ក្រសួងសាធារណការ និងដឹកជញ្ជូន សហការជាមួយសមាគម PIANCរៀបចំសិក្ខាសាលា PIANC លេីកទី១ នៅព្រះរាជាណាចក្រកម្ពុជា --- ថ្ងៃព្រហស្បតិ៍-សុក្រ ១១-១២រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៤-២៥ ខែតុលា ឆ្នាំ២០១៩ ឯកឧត្តម អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីបើកសិក្ខាសាលា PIANC លេីកទី១ នៅព្រះរាជាណាចក្រកម្ពុជា ដែលបានប្រព្រឹត្តទៅនៅសណ្ឋាគារភ្នំពេញ។ សិក្ខាសាលានេះមានការចូលរួមពីតំណាងក្រសួង ស្ថាប័ន មន្ទីរសាធារណការ និងដឹកជញ្ជូនរាជធានី-ខេត្ត កំពង់ផែស្វយ័តភ្នំពេញ កំពង់ផែស្វយ័តក្រុងព្រះសីហនុ ក្រុមហ៊ុនកំពង់ផែឯកជន និងក្រុមហ៊ុនដឹកជញ្ជូនតាមផ្លូវទឹក ប្រមាណជា ១០០នាក់។ សិក្ខាសាលានេះ ត្រូវបានរៀបចំឡើង ក្នុងគោលបំណងផ្សព្វផ្សាយអំពីអត្ថប្រយោជន៍របស់ PIANC ជាច្រើន មានដូចជា បណ្ដាញទូទាំងសកលលោករបស់ PIANC បទពិសោធន៍ជាងមួយសតវត្សដូចជាសកម្មភាពសំខាន់ផ្សេងៗទៀត។ សិក្ខាសាលានេះនឹងជួយជំរុញលើកទឹកចិត្ដដល់កំពង់ផែកម្ពុជាទាំងអស់ និងបណ្តាក្រុមហ៊ុនដឹកជញ្ជូនតាមនាវា (Shipping) ក្នុងការដោះស្រាយបញ្ហាប្រឈមថ្មីៗ សម្រាប់ធ្វើការតភ្ជាប់ទៅកាន់កំពង់ផែក្នុងពិភពលោក ក៏ដូចជា សហគមន៍ក្រុមហ៊ុនដឹកជញ្ជូនតាមរយៈការចូលរួម យ៉ាងសកម្មក្នុងគ្រួសារ PIANC៕