអមដំណើរដោយលោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក មន្រ្តីអគ្គលេខាដ្ឋាន គ.ស.ច.គ. និងមន្ត្រីនាយកដ្ឋានសុវត្ថិភាពចរាចរណ៍គោកផងដែរ។ ពិធីនេះមានគោលបំណងក្នុងការរួមចំណែកជាមួយរាជរដ្ឋាភិបាលលើការងារជំរុញការពាក់មួកសុវត្ថិភាពទាំងអ្នកបើកបរទោចក្រយានយន្ត និងអ្នករួមដំណើរ ដើម្បីការពារអាយុជីវិតពីការរងរបួសក្បាលធ្ងន់ធ្ងរ ដែលបង្កពីគ្រោះថ្នាក់ចរាចរណ៍។